គណបក្សនយោបាយក្រៅរដ្ឋាភិបាល ជំរុញឱ្យកម្ពុជាមានវិធានការច្បាស់លាស់បន្ថែមទៀត ក្នុងការចរចារឿងពន្ធគយបដិកាជាមួយសហរដ្ឋអាមេរិក តាមរយៈការស្តារឡើងវិញនូវលទ្ធិប្រជាធិបតេយ្យ ការគោរពសិទ្ធិមនុស្ស និងធានាយុត្តិធម៌សង្គម ខណៈការចរចារឿងនេះនៅមិនទាន់ទទួលបានជោគជ័យ និងកៀកដល់ថ្ងៃកំណត់។
កាលពីដើមខែមេសា ឆ្នាំ២០២៥ លោក ដូណាល់ ត្រាំ (Donald J. Trump) ប្រធានាធិបតីអាមេរិក បានប្រកាសដាក់ចេញការអនុវត្តពន្ធគយបដិការទៅលើជាង១៨០ប្រទេសទូទាំងពិភពលោក ក្នុងនោះមានទាំងកម្ពុជាផងដែរ ដែលអាមេរិកគ្រោងនឹងដំឡើងពន្ធដល់ ៤៩% បើការចរចារយៈពេល ៩០ថ្ងៃ មិនទទួលបានលទ្ធផលផ្លែផ្កាទេនោះ។
ក្រោយការប្រកាសរបស់រដ្ឋបាលលោក ត្រាំ រាជរដ្ឋាភិបាលកម្ពុជា បានបង្កើតក្រុមការងារដើម្បីចរចាជាមួយសហរដ្ឋអាមេរិកលើបញ្ហានេះ ប៉ុន្តែការចរចាដែលបានធ្វើឡើងច្រើនលើកច្រើនសារមកហើយនោះ នៅមិនទាន់មានលទ្ធផលនៅឡើយ។
យោងតាមសេចក្តីថ្លែងការណ៍មួយ ចុះថ្ងៃទី០១ ខែកក្កដា ឆ្នាំ២០២៥នេះ គណបក្សកម្លាំងជាតិ ដែលជាគណបក្សក្រៅរដ្ឋាភិបាលមួយ បានលើកឡើងពីក្តីបារម្ភយ៉ាងខ្លាំង ក្រោយការចរចារវាងរដ្ឋាភិបាលកម្ពុជា ជាមួយអាមេរិក ចំពោះវិធានការប្រកាសបន្ថែមពន្ធលើមុខទំនិញរបស់កម្ពុជា ទៅកាន់ទីផ្សារអាមេរិកជាច្រើនលើក មិនទាន់ទទួលបានជោគជ័យ ដែលអាចប្រឈមនឹងការបាត់បង់ការងារធ្វើ និងប្រាក់ចំណូលរបស់កម្មករ ក៏ដូចជាប្រជាពលរដ្ឋខ្មែររាប់ម៉ឺននាក់ ដែលបណ្តាលមកពីការបិទរោងចក្រផលិតទំនិញនាំចេញទៅសហរដ្ឋអាមេរិក។
គណបក្សនេះ យល់ថា កម្ពុជាត្រូវតែមានវិធានការច្បាស់លាស់បន្ថែមទៀត គឺការបង្ហាញនូវជំហរស្មោះត្រង់ ក្នុងការចរចាបើកចំហរជាមួយអាមេរិក តាមរយៈការស្តារឡើងវិញនូវលទ្ធិប្រជាធិបតេយ្យ ការគោរពសិទ្ធិមនុស្ស ការលើកកម្ពស់សេរីភាពបញ្ចេញមតិ ព្រមទាំងការធានាយុត្តិធម៌សង្គម ដែលសហរដ្ឋអាមេរិក តែងតែសម្តែងការព្រួយបារម្ភ និងចង់ជួយដល់ប្រជាពលរដ្ឋខ្មែរ។
