សហរដ្ឋអាមេរិក ព្យាយាមទប់ស្កាត់ការអនុវត្តពាណិជ្ជកម្មចិន ដែលថាមិនយុត្តិធម៌និងរំលោភកាន់តែធ្ងន់ធ្ងរឡើងចាប់តាំងពីក្រុងប៉េកាំង បានចូលជាសមាជិកអង្គការពាណិជ្ជកម្មពិភពលោក(WTO)ក្នុងឆ្នាំ ២០០១។
ការណ៍នេះ ជាការឆ្លើយតប ប្រធានាធិបតី ដូណាល់ ត្រាំ បានដាក់ពន្ធគឺជាការរឹតបន្តឹងលើការនាំចេញរ៉ែកម្រទៅកាន់សហរដ្ឋអាមេរិក។ ព័ត៌មានរាយការណ៍ដោយអេស៊ាថាមស៍។
ASIA TIMES បានរាយការណ៍នៅថ្ងៃទី១០ ខែកក្កដា ឆ្នាំ២០២៥ នេះថា ការពឹងផ្អែកលើសាធារណៈរដ្ឋប្រជាមានិតចិនសម្រាប់លោហៈ និងរ៉ែកម្រ គឺជាថាមពលសំខាន់ និងហានិភ័យសន្តិសុខជាតិដល់សហរដ្ឋអាមេរិក ចក្រភពអង់គ្លេស និងប្រទេសដទៃទៀត។
ប្រភពបន្តថា ក្រុងប៉េកាំងមិនត្រឹមតែគ្រប់គ្រងផ្នែកដ៏ធំនៃខ្សែសង្វាក់តម្លៃ និងការផលិតសារធាតុរ៉ែសំខាន់ៗប៉ុណ្ណោះទេ ប៉ុន្តែសំខាន់ជាងនេះ ចិនគ្រប់គ្រងស្ទើរតែទាំងស្រុងនៃការចម្រាញ់និងកែច្នៃផ្នែកលោហៈ និងសារធាតុរ៉ែសំខាន់ៗ។ ចក្រភពអង់គ្លេស និងសហរដ្ឋអាមេរិក និងប្រទេសជឿនលឿនភាគច្រើនមិនចម្រាញ់និងកែច្នៃលោហៈ និងរ៉ែកម្រទេ។
ប្រភពបន្ថែមថា ចក្រភពអង់គ្លេស និងសហរដ្ឋអាមេរិក ពឹងផ្អែកទាំងស្រុងលើសាធារណៈរដ្ឋប្រជាមានិតចិនចំពោះកាល់ល្យូម(gallium)។ កាល់ល្យូម ត្រូវបានដាក់នៅក្រោមការរឹតបន្តឹងនាំចេញដោយសាធារណៈរដ្ឋប្រជាមានិតចិនក្នុងខែសីហា ឆ្នាំ២០២៣។ កាល់ល្យូមប្រើប្រាស់ជាឧបករណ៍អេឡិចត្រូនិកសម្រាប់បន្ទះស្រូបពន្លឺព្រះអាទិត្យ និងថ្ម ក្នុងចំណោមការប្រើប្រាស់ផ្សេងទៀត។
អ្នកនយោបាយ និងអ្នកដឹកនាំធុរៈកិច្ចមួយចំនួននៅក្នុងប្រទេសសេរី កំពុងផ្តើមគំនិតដើម្បីកាត់បន្ថយការពឹងផ្អែកទៅលើចិន ចំពោះសម្ភារៈទាំងនេះ។ ភាពជាដៃគូសន្តិសុខរ៉ែ គឺជាឧទាហរណ៍នៃបញ្ហានេះ ប៉ុន្តែត្រូវការខិតខំប្រឹងប្រែងកាន់តែខ្លាំងបន្ថែមទៀត ដើម្បីដោះស្រាយបញ្ហាលោហៈ និងរ៉ែសកល ដែលមិនមានតុល្យភាពនេះ។
លើសពីនេះ ប្រភពថា វិធីសាស្រ្តភ្លាមៗដែលរួមបញ្ចូលមិនត្រឹមតែប្រភពនៃលោហៈ និងសារធាតុរ៉ែប៉ុណ្ណោះទេ ប៉ុន្តែការចម្រាញ់ និងការកែច្នៃ គឺចាំបាច់ដើម្បីចាប់ផ្តើមធ្វើឱ្យមានតុល្យភាពទីផ្សារឡើងវិញ និងដកការគ្រប់គ្រងរបស់សាធារណៈរដ្ឋប្រជាមានិតចិននៃលោហៈនិងសារធាតុរ៉ែ និងផលិតផលសម្រេច។ ផលប៉ះពាល់នេះ គឺទូលំទូលាយណាស់ដែលពង្រីកដល់ការផលិតរថយន្តនិងយោធា។
ប្រភពបានគូសបញ្ជាក់ថា នៅក្នុងការចរចារវាងសហរដ្ឋអាមេរិកនិងចិន នៅក្នុងទីក្រុងឡុងនាពេលថ្មីៗនេះ សហរដ្ឋអាមេរិក បានទទួលស្គាល់ថា ចិនមានបំណងគ្រប់គ្រងលើវិទ្យាសាស្រ្ត និងបច្ចេកវិទ្យា ក្នុងការប្រណាំងប្រជែងដើម្បីក្លាយជាអនុត្តរភាពពិភពលោក នេះជាមូលហេតុដែលសហរដ្ឋអាមេរិកត្រូវតែព្យាយាមទប់ស្កាត់ការចូលប្រើរបស់ចិន ចំពោះបច្ចេកវិទ្យារសើប រួមទាំងបន្ទះឈីបកុំព្យូទ័រផងដែរ៕
