ក្រុមអ្នកឃ្លាំមើល និយាយថា ការដែលលោក ហ៊ុន សែន ឱ្យកែរដ្ឋធម្មនុញ្ញដើម្បីដកសញ្ជាតិខ្មែរចំពោះអ្នកមិនគាំទ្រខ្លួននោះ ជានយោបាយបំរើមហិច្ឆតាលោក ហូ ជីមិញ ក្នុងការលេបយកទឹកដីខ្មែរ។
ពួកគេបារម្ភថា បន្ទាត់នយោបាយដើម្បីតែរក្សាអំណាចត្រកូលនេះ ឆ្លុះបញ្ជាំងពីបំណងចង់រំលាយជាតិសាសន៍ខ្លួនឯង បើកផ្លូវឱ្យវៀតណាមមកចាក់ឬសជ្រៅគ្រប់គ្រងស្ថាប័នកំពូលៗរបស់ខ្មែរ ដែលជាសញ្ញាហានិភ័យដល់បូរណភាពទឹកដីក្នុងពេលដ៏ខ្លី។
តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ ថ្លែងនៅថ្ងៃទី២ ខែកក្កដានេះថា ការបង្កើតច្បាប់ដកសញ្ជាតិពលរដ្ឋខ្មែរពីកំណើត គឺជាការចូលរួមបង្កើតរបបវាលពិឃាតថ្មី ប្រឆាំងជាតិសាសន៍ខ្លួនឯង ចង់រំលាយពូជសាសន៍ខ្មែរ។
ក្នុងន័យនេះ លោកថា លោក ហ៊ុន សែន បានផ្តល់សញ្ជាតិដល់វៀតណាមតាមទំនើងចិត្ត បំពានរដ្ឋធម្មនុញ្ញ ប៉ុន្តែរកគ្រប់វិធីដើម្បីដកសញ្ជាតិខ្មែរពីកំណើតពីជនជាតិខ្មែរទៅវិញ។
លោកថា៖ «គាត់ដកសញ្ជាតិពីខ្មែរ គាត់ដេញខ្មែរចេញ ខាងគណបក្សប្រឆាំងគាត់ដេញឱ្យចេញអស់ បើវៀតណាមឲ្យចូល។ គាត់ទៅជួបនាយករដ្ឋមន្ត្រីវៀតណាម មកអី! គេមកសុំឲ្យជួយមើលកូនចៅគេ ជួយថែរក្សាគាត់អូខេរហូត ហើយបើគាត់ទៅខាងវៀតណាមវិញ គាត់មិនដែលនិយាយឱ្យខាងរដ្ឋមន្ត្រីអី ជួយមើលខ្មែរកម្ពុជាក្រោម អត់ដែលនិយាយសោះ។ អនាគតទៅដឹកនាំដោយ លោក ហ៊ុន សែន លោក ហ៊ុន ម៉ាណែត ហ្នឹងគឺប្រទេសកម្ពុជាគឺរលាយ បើសិនជាគាត់អត់មានការពារប្រជាពលរដ្ឋ ទឹកដីទេ គឺបទក្បត់ជាតិទាំងស្រុងហើយ»។
ដោយឡែក អ្នកនាំពាក្យក្រុមប្រឹក្សាជាតិតស៊ូ លោក គឹម សុខ រិះគន់លើហ្វេសបុកលោកថា ព្រោះតែចង់កម្ចាត់ លោក សម រង្ស៊ី និងសហការីឆ្នើមៗ លោក ហ៊ុន សែន ចង់ក្បត់ដូនតាបុព្វបុរសខ្មែរដោយប្រថុយកែច្បាប់ «ដកសញ្ជាតិខ្មែរពីជនជាតិកំណើតខ្មែរ» បន្ទាប់ពីលោក ហ៊ុន សែន បរាជ័យរកលេសមិនបានរឿងធ្វើច្បាប់ «ដាក់មនុស្ស១ក្រុម ជាក្រុមភេរវកម្ម»។
