ទោះបីជា លោក កុក អាន បានចេញទៅក្រៅប្រទេសថៃហើយក្ដី ក៏ប៉ូលិសស៊ើបអង្កេតប្រឆាំងបទល្មើសបច្ចេកវិទ្យាថៃ នៅតែបន្តរកវិធីផ្សេងទៀត ដើម្បីចាប់បញ្ជូនម្ចាស់អាណាចក្របនល្បែងសញ្ជាតិខ្មែររូបនេះ យកមកកាត់ទោសនៅតុលាការថៃឱ្យទាល់តែបាន។ នេះជាការប្ដេជ្ញារបស់មេបញ្ជាការប៉ូលិសប្រឆាំងបទល្មើសបច្ចេកវិទ្យាថៃ លោក ត្រៃរ៉ុង ភាវផាន់។
ថ្លែងនៅក្នុងអង្គសន្និសីទសារព័ត៌មាន នៅថ្ងៃទី១៣ ខែកក្កដា លោក ត្រៃរ៉ុង ភាវផាន់ (Trirong Phiwpaen) បានលើកឡើងថា មកដល់ពេលនេះ ប៉ូលិសស៊ើបអង្កេតបានកំណត់អត្តសញ្ញាណជនសង្ស័យជាច្រើននាក់ ទាំងក្នុង និងក្រៅទឹកដីថៃ ដែលពាក់ព័ន្ធនឹងប្រតិបត្តិការឆបោកតាមអ៊ីនធឺណិត និងលាងលុយកខ្វក់ជាមួយនឹងលោក កុក អាន។ មន្រ្តីប៉ូលិសថៃរូបនេះ បន្តថា ក្រុមជំនាញនឹងពង្រីកការស៊ើបអង្កេតសំណុំរឿង លោក កុក អាន នេះបន្ថែមទៀត បន្ទាប់ពីរកឃើញប្រភពដែលបញ្ជាក់ថា លោក កុក អាន គឺជាប្រភពថវិកាធំ របស់លោក ហ៊ុន សែន ដែលជាប្រធានគណបក្សកាន់អំណាចរបស់កម្ពុជា។
ជាមួយគ្នានេះ លោក ត្រៃរ៉ុង ភាវផាន់ បានបញ្ជាក់ថា អាជ្ញាធរថៃ បានបញ្ជូនករណីនេះទៅកាន់ប៉ូលិសអាំងទ័រប៉ូល រួចរាល់ហើយ ហើយស្ថាប័នអន្តរជាតិមួយនេះ ក៏បានចេញនិវេទក្រហមដើម្បីតាមចាប់ខ្លួន លោក កុក អាន ផងដែរ។ បច្ចុប្បន្ន រូបថតលោក កុក អាន ត្រូវបានប៉ូលីសថៃព្រីនបិទតាមច្រកព្រំដែន និងស្ថានីយប៉ូលីសអន្តោប្រវេសន៍ ប្រកាសពីការតាមចាប់ខ្លួន។
ក្រៅពីសំណុំរឿងឧក្រិដ្ឋកម្មឆបោកតាមអ៊ីនធឺណិតរបស់ លោក កុក អាន ហើយនោះ ប៉ូលិសប្រឆាំងបទល្មើសបច្ចេកវិទ្យារបស់ថៃ កំពុងស៊ើបអង្កេតករណីធ្វើឱ្យបែកធ្លាយសំឡេងសន្ទនារបស់លោកស្រី ផែថងថាន និងលោក ហ៊ុន សែន មួយផ្សេងទៀត ហើយដែលករណីនេះ នឹងត្រូវបញ្ជូនទៅកាន់អយ្យការ ដើម្បីស៊ើបអង្កេត នៅសប្តាហ៍ក្រោយនេះ។
