ស្ត្រីដែលមានបញ្ហាដីធ្លីនៅតំបន់អន្ទង់អាំង ឬភ្នំ១៥០០ ខេត្តពោធិ៍សាត់ ព្រមានពីការធ្វើអត្តឃាតដោយចាក់សាំងដុតខ្លួនឯងជាមួយចៅ នៅមុខក្រសួងមហាផ្ទៃ ប្រសិនបើក្រសួងស្ថាប័នពាក់ព័ន្ធមិនដោះស្រាយបញ្ហាដីធ្លីជូនពួកគាត់ទេដោយយុត្តិធម៌ទេនោះ។
កាលពីអំឡុងពាក់កណ្តាលមីនា ឆ្នាំ២០២៥ អាជ្ញាធរខេត្តពោធិ៍សាត់ បានដាក់កម្លាំងចុះរុះរើផ្ទះប្រជាពលរដ្ឋជាង ២០គ្រួសារ ឱ្យរាបដល់ដី នៅចំណុចតំបន់អន្ទង់អាំង ឬភ្នំ១៥០០ ក្នុងឃុំអន្លង់រាប ក្នុងស្រុកវាលវែង ដោយអាជ្ញាធរចោទថាពលរដ្ឋទាំងនោះរស់នៅខុសច្បាប់លើដីតំបន់ការពារបៃតង។ មកដល់ពេលនេះ ប្រជាពលរដ្ឋដែលរងការបណ្តេញចេញ មានអ្នកខ្លះបានរត់ភៀសខ្លួនទៅកាន់តំបន់ផ្សេង និងខ្លះទៀតកំពុងប្រឈមមុខនឹងការចោទប្រកាន់តាមប្រព័ន្ធតុលាការ។
ស្របពេលមានបញ្ហាដីធ្លីនេះ ប្រជាពលរដ្ឋ និងអ្នកស្រី សែម សុខគា ដែលអះអាងថាមានដីស្របច្បាប់នៅតំបន់នោះ ក៏បានដាក់ញត្តិទៅក្រសួងមហាផ្ទៃ និងក្រសួងពាក់ព័ន្ធឱ្យជួយដោះស្រាយ និងទម្លាក់បទចោទជូនប្រជាពលរដ្ឋផងដែរ
អ្នកស្រី សែម សុខគា ដែលជាពលរដ្ឋរងគ្រោះម្នាក់ក្នុងបញ្ហាដីធ្លី ក្នុងចំណោមពលរដ្ឋទាំងជាង ២០គ្រួសារនោះ បានលើកឡើងក្នុងហ្វេសប៊ុករបស់អ្នកស្រីនៅថ្ងៃទី០៣ ខែកក្កដានេះថា ដីរបស់គ្រួសារអ្នកស្រីនៅតំបន់អន្ទង់អាំងនោះ មានប្លង់កម្មសិទ្ធិស្របច្បាប់ ដោយមានការវាស់វែងពីក្រុមនិស្សិតស្ម័គ្រចិត្តត្រឹមត្រូវ ប៉ុន្តែបែរជាអាជ្ញាធរមិនដោះស្រាយជូនគាត់ទៅវិញ។
អ្នកស្រីថា បើសិនជាមិនមានមន្ត្រីនៃក្រសួងស្ថាប័នពាក់ព័ន្ធណាអាចជួយដោះស្រាយបញ្ហាដីធ្លី ដែលអ្នកស្រី និងកូន កំពុងដាក់បញ្ចាំនៅធនាគារនោះទេ អ្នកស្រីអាចនឹងធ្វើអត្តឃាតចាក់សាំងដុតសម្លាប់ខ្លួនពីរនាក់ចៅ នៅមុខក្រសួងមហាផ្ទៃ។