បើតាមលោក គឹម សុខ បើលោក ហ៊ុន សែន ចង់ឲ្យជាតិកម្ពុជារឹងមាំ ត្រូវផ្សះផ្សាបង្រួបបង្រួមជាតិ ដោះស្រាយវិបត្តិនយោបាយ កុំឲ្យវឹកវរគ្មានសន្តិភាព ក្នុងផ្ទៃក្នុងជាតិ ពុំមែនកែច្បាប់និងធ្វើច្បាប់កំបែកបំបាក់ជាតិ ដើម្បីតែកម្ចាត់ខ្មែរពូជសាសន៍ឯងនោះទេ។
ប្រតិកម្មនេះ ក្រោយប្រធានគណបក្សប្រជាជនកម្ពុជា លោក ហ៊ុន សែន នៅថ្ងៃទី២៧ ខែមិថុនា បានបញ្ជាឱ្យក្រសួងយុត្តិធម៌ពិចារណាធ្វើវិសោធនកម្មរដ្ឋធម្មនុញ្ញ ដើម្បីអាចដកសញ្ជាតិពលរដ្ឋខ្មែរចំពោះអ្នកទាំងឡាយណាដែលលោកចោទថាបានបំផ្លាញខ្មែរ។
លោកថា៖ «ខ្ញុំសុំផ្ដាំផ្ញើទៅឯកឧត្តមរដ្ឋមន្ត្រីក្រសួងយុត្តិធម៌កម្ពុជា សិក្សាអំពីការធ្វើវិសោធនកម្មច្បាប់រដ្ឋធម្មនុញ្ញ ទាក់ទងនឹងការដកសញ្ជាតិពលរដ្ឋកម្ពុជាណា ដែលឃុបឃិតជាមួយបរទេសបំផ្លាញខ្មែរ»។
យ៉ាងណា អ្នកអត្ថាធិប្បាយបញ្ហានយោបាយ លោក ស៊ន តារា ថ្លែងថា ការដកសញ្ជាតិជនជាតិខ្មែរពីកំណើត ងាកទៅផ្តល់សញ្ជាតិឲ្យជនអន្តោប្រវេសន៍ខុសច្បាប់ គឺជាគ្រោះថ្នាក់ធ្ងន់ធ្ងរដល់បូរណភាពទឹកដីកម្ពុជា។
លោកថា៖ «សាហាវណាស់បងប្អូន! យួនរាប់លាននាក់ចូលសញ្ជាតិខ្មែរ។ ខ្មែរយើងមិនដឹងជាអនាគតទៅ! ប្រទេសយើង ដូចជាលែងកាន់កាប់ដោយខ្មែរហើយដឹង! ចុះ(យួន)ចូលសញ្ជាតិអស់ទៅ! ទៅកាន់តំណែងមេទ័ព ទៅកាន់តំណែងប៉ូលីស ទៅកាន់តំណែងប៉េអឹម បាត់ម្តងបន្តិចៗ យូរៗទៅ ចេះតែអញកំទេចហែងៗ ហែងក្បត់ជាតិៗ ចេះតែខ្លាំងសង្គ្រឺតធ្មេញដាក់ខ្មែរ ងាកទៅយួនជុំវិញខ្មែរអស់អាលីង។ សុទ្ធតែយួនឧត្តមសេនីយ៍ យួនរដ្ឋមន្ត្រី សុទ្ធតែយួន ចៅហ្វាយខេត្ត»។
យ៉ាងណា អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ ធ្លាប់ប្រាប់VODថា ក្រុមបក្សប្រឆាំងទៅវិញទេ ដែលបានគប់គិតជាមួយបរទេសមានចេតនាដើម្បីបំផ្លាញជាតិខ្មែរ។