កាលពីថ្ងៃទី៨ ខែកក្កដា ប៉ូលិសថៃ បានឆ្មក់ចូលឆែកឆេរទីតាំងផ្ទះ ១៩កន្លែង ដែលជាកម្មសិទ្ធិរបស់លោក កុក អាន ក្នុងខេត្តសាមុតប្រាកាន និងឈុនបុរី ក្បែរទីក្រុងបាងកក ប្រទេសថៃ ដោយបានធ្វើការរឹបអូសឡានទំនើបជាច្រើនគ្រឿង និងលុយជាង ៨៣ម៉ឺនដុល្លារអាមេរិក។ តុលាការព្រហ្មទណ្ឌថៃ បានចេញដីកាចាប់ខ្លួនឧកញ៉ាសញ្ជាតិខ្មែររូបនេះថា ជាអ្នកនៅពីក្រោយករណីឆបោកពលរដ្ឋថៃ ក្នុងរូបភាពឧក្រិដ្ឋកម្មឆបោកតាមអ៊ីនធឺណិត លាងលុយកខ្វក់ និងចាប់ជំរិត ដែលបានប្រព្រឹត្តិនៅក្នុងទីតាំងនៅក្នុងកាស៊ីណូរបស់លោក ឈ្មោះ Golden Crown Casino នៅក្រុងប៉ោយប៉ែត ខេត្តបន្ទាយមានជ័យ ប្រទេសកម្ពុជា។
យ៉ាងណាក៏ដោយ ក្នុងពេលប៉ូលិសថៃចុះប្រតិបត្តិការឆែកឆេរនេះ លោក កុក អាន និងកូនស្រីម្នាក់ ដែលមានសញ្ជាតិថៃ មិនបានស្ថិតនៅទីតាំងទាំងអស់នោះទេ ដោយពួកគេបានចេញពីប្រទេសថៃ តាំងពីកម្ពុជា និងថៃ មានជម្លោះរឿងព្រំដែននៅតំបន់មុំបីមកម្ល៉េះ។ តែយ៉ាណា ប៉ូលិសថៃបានចាប់ខ្លួនជនសង្ស័យ ដែលភាគច្រើនជាជនជាតិចិន បានជាច្រើននាក់ ដែលពួកគេទាំងនោះត្រូវបានអាជ្ញាធរថៃរកឃើញថា ជាមេក្លោងឧក្រិដ្ឋជនឆបោកតាមអ៊ីនធឺណិត ដែលស្និទ្ធនឹងលោក កុក អាន។
កាសែតថៃរាយការណ៍ថា ប្រតិបត្តិការឆែកឆេរនេះ គឺជាបញ្ជារបស់អតីតនាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ នៅមុនលោកស្រីត្រូវតុលាការព្យួរតំណែង ដោយសារការបែកធ្លាយសំឡេងសន្ទនាតាមទូរស័ព្ទ រឿងជម្លោះព្រំដែនជាមួយ លោក ហ៊ុន សែន។ នៅមុនតុលាការព្យួរតំណែង លោកស្រីបានឆ្លៀតចេញបញ្ជាឱ្យអាជ្ញាធរ សហការគ្នាជាមួយតុលាការព្រហ្មទណ្ឌថៃ រៀបចំដីកា ដើម្បីចុះឆែកឆេរទីតាំងដែលជាកម្មសិទ្ធិរបស់លោក កុក អាន នៅលើទឹកដីថៃ។
អតីតតំណាងរាស្រ្តគណបក្សសង្គ្រោះជាតិ លោក អ៊ុំ សំអាន ប្រាប់ វីអូឌី នៅថ្ងៃទី១៤ ខែកក្កដាថា ករណីស្វែងរកចាប់ខ្លួនលោក កុក អាន របស់អាជ្ញាធរថៃនេះ គឺជាការអនុវត្តច្បាប់ ដោយបង្កប់នូវគំនុំនយោបាយ ដោយលោកបញ្ជាក់ថា ប្រសិនបើលោក ថាក់ស៊ីន មិនបែកបាក់ជាមួយ លោក ហ៊ុន សែន នោះទេ ប៉ូលិសថៃ នឹងមិនអាចចេញដីកាចាប់ខ្លួន លោក កុក អាន ឡើយ ព្រោះលោក កុក អាន ត្រូវបានការពារដោយលោក ហ៊ុន សែន ដែលមានទំនាក់ទំនងជិតស្និទ្ធជាមួយ លោក ថាក់ស៊ីន ជាយូរមកហើយ។
