មេដឹកនាំកម្ពុជា លោក ហ៊ុន ម៉ាណែត ទទួលស្គាល់ថា កម្ពុជាមានជនបរទេសប្រព្រឹត្តិអំពើឆបោកតាមអនឡាញ និងបានប្រកាសយុទ្ធនាការបង្រ្កាបនៅទូទាំងប្រទេស ខណៈមានការចោទប្រកាន់ពីសហគមន៍អន្តរជាតិ រួមទាំងប្រទេសថៃផងថា មេឧក្រិដ្ឋជនសុទ្ធតែជាមនុស្សស្និទ្ធិគ្រួសារហ៊ុន។
បើតាមលិខិតកម្រាស់២ទំព័រ ចុះថ្ងៃទី១៤ ខែកក្កដា ឆ្នាំ២០២៥ លោក ហ៊ុន ម៉ាណែត ទទួលស្គាល់ថា ក្រុមឧក្រិដ្ឋជនបរទេសបានជ្រៀតចូលធ្វើសកម្មភាពឆបោកតាមប្រព័ន្ធអនឡាញលើទឹកដីកម្ពុជា ដែលកំពុងគំរាមកំហែងដល់សន្តិសុខក្នុងពិភពលោក និងតំបន់។
ក្នុងន័យនេះ លោកបញ្ជាឱ្យគ្រប់ក្រសួងស្ថាប័នទាំងអស់ រួមទាំងអភិបាល-រាជធានីខេត្ត ចូលរួមយុទ្ធនាការបង្រ្កាបអំពើឆបោកតាមប្រព័ន្ធបច្ចេកវិទ្យានៅទូទាំងប្រទេសកម្ពុជា ឱ្យមានប្រសិទ្ធិភាព។
បើតាម លោក ហ៊ុន ម៉ាណែត ការមិនអនុវត្តតាមបទបញ្ជា ឬមិនសហការអនុវត្ត មន្រ្តីទាំងនោះ នឹងអាចប្រឈមការដកមុខតំណែងចោលដោយគ្មានការលើកលែង។
បទបញ្ជារបស់មេដឹកនាំកម្ពុជានៅពេលនេះ ចំពេលប្រទេសថៃប្រកាសចាប់ខ្លួនមនុស្សជំនិតលោក ហ៊ុន សែន គឺឧកញ៉ា កុក អាន រួមទាំងកូនៗបីនាក់របស់លោក ក្រោយរកឃើញថាចូលរួមក្នុងឧក្រិដ្ឋកម្មឆ្លងដែន និងការលាងលុយកខ្វក់។
ជុំវិញរឿងនេះ អតីតនាយខុទ្ទការល័យគណបក្សសង្គ្រោះជាតិ លោក មុត ចន្ថា យល់ថា មេឧក្រិដ្ឋជននៅកម្ពុជាអាចរស់នៅរួចផុតពីសំណាញ់ច្បាប់បាន ព្រោះពួកគេជាអ្នកជួយរកលុយចិញ្ចឹមអំណាចគ្រួសារហ៊ុន។
ក្នុងន័យនេះ លោកថា បើលោក ហ៊ុន ម៉ាណែត ចង់បង្ក្រាបពួកឧក្រិដ្ឋជនមែន អ្នកដែលត្រូវស៊ើបអង្កេតមុនគេ គឺឧកញ៉ា កុក អាន រួមទាំង ឧកញ៉ា លី យ៉ុងផាត់ ផងដែលពួកគេសុទ្ធតែជាប់ឈ្មោះជាមេខ្លោងឧក្រិដ្ឋជនឆបោកដែលអន្តរជាតិរកឃើញជាបន្តបន្ទាប់។
លោកថា៖ «លោក កុក អាន និងកូនប្រុស កូនស្រី កំពុងតែលាក់ខ្លួននៅភ្នំពេញ! ចាប់ទៅ ចាប់មេខ្លោងឧក្រិដ្ឋជន និងកូនៗជាបណ្ដាញឧក្រិដ្ឋជនឆបោកអនឡាញ! កាត់ទោសនៅក្នុងស្រុកខ្មែរទៅ មិនបាច់ធ្វើបត្យាប័នទៅប្រទេសថៃទេ ពីព្រោះគេបានរកឃើញហើយហើយ។ មួយវិញទៀត ករណីលោក លី យ៉ុងផាត់ ដែលគេហៅថាស្ដេចកោះកុងក៏ជាប់ទណ្ឌកម្មរបស់សហរដ្ឋអាមេរិក កាលពីខែកញ្ញា ឆ្នាំ២០២៤ដែរ នៅក្នុងរឿងប្រហាក់ប្រហែលគ្នាហ្នឹង គឺការជួញដូរមនុស្សដោយបង្ខំលើរាងកាយ បង្ខំធ្វើទារុណកម្ម ពលកម្មដោយបង្ខំ និងការរំលោភសិទ្ធិមនុស្សធ្ងន់ធ្ងរ»។