រដ្ឋធម្មនុញ្ញកម្ពុជា មាត្រា៣៣ ចែងថា ប្រជាពលរដ្ឋខ្មែរមិនអាចត្រូវបានដកសញ្ជាតិ និរទេស ឬចាប់បញ្ជូនខ្លួនទៅឱ្យប្រទេសក្រៅណាមួយឡើយ លើកលែងតែមានកិច្ចព្រមព្រៀងជាមួយគ្នាទៅវិញទៅមក។ប្រជាពលរដ្ឋខ្មែរ ដែលកំពុងរស់នៅឯបរទេស ត្រូវបានរដ្ឋគាំពារ។ការទទួលសញ្ជាតិខ្មែរ ត្រូវកំណត់ក្នុងច្បាប់។
អតីតនាយខុទ្ទកាល័យ លោក កឹម សុខា គឺលោក មុត ចន្ថា និយាយលើហ្វេសបុកលោកថា វៀតណាមលួចរំលោភដីនិងកោះខ្មែរ ម្តេចមិនប្រកាសឱ្យខ្មែររួបរួម! ឱ្យតែនិយាយរឿងយួនរំលោភបំពានយកដីខ្មែរដឹងតែចាប់ដាក់គុក។
លោកថា៖ «យើងប្រឆាំងនឹងចោរឈ្លានពានគ្រប់ទិសទីទាំងអស់ដោយមិនរើសមុខ»។
រីឯអ្នកឃ្លាំមើលបញ្ហាព្រំដែន លោក អ៊ុំ សំអាន ពន្យល់លើហ្វេសបុកលោកថា ពលរដ្ឋខ្មែរដែលត្រូវដកសញ្ជាតិខ្មែរពីកំណើត នឹងលែងមានសិទ្ធិឈរឈ្មោះឱ្យគេបោះឆ្នោត លែងមានសិទ្ធិបោះឆ្នោត មិនអាចកាន់អត្តសញ្ញាណនិងកាន់លិខិតឆ្លងដែនខ្មែរ។ បន្ថែមលើនេះ មិនអាចធ្វើដំណើរទៅក្រៅប្រទេស (បើមានសញ្ជាតិតែមួយ) គ្មានកម្មសិទ្ធិកាន់កាប់អចលនទ្រព្យ មិនអាចទទួលបានសេវាគាំពារសង្គម គ្មានសិទ្ធធ្វើជាប៉ូលីស ទាហាន និងមន្រ្តីរាជការ ហើយកូនៗកើតមកមិនអាចទទួលបានសញ្ជាតិខ្មែរ ជាដើម។
ផ្ទុយទៅវិញ លោកថា ជនជាតិវៀតណាមដែលទទួលបានសញ្ជាតិខ្មែរ នឹងទទួលបានសិទ្ធិទាំងនោះដោយស្របច្បាប់។
លោកគូសបញ្ជាក់ថា៖ «ហេតុនេះ ជនជាតិវៀតណាមទទួលបានសញ្ជាតិខ្មែរ នឹងសម្រេចជោគវាសនាជំនួសខ្មែរ ហើយដំណើរឆ្ពោះមកទិសខាងលិចរបស់ហូជីមិញ ក្នុងការបង្កើតសហពន្ធ័ឥណ្ឌូចិន នឹងបានសម្រេចនាពេលអនាគត»។
លោកសង្កត់ធ្ងន់ថា គ្មានប្រទេសណាលើលោកដកសញ្ជាតិពលរដ្ឋពីកំណើតនោះទេ លើកលែងតែជនល្មើសនោះ មានសញ្ជាតិពីរ ហើយមិនទាក់ទងនឹងរឿងនយោបាយនោះទេ។ ការចង់ធ្វើច្បាប់ដកសញ្ជាតិពលរដ្ឋខ្មែរពីកំណើតនេះ គឺជារឿងនយោបាយដែលចង់ធ្វើទុក្ខបុកម្នេញដល់គូរប្រកួតប្រជែងនយោបាយ៕
