អ្នកមានបទពិសោធន៍កិច្ចការព្រំដែន ពីបក្សប្រឆាំង លោក អ៊ុំ សំអាន បាននិយាយថា ទាហានថៃ បានជីក លេណដ្ឋាននៅជើងប្រាសាទតាមាន់ធំ នាពេលថ្មីៗនេះ បំពានលើអនុស្សរណៈនៃការយោគយល់គ្នា គ្មានការតវ៉ាពីមេដឹកនាំខ្មែរ ដែលថានេះជាកម្សោយរបស់មេដឹកនាំ ក្នុងបុព្វហេតុការពារទឹកដី។
លោក អ៊ុំ សំអាន និយាយលើហ្វេសប៊ុករបស់លោក នៅថ្ងៃទី១៦ខែកក្កដានេះ ដោយចោទជាសំណួរថា ហេតុអ្វីលោក ហ៊ុន ម៉ាណែត អនុញ្ញាតឱ្យទាហានថៃបានជីកត្រង់សេនៅប្រាសាទតាមាន់ធំ ហើយមិនហ៊ានតវ៉ាជាមួយថៃរឿងជីកត្រង់សេនេះ?។
ក្នុងន័យនេះ លោកពន្យល់ថា ប្រាសាទតាមាន់ធំ ជារបស់កម្ពុជា ហើយរដ្ឋាភិបាលក៏នឹងប្តឹងករណីប្រាសាទតាមាន់ធំនេះទៅតុលាការយុត្តិធម៌អន្តរជាតិ(ICJ)។
បើតាមអនុស្សរណៈយោបល់ឆ្នាំ២០០០ បានហាមមិនឱ្យភាគីណាមួយសាងសង់សំណង់រឹង ឬធ្វើអ្វីថ្មីនៅតំបន់ជម្លោះនោះទេ។
លោកថា កម្ពុជាបានជីកត្រង់សេនៅតំបន់មុំ៣ ហើយភាគីថៃតវ៉ារហូតដល់កម្ពុជាបានលុបត្រង់សេនៅតំបន់មុំ៣ រួចដកទ័ពចេញពីតំបន់មុំ៣។
កន្លងមក ទាហានថៃក៏បានបាំងតង់កៅស៊ូនៅប្រាសាទតាមាន់ធំហើយរដ្ឋាភិបាលកម្ពុជាមិនហ៊ានតវ៉ាឱ្យថៃរើតង់កៅស៊ូនោះចេញវិញទេ។
លើសពីនេះ លោកថា ទាហានខ្មែរនៅទីនោះ រអ៊ូថាមេដឹកនាំខ្មែរខ្សោយ បណ្តោយឱ្យទាហានថៃ បាំងតង់កៅស៊ូនៅប្រាសាទតាមាន់ធំស្រេចចិត្ត ហើយមិនហ៊ានតវ៉ា ដែលលោកចោទថា នេះជាកម្សោយរបស់លោក ហ៊ុន ម៉ាណែត ទើបថៃមើលងាយខ្មែរ។
វីអូឌី មិនអាចសុំប្រតិកម្មឆ្លើយតប ពីប្រធានអង្គភាពអ្នកនាំពាក្យរដ្ឋាភិបាលកម្ពុជាពីលោក ប៉ែន បូណាបានទេ គិតត្រឹមម៉ោងផ្សាយនេះ។ ប៉ុន្តែក្នុងកិច្ចប្រជុំព្រឹទ្ធសភា កាលពីថ្ងៃទី១៤ខែកក្កដា លោក ហ៊ុន សែន ធ្លាប់ព្រមានថៃ បើថៃហ៊ានធ្វើរបងនៅប្រាសាទតាមាន់ធំ ។
លោកថា៖ «ប៉ុន្មានថ្ងៃនេះ ចង់ធ្វើរបងទ័ព(ប្រាសាទ)តាមាន់ធំៗ។ សាកលមើលៗ។ (ថៃ)គំរាមវាយ យកខេត្តបាត់ដំបង យកខេត្តសៀមរាប ចូលដល់ភ្នំពេញ សាកលមើលទៅ»។
យ៉ាណា កម្ពុជាបានប្រកាសជំហរប្តឹងថៃទៅតុលាការយុត្តិធម៌អន្តរជាតិ(ICJ)ក្នុងសំណុំរឿងព្រំដែនពាក់ព័ន្ធនឹងតំបន់ប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំ៣។
ការបញ្ជាក់ជំហររបស់កម្ពុជា គឺធ្វើឡើងក្រោយពីទាហានថៃបានបើកការបាញ់ប្រហារ ទៅលើលេណដ្ឋានឈរជើងនៅព្រំដែនជួរមុខរបស់កម្ពុជា នៅតំបន់មុំ៣ ស្រុកជាំក្សាន្ត ខេត្តព្រះវិហារ បណ្តាលឱ្យទាហានខ្មែរម្នាក់បាត់បង់ជីវិត។
យ៉ាងនេះក្តី គណបក្សប្រឆាំង ធ្លាប់ជំរុញឱ្យមានដឹកនាំកម្ពុជាប្រើយន្តការអន្តរជាតិមួយទៀត គឺកិច្ចព្រមព្រៀងសន្តិភាពទីក្រុងប៉ារីស ដែលកម្ពុជាចាំបាច់ត្រូវប្តឹងទៅសហប្រធានកិច្ចព្រមព្រៀងនេះ ដើម្បីទប់ស្កាត់ការឈ្លានពាន និងបញ្ចៀសការផ្ទុះអាវុធបង្ហូរឈាមគ្នាផងដែរ។
ប៉ុន្តែមកដល់ពេលនេះ រដ្ឋាភិបាលកម្ពុជា មិនទាន់បង្ហាញជំហរប្រើយន្តការកិច្ចព្រមព្រៀងសន្តិភាពទីក្រុងប៉ារីស នៅឡើយទេ ដែលធ្វើឱ្យកងទ័ពកម្ពុជា និងថៃ បន្តប្រឈមមុខដាក់គ្នា។
សម្រាប់ លោក អ៊ុំ សំអាន ក្រសួងការបរទេសកម្ពុជា ត្រូវតែផ្ញើកំណត់ទូតទៅថៃ ដោយទាមទារឱ្យថៃលុបត្រង់សេនោះវិញ ហើយរដ្ឋាភិបាលត្រូវតែប្រញាប់ប្រញាលដាក់បណ្តឹងករណីតំបន់ទាំង៤ ទៅតុលាការយុត្តិធម៌អន្តរជាតិឱ្យលឿន ដូចការធ្វើច្បាប់ដកសញ្ជាតិខ្មែរ ពីកំណើត ដើម្បីកម្ទេចខ្មែរគ្នាឯង។ លោក ហាក់ស្តីបន្ទោសថា កុំខ្លាំងបានតែជាមួយខ្មែរគ្នាឯង ហើយជាមួយបរទេសឈ្លានពានខ្លាចគេនោះ។
លើសពីនេះ លោក សំអាន គូសបញ្ជាក់ថា បើតាមផែនទីឧបសម្ព័នភ្ជាប់សន្ធិសញ្ញាបារាំង-សៀមឆ្នាំ១៩០៧ និងបង្គោលបារាំង គឺដីខ្មែរនៅជាង១គីឡូម៉ែត្រ ហួសទៅប្រាសាទតាមាន់ធំ៕