គណបក្សកម្លាំងជាតិ ក៏បានជំរុញឱ្យកម្ពុជាមានការរួបរួម ការផ្សះផ្សាជាតិ សាមគ្គីភាព និងឯកភាពផ្ទៃក្នុងជាតិ តាមរយៈការបង្កើតឱ្យមាននូវវប្បធម៌សន្ទនាឡើងវិញ រវាងឥស្សរជននយោបាយកំពូលៗ ការដោះលែងអ្នកជាប់ឃុំនយោបាយ និងអ្នកជាប់ឃុំមនសិកា ព្រមទាំងអ្នកនយោបាយដែលកំពុងនិរទេសនៅក្រៅប្រទេស ឱ្យមានសេរីភាពវិញ ដើម្បីបានជួបជុំគ្រួសារ និងបានចូលរួមក្នុងការកសាងជាតិមាតុភូមិផងដែរ។
សម្រាប់កម្ពុជា គឺសហរដ្ឋអាមេរិក គ្រោងនឹងដំឡើងពន្ធគយរហូតដល់ ៤៩ភាគរយ។ ការដំឡើងពន្ធដល់ ៤៩ភាគរយលើទំនិញកម្ពុជា នាំទៅកាន់សហរដ្ឋអាមេរិកនេះ ជាកម្រិតខ្ពស់បំផុត បើប្រៀបធៀបទៅនឹងបណ្តាប្រទេសនានានៅលើពិភពលោក ក្នុងនោះប្រទេសវៀតណាម ៤៦ភាគរយ, ថៃ៣៦ភាគរយ ឡាវ៤៨ភាគរយ ចិន ៣៤ភាគរយ និងសិង្ហបុរី១០ភាគរយជាដើម។
តែយ៉ាងណា ក្រោយពីការប្រកាសដ៏ភ្ញាក់ផ្អើលនេះ បានប្រមាណមួយសប្តាហ៍ គឺនៅថ្ងៃទី១០ ខែមេសា រដ្ឋបាល លោក ដូណាល់ ត្រាំ បានប្រកាសជាថ្មីទៀត ដោយពន្យាពេលដាក់ពន្ធគយទៅលើបណ្តាប្រទេសផ្សេងៗ រួមទាំងកម្ពុជាផងដែរ រយៈពេល ៩០ថ្ងៃ ដោយកំណត់បន្ទាត់ពន្ធត្រឹម ១០ភាគរយស្មើគ្នា។
កាលពីថ្ងៃទី៣០ ខែមិថុនា ថ្មីៗនេះ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ក៏បានបង្ហាញការព្រួយបារម្ភពីផលប៉ះពាល់រយៈពេលវែង លើកម្មករជាង១លាននាក់ ក្នុងវិស័យកាត់ដេរ ហើយនិងប៉ះពាល់ដល់ការនាំចេញ និងកំណើនសេដ្ឋកិច្ច ប្រសិនបើការចរចាជាមួយតំណាងពាណិជ្ជកម្មអាមេរិក(USTR)គ្មានលទ្ធផលជាវិជ្ជមានទេនោះ។
ចំណែក ប្រធានក្រុមឃ្លាំមើលកម្ពុជា លោក ម៉ែន ណាត ក៏ធ្លាប់ផ្តល់ជាយោបល់ដែរថា ដើម្បីបញ្ចៀសពីការដំឡើងពន្ធខ្ពស់ពីសហរដ្ឋអាមេរិក មេដឹកនាំគ្រួសារហ៊ុនត្រូវបន្ទន់ឥរិយាបទស្តារប្រជាធិបតេយ្យ គោរពសិទ្ធិមនុស្ស ជាពិសេសលុបបំបាត់អំពើពុករលួយ និងបក្ខពួកនិយម។
លោកបន្តថា បើមេដឹកនាំគ្រួសារហ៊ុន នៅតែប្រកាន់ជំហរមិនព្រមស្តារប្រជាធិបតេយ្យ ហើយបន្តដឹកនាំប្រទេសតាមគោលនយោបាយប្រជាភិថុតរបស់ខ្លួន ដូចឳពុករបស់លោក ដើម្បីតែចង់សម្រេចមហិច្ឆតាក្តោបអំណាច នោះបញ្ជាក់កាន់តែច្បាស់ថា គ្រួសារហ៊ុនជាអ្នកធ្វើឱ្យពលរដ្ឋ ១៧លាននាក់ ក្លាយជាអ្នករងគ្រោះ៕