បន្ថែមលើនេះ លោក មុត ចន្ថា បានចង្អុលបង្ហាញពីគ្រោះថ្នាក់ធ្ងន់ធ្ងរដល់កម្ពុជា និងការគំរាមកំហែងដល់តំបន់ និងពិភពលោក បើលោក ហ៊ុន សែន បន្តប្រមូលពួកឧក្រិដ្ឋជនឱ្យមកជួយចិញ្ចឹមអំណាចរបស់ខ្លួនបែបនេះ។
លោកថា៖ «កាលណាប្រទេសមួយដែលហ៊ុមព័ទ្ធទៅដោយឧក្រិដ្ឋជន ដែលគេត្រូវបានកំណត់មុខសញ្ញាជាឧក្រិដ្ឋជនធំទាំងការជួញដូរមនុស្ស ទាំងការឆបោកតាមប្រព័ន្ធអន្តរបណ្តាញបែបនេះ ធ្វើឲ្យប្រទេសជាតិនេះ មិនមានលទ្ធិប្រជាធិបតេយ្យ មិនមានសេរីភាពទេ ពីព្រោះគេប្រើប្រាស់យន្តការទាំងអស់នេះ ដើម្បីបំបិទសំឡេងរិះគន់ បំបិទសំឡេងប្រឆាំងដូចមេដឹកនាំ លោក ហ៊ុន សែន និយាយថា ចេញមួយវ៉ៃមួយការតាមប្រមាញ់ ការតាមបង្ក្រាបការកម្ទេចគណបក្សប្រឆាំងនៅមូលដ្ឋានជាដើមហ្នឹង នេះហើយគឺជាប្រទេសគួរតែដើរឆ្ងាយពីគន្លងប្រជាធិបតេយ្យ»។
សារព័ត៌មានក្នុងស្រុកថៃ Khaosod English ចុះផ្សាយនៅថ្ងៃទី១៥ ខែកក្កដាថា ប៉ូលីសថៃបានឆ្មក់ចូលវីឡាមួយកន្លែងទៀត ក្នុងទីក្រុងបាងកក ក្នុងនោះកូនប្រុស និងកូនស្រីរបស់លោក កុក អាន ត្រូវបានប៉ូលីសថៃកំណត់មុខសញ្ញាជាបណ្តាញឧក្រិដ្ឋកម្មអនឡាញ។
ក្រុមប៉ូលិសថៃ បានបំបែកសំបុកមេខ្លោងឧក្រិដ្ឋជនអនឡាញ ដែលជាប់ពាក់ព័ន្ធនឹងលោក កុក អាន សរុបចំនួន២៦ទីតាំងហើយនៅទូទាំងប្រទេសថៃ។
ជុំវិញការចោទប្រកាន់នេះ ប្រធានព្រឹទ្ធសភាកម្ពុជា លោក ហ៊ុន សែន បានឆ្លើយតបនៅលើហ្វេសប៊ុកលោកថា មេឧក្រិដ្ឋជនឆបោកអនឡាញនៅពាសពេញប្រទេសថៃ ហើយទីក្រុងបាងកក ជាសំបុកនៃពួកឧក្រិដ្ឋជនឆបោកខុសច្បាប់ និងលាងលុយកខ្វក់ទាំងនោះ។
លោក ហ៊ុន សែន ក៏បានស្នើឱ្យអន្តរជាតិក៏ដូចមេដឹកនាំអាស៊ាន កុំចោទប្រកាន់មកលើកម្ពុជា ថាជាអាណាចក្រឧក្រិដ្ឋកម្មឆបោកតាមអនឡាញទៀត ដោយថា កម្ពុជា គឺជាជនរងគ្រោះដោយសារប្រទេសថៃទៅវិញទេ។
ជុំវិញរឿងនេះដែរ អ្នកឃ្លាំមើលសង្គម លោក វ៉ន ចាន់ឡូត បញ្ចេញមតិលើហ្វេសប៊ុកលោកថា លោក លី យ៉ុងផាត់ លោក កុក អាន និង លោក ហ៊ុន តូ សុទ្ធតែបុគ្គលល្បីៗលើឆាកអន្ដរជាតិ ជាមេឧក្រិដ្ឋកម្មធំៗ ក្នុងនោះមានការឆបោកតាមអនឡាញ បង្ខាំងមនុស្សខុសច្បាប់ និងលាងលុយកខ្វក់។
ប្រភពបន្តថា អ្នកទាំងនេះជាឧក្រិដ្ឋជនរបស់អន្ដរជាតិ តែកំពុងមានអំណាច និងសេរីភាពនៅកម្ពុជា។