លោក អ៊ុំ សំអាន ថ្លែងថា៖ «ដើម្បីដោះស្រាយបញ្ហានេះ ជាជាងការប្រកែក រដ្ឋាភិបាលកម្ពុជាត្រូវបើកការស៊ើបអង្កេតបញ្ហារឿងនេះ ដោយសហការជាមួយប៉ូលិសអន្តរជាតិ ហើយតុលាការកម្ពុជា ត្រូវដំណើរការរឿងនេះដោយឯករាជ្យ នោះទើបទទួលបានទំនុកចិត្តពីសហគមន៍អន្តរជាតិ»។
ជុំវិញការចោទប្រកាន់របស់តុលាការថៃនេះដែរ ប្រធានព្រឹទ្ធសភាកម្ពុជា លោក ហ៊ុន សែន បានសរសេរនៅលើបណ្ដាញសង្គមហ្វេសប៊ុក នៅថ្ងៃទី១៣ ខែកក្កដា ដោយអះអាងថា មេឧក្រិដ្ឋជនឆបោកអនឡាញនៅពាសពេញប្រទេសថៃ ហើយទីក្រុងបាងកក ជាសំបុកនៃពួកឧក្រិដ្ឋជនឆបោកខុសច្បាប់ និងលាងលុយកខ្វក់ទាំងនោះ។
លោក ហ៊ុន សែន បានអះអាងទៀតថា ក្រុមឧក្រិដ្ឋជនទាំងនេះ បានរីករាលហៀរចេញពីថៃ ចូលមកកម្ពុជា គឺដូចទៅនឹងការលើកឡើងរបស់ លោក ថាក់ស៊ីន ស៊ីណាវ៉ាត់ ថា ឧក្រិដ្ឋជនធំៗ ដែលឆបោកតាមអនឡាញ កំពុងស្នាក់នៅអាផាតមិនថ្លៃៗរាប់ពាន់លានបាត នៅទីក្រុងបាងកក និងបានធ្វើដំណើរដោយសេរី ចេញចូលប្រទេសក្បែរខាង។
ជាមួយគ្នានេះ មេបក្សកាន់អំណាច លោក ហ៊ុន សែន បានស្នើឱ្យអន្តរជាតិ ក៏ដូចមេដឹកនាំអាស៊ាន កុំចោទប្រកាន់មកលើកម្ពុជា ថាជាអាណាចក្រឧក្រិដ្ឋកម្មឆបោកតាមអនឡាញទៀត ដោយលោកបានអះអាងថា កម្ពុជា គឺជាជនរងគ្រោះដោយសារថៃ ដែលលោកចោទថា គឺជាសម្បុកធំរបស់ក្រុមឧក្រិដ្ឋជន។
ទោះជាបែបនេះក្ដី ការលើកឡើងរបស់លោក ហ៊ុន សែន នេះ ហាក់គ្មានភាពច្បាស់លាស់ និងប្រាកដប្រជានោះឡើយ ដោយម្ដងលោកបានទទួលស្គាល់នូវបទឧក្រិដ្ឋរបស់ លោក កុក អាន ម្ដងលោកថ្លែងការពារ និងចោទបញ្ច្រាសទៅភាគីថៃវិញ។
យ៉ាងណាក៏ដោយចុះ ប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស (Norway) លោក ម៉ែន ណាត យល់ឃើញថា ការចោទបញ្ច្រាសរបស់លោក ហ៊ុន សែន នឹងធ្វើឱ្យកម្ពុជាកាន់តែខ្មាស់គេថែមទៀត ព្រោះការចោទប្រកាន់របស់តុលាការព្រហ្មទណ្ឌថៃ មានភាពគ្នាទៅនឹងរបាយការណ៍របស់អង្គការអន្តរជាតិ ដែលបានរកឃើញពីប្រតិបត្តិការឧស្សាហកម្មឆបោតតាមអ៊ីនធឺណិត ជាលក្ខណៈទ្រង់ទ្រាយធំ នៅលើទឹកដីកម្ពុជា និងមានជាប់ពាក់ព័ន្ធនឹងក្រុមមេដឹកនាំកម្ពុជាថែមទៀតផង។
