ឧបនាយករដ្ឋមន្ត្រីចក្រភពអង់គ្លេស លោកស្រី អែនជែលឡា រាយន័រ (Angela Rayner) នៅថ្ងៃព្រហស្បតិ៍ ម្សិលមិញនេះ បានទម្លាយពីការចុះហត្ថលេខាលើកិច្ចព្រមព្រៀងផ្គត់ផ្គង់ម៉ីសីលការពារដែនអាកាសជាង ៥០០០គ្រាប់ ឱ្យទៅអ៊ុយក្រែន ដើម្បីទប់ទល់នឹងការឈ្លានពីមហាអំណាចរុស្ស៊ី ដែលបានអូសបន្លាយប្រមាណជា៣ឆ្នាំទៅនេះ។
រ៉យទ័រ (Reuters) បានរាយការណ៍នៅថ្ងៃទី១០ ខែកក្កដា ឆ្នាំ២០២៥នេះថា លោកស្រី រ៉ាយន័រ(Rayner) ត្រូវបានរំពឹងទុកថានឹងចុះហត្ថលេខាលើកិច្ចព្រមព្រៀងនៅក្រុងរ៉ូម ជាកន្លែងសន្និសីទមួយដែលសង្រ្គោះអ៊ុយក្រែន។ កិច្ចព្រមព្រៀងបានប្រកាសលើកទីមួយដោយនាយករដ្ឋមន្ត្រី គៀ ស្តាម៊រ(Keir Starmer) នៅថ្ងៃទី២ ខែមីនា។
រដ្ឋាភិបាលក៏បានបញ្ជាក់ជាថ្មីម្តងទៀតថា នឹងផ្គត់ផ្គង់ដល់ទៅ ២៨៣លានផោន ក្នុងទំនាក់ទំនងទ្វេភាគីជំនួយដល់អ៊ុយក្រែននៅឆ្នាំក្រោយ។
មន្ត្រីអ៊ុយក្រែនថា រុស្សីហាក់បីបន្ថែមការវាយលុករដ្ឋធានីរបស់ខ្លួនដោយម៉ីសីល និងដ្រូន ពេញមួយយប់ថ្ងៃពុធ ដែលឈានដល់ព្រឹកថ្ងៃព្រហស្បតិ៍ បណ្តាលឱ្យភ្លើងឆេះពាសពេញតំបន់ទូទាំងក្រុង និងបានសម្លាប់មនុស្សពីរនាក់ក្នុងមួយថ្ងៃ បន្ទាប់ពីការវាយប្រហារតាមអាកាសយ៉ាងធ្ងន់ធ្ងរបំផុតនៃសង្រ្គាមរយៈពេល ៣ឆ្នាំមកដល់ពេលនេះ។ នេះបើយោងតាមសេចក្តីរាយការណ៍ដោយអេភី(AP)។
ប្រភពអេភី(AP) រាយការណ៍នៅថ្ងៃទី១០ ខែកក្កដា ឆ្នាំ២០២៥ថា ប្រធានរដ្ឋបាលតំបន់គីវ (Kyiv) និយាយថា៖ «មនុស្សទាំងនេះត្រូវបានសម្លាប់ដោយជនជាតិរុស្សី។ នេះគឺជាការបាត់បង់ដ៏គួរឱ្យភ័យខ្លាច។ ខ្ញុំចូលរួមរំលែកទុក្ខទៅកាន់គ្រួសាររបស់ពួកគេ»។
កាលពីថ្ងៃព្រហស្បតិ៍ រុស្ស៊ី បានបើកការវាយលុកទៅលើទីក្រុងគីវ(Kyiv) ប្រទេសអ៊ុនក្រែន ជាទ្រង់ទ្រាយធំមិនធ្លាប់មាន ដែលគេមើលឃើញថា រុស្សីបានព្យាយាមគាបសង្កត់លើការការពារដែនអាកាសរបស់អ៊ុយក្រែនជាមួយនឹងការវាយប្រហារធំៗដែលរួមមានការកើនឡើងនៃចំនួនដ្រូន។
សេចក្តីរាយការណ៍នានា បញ្ជាក់ថា មនុស្សជាង ១ពាន់នាក់ រួមទាំងកុមារ ៧០នាក់ បានភៀសខ្លួនទៅទីនោះ កំឡុងពេលការវាយប្រហាររបស់រុស្សីកាន់តែកើនឡើង។
ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអង្គារថា លោកមានការអាក់អន់ស្រពោនចិត្តជាមួយនឹងប្រធានាធិបតីរុស្សី លោក វ្លាឌីមៀ ពូទីន ដែលមិនបានផ្អាកការបាញ់ប្រហារ និងទាមទារសន្តិភាព ចាប់តាំងពីលោកចូលកាន់តំណែងតាំងពីខែមករាឆ្នាំ២០២៥ និងបានជំរុញឱ្យមានដំណោះស្រាយមួយ៕