សម្រាប់ លោក ចាន់ឡូត យុទ្ធនាការបោសម្អាតរបស់លោក ហ៊ុន ម៉ាណែត នៅពេលនេះទំនងជារូបភាពឆ្ពិនភ្នែក ដូចដែលធ្លាប់អនុវត្តកន្លងមក នៅពេលមានប្រតិកម្មខ្លាំងពីសហគមន៍អន្ដរជាតិ ក្នុងយុទ្ធសាស្ដ្រហៅថាធ្វើជាកម្ចាត់ ដើម្បីជួយ។
មិនខុសគ្នាទេ ប្រធានអង្គការប្រជាធិបតេយ្យខ្មែរនៅប្រទេសអូស្រ្តាលី លោក ស៊ឹង សែនករុណា យល់ថា យុទ្ធនាការបង្រ្កាបឧក្រិដ្ឋជនរបស់ លោក ហ៊ុន ម៉ាណែត នេះ វាគ្រាន់តែជារូបភាពធ្វើឱ្យល្អមើលប៉ុណ្ណោះ បើមិនហ៊ានវះកាត់ឧក្រិដ្ឋជនដែលស្និទ្ធនឹងគ្រួសារខ្លួនចោលទេនោះ។
លោកថា៖ «បើស្វែងរកឃើញថាជនហ្នឹងពាក់ព័ន្ធទៅនឹងអ្នកមានអំណាចណាមួយ មានឥទ្ធិពលណាមួយ ត្រូវតែចាត់វិធានការជាប្រព័ន្ធដោយមិនខ្លាចនូវអំណាចបុគ្គលហ្នឹងនោះទេ។ ដូចជាឧទាហរណ៍ថា ប៉ះពាល់ស្រាវជ្រាវទៅដល់ខ្សែស្រឡាយរបស់មេដឹកនាំប្រទេស ត្រូវតែហ៊ានចោទប្រកាន់ ហ៊ានចាប់ខ្លួន ហ៊ានផ្តន្ទាទោសដោយតុលាការអីឲ្យបានច្បាស់លាស់ អាហ្នឹងបានយើងអាចជឿជាក់បាន»។
របាយការណ៍របស់វិទ្យាស្ថាន Humanity Research Consultancy ចេញផ្សាយនៅខែឧសភា ឆ្នាំ២០២៥ រកឃើញថា ឧកញ៉ា លី យ៉ុងផាត់ ឧកញ៉ា កុក អាន និងឧកញ៉ា ទ្រី ភាព ជាដើម ដែលជួយរកលុយចិញ្ចឹមគណបក្សប្រជាជនកម្ពុជា ក៏មានជាប់ពាក់ព័ន្ធក្នុងការជួយការពារបណ្តាញឧក្រិដ្ឋកម្មអន្តរជាតិទាំងនេះដែរ។
បើតាមរបាយការណ៍ដដែល ក្រៅពីការបើកដៃឱ្យឧក្រិដ្ឋជន គណបក្សប្រជាជនកម្ពុជា គឺមានតួនាទីជាអ្នកការពារបណ្តាញឧក្រិដ្ឋកម្មបរទេស នៅក្នុងប្រទេសកម្ពុជា ជាថ្នូរបានលុយពីឧក្រិដ្ឋកម្មល្បែងអនឡាញ និងអំពើឆបោក ក្នុងទំហំទឹកប្រាក់ចន្លោះពីជាង ១២ពាន់លានដុល្លារ ទៅ១៩ពាន់លានដុល្លារអាមេរិកក្នុងមួយឆ្នាំៗ។
ដូចគ្នានេះដែរ ក្រសួងរតនាគារជាតិអាមេរិក នៅខែឧសភា ឆ្នាំ២០២៥ រកឃើញថា ក្រុមហ៊ុន ហួយវ័នគ្រុប របស់ឧកញ៉ា ហ៊ុន តូ ក្មូយប្រុស លោក ហ៊ុន សែន មានជាប់ពាក់ព័ន្ធបទឧក្រិដ្ឋកម្មលាងលុយ។
រីឯ ឧកញ៉ា លោក លី យ៉ុងផាត់ ដែលត្រូវបាន លោក ហ៊ុន សែន ប្រគល់តំណែងជាប្រធានគណៈកម្មាធិការហិរញ្ញវត្ថុរបស់គណបក្សប្រជាជនកម្ពុជានោះ ត្រូវបានសហរដ្ឋអាមេរិកដាក់ទណ្ឌកម្មដោយបង្កកទ្រព្យសម្បត្តិ ក្រោយរកឃើញថាជាប់ពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរ រួមមាន ការជួញដូរមនុស្ស ធ្វើទារុណកម្ម និងអំពើឆបោកតាមប្រព័ន្ធអនឡាញជាដើម៕