លោកថា៖ «គេមិនជឿ លោក ហ៊ុន សែន ទេ ព្រោះកម្ពុជាសព្វថ្ងៃត្រូវបានគេមើលឃើញថា ពោរពេញដោយអំពើពុករលួយ និងបក្ខពួកនិយម ហើយមិនមែនមានតែលោក កុក អាន ម្នាក់នោះទេ សូម្បីលោក លី យ៉ុងផាត់ ក៏ជាប់ពាក់ព័ន្ធក្នុងរឿងនេះដែរ ដែលថ្មីៗនេះ អាមេរិកគេបានដាក់ក្នុងបញ្ជីខ្មៅ សូម្បីក្រុមហ៊ុន «ហួយវ័ន ផេ» (Huione Pay) របស់លោក ហ៊ុន តូ ក៏ស្ថិតនៅក្នុងបញ្ជីខ្មៅរបស់អាមេរិកដែរ។ អ៊ីចឹងការអះអាងរបស់លោក ហ៊ុន សែន ដែលចង់ការពារមនុស្សរបស់ខ្លួន មិនមានប្រសិទ្ធភាពខាងផ្លូវច្បាប់នោះទេ»។
ងាកមកសំណុំរឿងរបស់លោក កុក អាន វិញ ទោះបីជាប៉ូលិសអាំងទ័រប៉ូល បានចេញនិវេទក្រហមឱ្យចាប់ខ្លួនលោក កុក អាន ក្ដី ក៏ដីកាមួយនេះ នឹងមិនអាចធ្វើអ្វីលោក កុក អាន បាននោះទេ ព្រោះកន្លងមក ប៉ូលិសអាំងទ័រប៉ូល ក៏ធ្លាប់ចេញនិវេទក្រហមឱ្យចាប់បញ្ជូនខ្លួនជនសង្ស័យខ្មែរពីរនាក់ ដែលជាមនុស្សរបស់គណបក្សប្រជាជនកម្ពុជា ក្នុងករណីឃាតកម្មលើអតីតតំណាងរាស្រ្តគណបក្សសង្គ្រោះជាតិ លោក លិម គិមយ៉ា នៅកណ្ដាលទីក្រុងបាងកកផងដែរ ប៉ុន្តែរដ្ឋាភិបាលកម្ពុជា មិនបានចាប់បញ្ជូនខ្លួនជនសង្ស័យទាំងពីរនេះ ទៅឱ្យអាជ្ញាធរថៃ ដំណើរការរឿងក្ដីនោះឡើយ។
យ៉ាងណាមិញ ករណីលោក កុក អាន នេះក៏អាចនឹងមិនខុសគ្នាដែរ ព្រោះលោក កុក អាន នេះហើយគឺជាមនុស្សម្នាក់ក្នុងចំណោមមនុស្ស១០នាក់ ដែលថៃកំណត់មុខសញ្ញាថាជាកាបូបលុយរបស់គណបក្សប្រជាជនកម្ពុជា និងគ្រួសារមេដឹកនាំ ក្នុងរូបភាពការធ្វើអំណោយមនុស្សធម៌ និងបរិច្ចាគជួយបក្សជាដើម ដែលបញ្ជាក់ថា រដ្ឋាភិបាលបក្សកាន់អំណាច គ្មានហេតុផលអ្វីត្រូវចាប់អ្នកកាន់លុយដុំរបស់ខ្លួន ទៅឱ្យគូបដិបក្ខនោះឡើយ។
ម្យ៉ាងវិញទៀត ក្នុងករណីដែលកម្ពុជា ហ៊ានចាប់បញ្ជូនខ្លួនលោក កុក អាន ទៅឱ្យអាជ្ញាធរថៃមែននោះ នឹងធ្វើឱ្យរង្គោះរង្គើដល់ផ្ទៃក្នុងគណបក្សប្រជាជនកម្ពុជា និងគ្រួសារត្រកូលហ៊ុន ព្រោះក្រៅពីលោក កុក អាន នៅមានអ្នកនៅជុំវិញលោក ហ៊ុន សែន ផ្សេងទៀត ត្រូវបានអង្គការអន្តរជាតិ រកឃើញថា មានជាប់ពាក់ព័ន្ធនៅក្នុងឧក្រិដ្ឋកម្មឆបោកដូចគ្នាដែរ រួមមាន លោក លី យ៉ុងផាត់ ក្មួយបង្កើត លោក ហ៊ុន សែន គឺលោក ហ៊ុន តូ និងនាយទាហានជាន់ខ្ពស់មួយចំនួនទៀត៕
