ក្រសួងសុខាភិបាល ព្រមានពីការកើនឡើងនៃជំងឺគ្រុនឈាម ដែលថានឹងមានការកើនឡើងចាប់ពីខែក្រោយនេះទៅ ដែលអាជ្ញាធរពាក់ព័ន្ធនិងប្រជាពលរដ្ឋចាំបាច់ត្រូវអនុវត្តវិធានមួយចំនួន ដើម្បីពង្រឹងការឆ្លើយតបទៅនឹងការកើនឡើងជំងឺគ្រុនឈាម នៅក្នុងរដូវវស្សា ឆ្នាំ២០២៥នេះ។
នេះបើតាមសេចក្តីណែនាំក្រើនរំឭក ចុះថ្ងៃទី១០ ខែកក្កដានេះរបស់ក្រសួងសុខាភិបាល «ស្តីពីបន្តបុរេសកម្ម និងពង្រឹងការឆ្លើយតបនៅនឹងការកើនឡើងជំងឺគ្រុនឈាមនៅក្នុងរដូវវស្សា ឆ្នាំ២០២៥»។
បើតាមក្រសួង ក្នុងអំឡុងពេលរដូវវស្សានេះ ជំងឺគ្រុនឈាម មាននិន្នាការកើនឡើង ចាប់តាំងពីចុងខែមេសា ឆ្នាំ២០២៥ និងអាចបន្តកើនជាបន្តបន្ទាប់ ដោយសារមានកំណើនទឹកភ្លៀង។
កំណើនទឹកភ្លៀង នឹងបង្កឱ្យមានទឹកដក់ ដែលបង្កើតជាប្រភពដក់ទឹក និងជំរកសត្វមូសខ្លា ដែលការណ៍នេះអាជ្ញាធរគ្រប់ជាន់ថ្នាក់ រួមទាំងប្រជាពលរដ្ឋ ត្រូវចូលរួមទប់ស្កាត់ ការកកើតសត្វមូស។
វិធាននេះ ត្រូវកម្ចាត់ដង្កូវទឹក ព្រមទាំងអនុវត្តនូវវិធានការអន្តរាគមន៍ ប្រកបដោយភាពទទួលខុសត្រូវ ដើម្បីលុបបំបាត់ជម្រកមូសខ្លា ដែលជាភ្នាក់ងារចម្លងជំងឺគ្រុនឈាម។
លើសពីនេះ ប្រសិនបើមានរោគសញ្ញាគ្រុនក្តៅខ្លួនខ្លាំងភ្លាមៗ ចាប់ពី ៣៩ ទៅ ៤០អង្សាសេ សមាជិកគ្រួសារ ត្រូវប្រញាប់ទៅមន្ទីរពេទ្យ ដើម្បីស្វែងរកការប្រឹក្សាយោបល់ពីអ្នកជំនាញ ឬព្យាបាល៕
