ប្រធានព្រឹទ្ធសភា លោក ហ៊ុន សែន ត្រូវបានគេរាយការណ៍ថា បានគំរាមវ៉ៃខ្នោះ សមាជិកព្រឹទ្ធសភាកូតាពីគណបក្សប្រឆាំង លោក គង់ មុនីកា និងលោក សេង ម៉ារ៉ាឌី ជុំវិញការបារម្ភ ការធ្វើច្បាប់ដកសញ្ជាតិពលរដ្ឋខ្មែរពីកំណើត ដែលរងការរិះគន់។
កាសែតក្នុងស្រុកជាច្រើន បានចុះផ្សាយថា ការគំរាមនេះធ្វើឡើងក្នុងកិច្ចប្រជុំព្រឹទ្ធសភា ស្តីពីការផ្តល់យោបល់លើច្បាប់ដកសញ្ជាតិខ្មែរ នាថ្ងៃទី១៤ ខែកក្កដានេះ ដោយ លោក ហ៊ុន សែន បានគំរាមវ៉ៃខ្នោះសមាជិកព្រឹទ្ធសភា លោក គង់ មុនីកា និងលោក សេង ម៉ារ៉ាឌី មកពីគណបក្សឆន្ទៈខ្មែរ។
បើតាមការចុះផ្សាយ ការដែល លោក ហ៊ុន សែន គំរាមនេះ សំដៅដល់សេចក្តីថ្លែងការណ៍របស់គណបក្សនេះកន្លងទៅ និងគំរាមដកអភ័យឯកសិទ្ធិទៀតផង។
យ៉ាងណា អ្នកនាំពាក្យប្រធានព្រឹទ្ធសភា លោក ជា ធិរិទ្ធ បានបដិសេធថា លោក ហ៊ុន សែន មិនបាននិយាយពីការវាយខ្លោះទេ តែបាននិយាយទូទៅចំពោះវិធានការលើអ្នកទាំងឡាយណា ដែលប្រព្រឹត្តទង្វើក្បត់ជាតិនេះ។
លោកថា៖ «អ្វីដែលលោកបានលើកឡើងនោះ គឺសំដៅដល់បុគ្គលមួយក្រុមតូចដែលនាំគ្នាប្រឆាំងនឹងការធ្វើវិសោធនកម្មធម្មនុញ្ញ ពាក់ព័ន្ធនឹងការដកសញ្ជាតិ ដែលពួកគេខ្លាចនាំគ្នាវាយប្រហារទៅលើវិសោធនកម្មនោះ។ ម្លោះហើយសម្តេចតេជោ លោកចង់សំដៅថា ប្រសិនបើបុគ្គលទាំងឡាយណាដែលមិនក្បត់ជាតិ អីចឹងវាអត់មានអីត្រូវប៉ះពាល់ទេ វាអត់មានអីត្រូវដកទេ។ ក៏ប៉ុន្តែផ្ទុយទៅវិញ បើបុគ្គលណា ដែលក្បត់នឹងប្រទេសជាតិខ្លួនទៅចូលដៃជាមួយបរទេសមកបំផ្លាញជាតិខ្លួន នោះសមល្មមនឹងការដកសញ្ជាតិចេញហើយ ហើយការលើកឡើងនោះ មិនចំពោះតែ លោក គង់ មុនីកា និង សេង ម៉ារ៉ាឌី អីទេគឺសំដៅទូទៅ ហើយមិនមែនជាការគំរាមទៀតសោធគឺជាការពន្យល់។ នរណាក៏ដោយប្រសិនបើក្បត់ជាតិខ្លួនហើយ បើនៅក្នុងប្រទេសត្រូវតែអនុវត្តតាមច្បាប់ពេលដែលច្បាប់សញ្ជាតិមាន ត្រូវដាក់ទោសពួកគាត់»។
យ៉ាងណា កាលពីថ្ងៃទី៥ ខែកក្កដា គណបក្សភ្លើងទៀន និងគណបក្សឆន្ទៈខ្មែរ បានចេញសេចក្តីថ្លែងការណ៍សម្តែងការព្រួយបារម្ភ និងមិនគាំទ្រចំពោះការផ្តួចផ្តើមគំនិតធ្វើវិសោធនកម្មមាត្រា៣៣ នៃរដ្ឋធម្មនុញ្ញកម្ពុជា។
លិខិតនោះ បញ្ជាក់ថា គណបក្សភ្លើងទៀន និងគណបក្សឆន្ទៈខ្មែរ យល់ឃើញថា ការធ្វើវិសោធនកម្មរដ្ឋធម្មនុញ្ញនេះ គឺប៉ះពាល់យ៉ាងធ្ងន់ធ្ងរដល់សិទ្ធិ និងសេរីភាពរបស់ប្រជាពលរដ្ឋខ្មែរគ្រប់រូប និងផ្ទុយពីស្មារតីដើមនៃរដ្ឋធម្មនុញ្ញឆ្នាំ១៩៩៣ ក៏ដូចជាផ្ទុយពីកាតព្វកិច្ចជាអន្តរជាតិទាំងឡាយ ដែលកម្ពុជាត្រូវអនុវត្តឱ្យបានខ្ជាប់ខ្ជួន រួមមាន សេចក្តីប្រកាសជាសកលស្តីពីសិទ្ធិមនុស្ស និងកតិកាសញ្ញា ស្តីពីសិទ្ធិស៊ីវិល និងសិទ្ធិនយោបាយ ដែលធានាថា គ្មាននរណាម្នាក់នឹងត្រូវដកហូតសញ្ជាតិតាមអំពើចិត្តឡើយ៕
