រដ្ឋមន្រ្តីការបទេសមកពីប្រទេសទាំង៧ ដែលហៅថា ជីសេវិន(G7) បាននិយាយថា ពួកគេគាំទ្របទឈប់បាញ់រវាងអ៊ីស្រាអែលនិងអ៊ីរ៉ង់ ដែលបានជំរុញឱ្យមានការចរចាឡើងវិញ ដើម្បីជំរុញឱ្យមានការដោះស្រាយកម្មវិធីនុយក្លេអ៊ែរអ៊ីរ៉ង់។
ជាទូទៅគេដឹងថា G7 ឬ Group of 7 ជាក្រុមប្រទេសទាំង៧ ដែលជាអង្គការអន្តររដ្ឋាភិបាលមួយ ដែលប្រមូលផ្តុំទៅដោយប្រទេសអ្នកមាន ដូចជា ប្រទេសកាណាដា បារាំង អាល្លឺម៉ង់ អ៉ីតាលី ជប៉ុន ចក្រភពអង់គ្លេស និងសហរដ្ឋអាមេរិក។
បើតាមសេចក្តីរាយការណ៍នៅថ្ងៃទី០១ ខែកក្កដានេះ របស់រ៉យទ័រ(Reuters) បានឱ្យដឹងថា ចាប់តាំងពីខែមេសាមក អ៊ីរ៉ង់ និងសហរដ្ឋអាមេរិក បានចរចាក្នុងគោលបំណងស្វែងរកដំណោះស្រាយការទូតថ្មីមួយ ចំពោះកម្មវិធីនុយក្លេអ៊ែររបស់អ៊ីរ៉ង់។
តេរ៉ាន់ និយាយថា កម្មវិធីរបស់ខ្លួនគឺសន្តិភាព ហើយអ៊ីស្រាអែល និងសម្ព័ន្ធមិត្តរបស់ខ្លួននិយាយថា ពួកគេចង់ឱ្យមានការធានាថា អ៊ីរ៉ង់នឹងមិនអាចសាងសង់អាវុធនុយក្លេអ៊ែរបានទេ។
ប្រភពបន្តថា កាលពីសប្តាហ៍មុន លោក ត្រាំ បានប្រកាសអំពីបទឈប់បាញ់មួយ រវាងសហរដ្ឋអាមេរិក សម្ព័ន្ធមិត្តអ៊ីស្រាអែល និងគូរប្រជែងក្នុងតំបន់របស់ខ្លួន គឺអ៊ីរ៉ង់ ដើម្បីបញ្ឈប់សង្រ្គាមដែលចាប់ផ្តើមនៅថ្ងៃទី ១៣ ខែមិថុនា នៅពេលដែលអ៊ីស្រាអែលវាយប្រហារអ៊ីរ៉ង់។
ជម្លោះរវាងអ៊ីស្រាអ៊ែល និងអ៊ីរ៉ង់ បានបង្កើនការប្រកាសអាសន្នក្នុងតំបន់រួចទៅហើយ គឺចាប់តាំងពីការចាប់ផ្តើមនៃសង្គ្រាមអ៊ីស្រាអែលនៅហ្គាហ្សា ក្នុងខែតុលា ឆ្នាំ២០២៣។
ប្រភពបន្ថែមទៀតថា មុនពេលដែលបទឈប់បាញ់បានប្រកាស ក្រុងវ៉ាស៊ីនតោនបានវាយទីតាំងនុយក្លេអ៊ែររបស់អ៊ីរ៉ង់ ហើយអ៊ីរ៉ង់បានកំណត់ទិសដៅលើមូលដ្ឋាន ក្នុងហ្គាតា របស់សហរដ្ឋអាមេរិកជាការសងសឹក។ រដ្ឋមន្ត្រីការបទេសជីសេវិន(G7) បាននិយាយថា ពួកគេបានជំរុញ ‘‘គ្រប់ភាគីទាំងអស់ ជៀសវាងសកម្មភាពដែលអាចធ្វើឱ្យមានអស្ថិរភាពក្នុងតំបន់បន្ថែមទៀត’’។
ប្រភពបន្ថែមថា អ្នកការទូតកំពូល ជីសេវិន(G7) បានថ្កោលទោសការគំរាមកំហែងប្រឆាំងនឹងប្រមុខអ្នកឃ្លាំមើលនុយក្លេអ៊ែររបស់អង្គការសហប្រជាជាតិ កាលពីថ្ងៃចន្ទ បន្ទាប់ពីអ្នកសារព័ត៌មានដ៏រឹងរុះរបស់អ៊ីរ៉ង់បាននិយាយថា ចៅហ្វាយរបស់ IAEA (អាយអេអ៊ីអេ) លោក រ៉ាហ្វែល គ្រូសស៊ី (Rafael Grossi) គួរតែត្រូវបានកាត់ទោស និងប្រហារជីវិតក្នុងនាមជាភ្នាក់ងារអ៊ីស្រាអែល៕