អ្នកស្រី សែន សុខគា បានសរសេរក្នុងសំណេរដើមទៀតថា៖ «សូមសំណូមពរទៅដល់ឯកឧត្ដម និងមន្រ្តីរាជការទូទាំងប្រទេសកម្ពុជា គ្រប់ក្រសួងពាក់ព័ន្ធនឹងរឿងវិវាទដីធ្លីដែលមន្រ្តីរាជការធ្វើធំមួយចំនួន ដែលធ្វើបាបប្រជាជនទន់ខ្សោយរឿងវិវាទដីធ្លី សូមបញ្ឈប់ការប្លន់ដី ធ្វើបាបប្រជាជនដាក់គុកដើម្បីយកដី»។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យរងក្រសួងមហាផ្ទៃ លោក ទូច សុខៈ និងអ្នកនាំពាក្យក្រសួងយុត្តិធម៌ លោក សេង ឌីណា បានទេនៅថ្ងៃទី០៣ ខែកក្កដានេះ។
យ៉ាងណា កាលពីថ្ងៃទី៣០ ខែមិនា ក្រសួងយុត្តិធម៌ ធ្លាប់បានចេញសេចក្តីប្រកាសព័ត៌មាន ដោយគូសបញ្ជាក់ថា ទីតាំងដីដែល អ្នកស្រី សែម សុខគា កំពុងកាន់កាប់ហើយដែលអះអាងថា មានប្លង់រឹងនោះ គឺជារឿងមិនពិត ព្រោះថាដីនេះស្ថិតនៅក្នុងតំបន់សហគមន៍នៃតំបន់ការពារធម្មជាតិ (តំបន់អន្ទង់អាំង) ហើយនៅក្នុងតំបន់នេះ ពុំមានដីណាមួយមានវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង)នោះទេ។
បើទោះជាមានការអះអាងបែបនេះក្តី ប៉ុន្តែក្រុមប្រជាពលរដ្ឋដែលរងការបណ្តេញចេញ បានអះអាងថា ដីដែលពួកគាត់បានរស់នៅជាង១០ឆ្នាំមកហើយនេះ ពុំស្ថិតនៅក្នុងតំបន់ការពារបៃតងនោះទេ គឺពួកគាត់បានទិញដីបន្តពីក្រុមកងទ័ព កាលពីអំឡុងឆ្នាំ២០១០ ដល់ឆ្នាំ២០១៣ ដើម្បីសាងសង់ផ្ទះរស់នៅ និងអ្នកខ្លះបានសាង់សង់ជារីស៊ត ហើយការទិញលក់នោះ ក៏មានឯកសារត្រឹមត្រូវដែលទទួលស្គាល់ដោយអាជ្ញាធរមូលដ្ឋានផងដែរ តាំងពីក្រោមការដឹកនាំរបស់អភិបាលខេត្តចាស់ លោក ម៉ៅ ធនិន។
សម្រាប់មតិសង្គមស៊ីវិលវិញ លោក យិន ម៉េងលី អនុប្រធានសមាគមការពារសិទ្ធិមនុស្សអាដហុក ដែលធ្លាប់បានចុះអង្កេតករណីវិវាទដីធ្លីនេះដោយផ្ទាល់ មានប្រសាសន៍ថា បញ្ហាដែលពលរដ្ឋទាំង២៤គ្រួសារ បានតវ៉ាទាមទារដំណោះស្រាយមកដល់បច្ចុប្បន្ននេះ គឺជាប្រជាពលរដ្ឋដែលរស់នៅក្រៅតំបន់ការពារ ហើយការសំអាងរបស់ពលរដ្ឋទាំងនោះ គឺយោងទៅតាម សជណ របស់រដ្ឋាភិបាលលេខ ១១០១។
លោកបន្តថា ដើម្បីដោះស្រាយបញ្ហានេះឱ្យចំគោលដៅ ហើយកុំឱ្យពលរដ្ឋមានការតវ៉ា និងការដាក់ញត្តិនៅថ្នាក់ជាតិទៀតនោះ រដ្ឋបាលខេត្តគួរចេញមុខចរចាដោះស្រាយជាមួយពលរដ្ឋដែលរងគ្រោះទាំងនោះដោយផ្ទាល់ និងមិនត្រូវប្រើប្រាស់ប្រព័ន្ធតុលាការទៅដាក់សម្ពាធពលរដ្ឋបន្ថែមនោះទេ៕
