ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា ក្រុងវ៉ាស៊ីនតោន នឹងផ្ញើរលិខិតទៅបណ្តាប្រទេសនានា នៅថ្ងៃសុក្រម៉ោងនៅសហរដ្ឋអាមេរិក ដើម្បីបញ្ជាក់អំពីអត្រាពន្ធ ដែលពួកគេប្រឈមនឹងការនាំចូលទៅកាន់អាមេរិក ជាការផ្ទុយស្រលះពីការសន្យាកាលពីលើកមុនៗ ដែលថានឹងមានការចរចារកកិច្ចព្រមព្រៀងពាណិជ្ជកម្មដាច់ដោយឡែកពីគ្នាសំរាប់ប្រទេសនិមួយៗ។ នេះបើតាមប្រភពសារព័ត៌មាន នីគីអាស៊ី(Nikkie Asia)។
ប្រភពពីNikkie Asia ឱ្យដឹងនៅថ្ងៃទី០៤ ខែកក្កដា ឆ្នាំ២០២៥នេះថា ការទទួលស្គាល់ភាពស្មុគស្មាញនៃការចរចាជាមួយប្រជាជាតិជាង១៧០ប្រទេស លោក ត្រាំ បានប្រាប់ទៅអ្នកសារព័ត៌មានមុនពេលចាកចេញពី អាយអូវ៉ា(Iowa) កាលពីថ្ងៃព្រហស្បតិ៍ថា លិខិតនឹងផ្ញើរទៅកាន់១០ប្រទេសក្នុងពេលតែមួយ ដោយការដាក់ចេញអត្រាពន្ធពី២០ភាគរយ ទៅ ៣០ភាគរយ។
លោក ត្រាំ ថា៖ «យើងមានជាង១៧០ប្រទេស ហើយតើអ្នកអាចធ្វើការព្រមព្រាងបានប៉ុន្មាន? ពួកគេមានភាពស្មុគស្មាញណាស់»។
ប្រភពបន្តថា ប្រធានាធិបតីសាធារណៈរដ្ឋ និយាយថា គាត់រំពឹងថា និងមានការលម្អិតកិច្ចព្រមព្រៀង‘‘ ដៃគូ’’ ជាមួយប្រទេសដទៃទៀតបន្ទាប់ពីការប្រកាស កាលពីថ្ងៃពុធ អំពីកិច្ចព្រមព្រៀងពាណិជ្ជកម្មជាមួយវៀតណាម។ ទោះជាយ៉ាងណាក៏ដោយ លោកបាននិយាយថា លោកពេញចិត្តក្នុងការជូនដំណឹងទៅកាន់ប្រទេសដទៃទៀត អំពីអត្រាពន្ធដ៏ជាក់លាក់ ដោយរំលងការចរចាលម្អិត។
ប្រភពថា ការអត្ថាធិប្បាយរបស់លោក ត្រាំ បញ្ជាក់អំពីការប្រឈមនៃការបញ្ចប់កិច្ចព្រមព្រៀងលើអ្វីគ្រប់យ៉ាងចាប់ពីពន្ធគយ ដល់របាំងមិនមែនពន្ធគយ ដូចជា ការហាមឃាត់លើការនាំចូលកសិកម្មជាដើម។
ប្រភពបញ្ជាក់ថា ប្រទេសជាច្រើនដែលមានអត្រាពន្ធគយដំបូង ១០ភាគរយ នៅមិនទាន់មានការចរចាជាមួយនឹងរដ្ឋាភិបាល លោក ត្រាំ នៅឡើយទេ លើកលែងតែចក្រភពអង់គ្លេសមួយ ដែលឈានដល់កិច្ចព្រមព្រៀងក្នុងខែឧសភា ដើម្បីរក្សាអត្រាពន្ធ ១០ភាគរយ ហើយឈ្នះការអនុគ្រោះសម្រាប់វិស័យមួយចំនួន រួមទាំងរថយន្ត និងម៉ាស៊ីនយន្តហោះ៕
