ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា នឹងអនុវត្តពន្ធបន្ទាប់បន្សំលើរុស្ស៊ីយ៉ាងធ្ងន់ធ្ងរ ១០០ភាគរយ ប្រសិនបើមិនមានកិច្ចព្រមព្រៀងបទឈប់បាញ់ រវាងរុស្សីនិងអ៊ុយក្រែន ក្នុងរយៈពេល ៥០ថ្ងៃទេនោះ។
បើយោងតាម BBC រាយការណ៍នៅថ្ងៃទី១៤ ខែកក្កដា ឆ្នាំ២០២៥នេះ ឱ្យដឹងថា ការប្រកាសនេះ បានធ្វើឡើងកំឡុងពេលជំនួបប្រជុំរវាងអគ្គលេខាធិការអង្គការណាតូ លោក ម៉ាក្សរូត និងប្រធានាធិបតីសហរដ្ឋអាមេរិក លោក ដូណាល់ ត្រាំ នៅក្នុងសេតវិមាន។
លោក រូត នឹងស្ថិតនៅក្រុងវ៉ាស៊ីនតោន នៅថ្ងៃចន្ទ និងថ្ងៃអង្គារ គ្រោងនឹងជជែកពិភាក្សាជាមួយ លោក ត្រាំ និងរដ្ឋលេខាធិការ Marco Rubio(ម៉ាកូ រូប៊ីអូ) និងរដ្ឋមន្ត្រីការពារជាតិ Pete Hegseth (ភីក ហេកសែត) ព្រមទាំងសមាជិកសភា។
ដំណើរទស្សនៈកិច្ចរបស់ លោក រូត កើតឡើងបន្ទាប់ពី លោក ត្រាំ បានចំអកកាលពីសប្តាហ៍មុនថា លោកនឹងធ្វើ “សេចក្តីថ្លែងការណ៍សំខាន់” លើប្រទេសរុស្ស៊ី នៅថ្ងៃចន្ទ និងខណៈដែលអ៊ុយក្រែនកំពុងតស៊ូដើម្បីទប់ទល់នឹងការវាយប្រហារតាមអាកាសដ៏ធំ និងស្មុគស្មាញដែលបានចាប់ផ្តើមដោយកងកម្លាំងរុស្ស៊ី។
យ៉ាងណា ប្រភពថា លោក ត្រាំ បានបដិសេធមិនផ្តល់ព័ត៌មានលំអិតបន្ថែម លើការប្រកាសនៅថ្ងៃខាងមុខនេះទេ។
គួររំឭកថា កាលពីថ្ងៃសុក្រ លោក រ៉ូប៊ីអូ បាននិយាយថា អាវុធមួយចំនួនដែលផលិតដោយសហរដ្ឋអាមេរិកដែលអ៊ុយក្រែន កំពុងស្វែងរកត្រូវបានដាក់ពង្រាយជាមួយសម្ព័ន្ធមិត្តនៅអឺរ៉ុប។ លោក រ៉ូប៊ីអូ បន្តថា សព្វាវុធទាំងនោះអាចនឹងផ្ញើទៅអ៊ុយក្រែនឆាប់ៗ ដោយប្រទេសនៅក្នុងអ៊ឺរុបទិញជំនួសពីសហរដ្ឋអាមេរិក។
លោក ត្រាំ ក៏បានប្រឈមនឹងការអំពាវនាវពីគណបក្សសាធារណរដ្ឋ និងគណបក្សប្រជាធិបតេយ្យ ក៏ដូចជាសម្ព័ន្ធមិត្តអឺរ៉ុប ឱ្យគាំទ្រច្បាប់ក្នុងព្រឹទ្ធសភា ដែលមានចែងក្នុងគោលបំណងធ្វើឱ្យប្រេងរបស់រុស្ស៊ីចុះខ្សោយនិងវាយលុកទីក្រុងមូស្កូ ដោយដាក់ទណ្ឌកម្មដោយសហរដ្ឋអាមេរិក ចំពោះការលុកលុយជាបន្តបន្ទាប់ទៅលើអ៊ុយក្រែន៕
