ប្រទេសជាច្រើននៅអឺរ៉ុប និយាយកាលពីថ្ងៃអង្គារថា ពួកគេនឹងទិញសព្វាវុធពីសហរដ្ឋអាមេរិក ឱ្យទៅអ៊ុយក្រែនក្រោមគ្រោងដែលប្រកាសដោយប្រធានាធិបតីសហរដ្ឋអាមេរិក លោក ដូណាល់ ត្រាំ ប្រឆាំងទៅនឹងការឈ្លានពានពីរុស្ស៊ី បើទោះបីជាការរៀបចំមិនទាន់ដំណើរការក៏ដោយ។ នេះបើតាមប្រភពពីរ៉យទ័រ។
រ៉យទ័រ រាយកាណ៍នៅថ្ងៃទី១៥ ខែកក្កដាថា លោក ត្រាំ និយាយនៅទីក្រុងវ៉ាស៊ីនតោនថា នឹងផ្គត់ផ្គង់ប្រព័ន្ធការពារដែនអាកាស មីស៊ីល និងសព្វាវុធផ្សេងទៀត ដល់អ៊ុយក្រែនសម្រាប់ប្រឆាំងសង្រ្គាម និងការពារឈ្លានពានរបស់រុស្ស៊ី ហើយអាវុធនឹងត្រូវចំណាយដោយប្រទេសណាតូផ្សេងទៀត។
ប៉ុន្តែប្រភពមិនទាន់បានលម្អិតទេ ពីចំនួន និងប្រភេទសព្វាវុធជាក់លាក់ ដែលត្រូវផ្តល់ឲ្យទៅអ៊ុយក្រែន និងមួយវិញទៀតថា តើពួកគេនឹងត្រូវផ្គត់ផ្គង់លឿនប៉ុណ្ណា និងត្រូវចំណាយប្រាក់ប៉ុន្មាននោះនៅឡើយ?។
តែយ៉ាងណា មន្ត្រីសហរដ្ឋអាមេរិក បានស្នើថា បណ្តាប្រទេសនៅអឺរ៉ុបសុខចិត្តលះបង់ស្តុកអាវុធផ្ទាល់ខ្លួនមួយចំនួន សម្រាប់អ៊ុយក្រែន និងទិញជំនួសពីសហរដ្ឋអាមេរិក។
ទង្វើបែបនេះ អាចនឹងឱ្យអ៊ុយក្រែនទទួលបានអាវុធកាន់តែលឿនជាងមុន ប៉ុន្តែនឹងធ្វើឱ្យប្រទេសម្ចាស់ជំនួយងាយរងគ្រោះ រហូតដល់ប្រព័ន្ធថ្មីរៀបចំរួចរាល់។
ការជជែកជាមួយ លោក ត្រាំ នៅសេតវិមាន កាលថ្ងៃចន្ទ ប្រធានអង្គការណាតូ លោក រូត បាននិយាយថា ប្រទេសអាល្លឺម៉ង់ ហ្វីនលែន ដែនណឺម៉ាក ណ័រវ៉េ ចក្រភពអង់គ្លេស នេតាលែន និងកាណាដា ចង់ក្លាយជាផ្នែកមួយនៃការផ្តើមគំនិតនេះ ប្រទេសជាច្រើនក្នុងចំណោមប្រទេសទាំងនោះ ស្ថិតក្នុងចំណោមអ្នកផ្តល់ជំនួយយោធាដ៏ធំបំផុត ដល់អ៊ុយក្រែន មិនថាជារួម ឬសម្រាប់មនុស្សម្នាក់ៗក៏ដោយ។
លើសពីនេះ រដ្ឋមន្ត្រីអឺរ៉ុប បាននិយាយថា ឥឡូវពួកគេកំពុងសំឡឹងមើលថាតើការទិញអាវុធថ្មីរបស់អាមេរិកអាចត្រូវបង់យ៉ាងដូចម្តេច ក្នុងករណីជាច្រើន វាទំនងជាពាក់ព័ន្ធនឹងបណ្តាប្រទេសដែលសហការគ្នាទិញប្រព័ន្ធសព្វាវុធរបស់សហរដ្ឋអាមេរិក៕
