សកម្មជនបក្សប្រឆាំងដែលកំពុងភៀសខ្លួននៅសហរដ្ឋអាមេរិក លោក ផន ផាន់ណា បានអះអាងថា លោកកំពុងរៀបចំឯកសារនិងមេធាវីអន្តរជាតិ ប្តឹងលោក ហ៊ុន សែន ទៅតុលាការព្រហ្មទណ្ឌថៃ ក្នុងសំណុំរឿងឃាតកម្មឆ្លងដែន ដែលប្រព្រឹត្តិទៅនៅប្រទេសថៃ កាលពីដើមខែសីហា ឆ្នាំ២០២៤។
គម្រោងដាក់ពាក្យប្តឹងនេះ ចំពេលដែលមេដឹកនាំកម្ពុជា លោក ហ៊ុន សែន នេះ និងរដ្ឋាភិបាលថៃ ត្រកូលថាក់ស៊ីន កំពុងចោទប្រកាន់គ្នាទៅវិញទៅមក ពីការលាក់ទុកបណ្តាញឧក្រិដ្ឋជនឆ្លងដែន ដែលជាក្តីបារម្ភ ដល់ការគំរាមកំហែងសន្តិសុខក្នុងតំបន់ និងពិភពលោក ដែលផ្តើមចេញពីបញ្ហាព្រំដែន។
លោក ផន ផាន់ណា ប្រាប់VODនៅថ្ងៃទី១៧ ខែកក្កដានេះថា លោកបានរៀបចំឯកសារនិងមេធាវីសិទ្ធិមនុស្សអន្តរជាតិរួចហើយ ដើម្បីប្តឹង លោក ហ៊ុន សែន ទៅតុលាការថៃនៅចុងខែកក្កដានេះ។
លោកបញ្ជាក់ថា អង្គហេតុពាក្យបណ្តឹងទៅតុលាការនេះ គឺជាបទល្មើសឃាតកម្មឆ្លងដែន មានការរៀបចំគិតទុកជាមុន ក្នុងចេតនាប៉ុនប៉ងសម្លាប់ពីសំណាក់មេដឹកនាំកម្ពុជា លោក ហ៊ុន សែន មកលើរូបលោក។
លោកអះអាងថា បើតាមសារសំឡេងដែលលោកទទួលបាន ជាសម្តីរបស់ លោក ហ៊ុន សែន បញ្ជាឱ្យលោក ហ៊ួត តាមសម្លាប់រូបលោកនៅលើទឹកដីថៃ ដែលថា ទោះក្នុងតម្លៃណាក៏ដោយ ស្លាប់ ឬរស់ ត្រូវចាប់ឱ្យបាន។
លោកអះអាងទៀតថា លោកមានភស្តុតាងជាច្រើន ដែលបញ្ជាក់ថាមេដឹកនាំកម្ពុជា លោក ហ៊ុន សែន មានចេតនាប៉ុនប៉ងសម្លាប់ ធ្វើទុក្ខបុកម្នេញ និងតាមចាប់ខ្លួនលោក តាំងពីលោករស់នៅប្រទេសកម្ពុជា។
លោកសង្ឃឹមថា ភស្តុតាង និងសារគំរាមសម្លាប់នេះ តុលាការព្រហ្មទណ្ឌថៃនឹងទទួលយកធ្វើការស៊ើបអង្កេតដើម្បីយុត្តិធម៌ ព្រោះហេតុការណ៍នេះ កើតឡើងនៅប្រទេសថៃ គឺលោក ហ៊ុន សែន គំរាមសម្លាប់មនុស្សឆ្លងដែន។
លោកថា៖ «ករណីដែល លោក ហ៊ុន សែន បញ្ជា ឃ្លាំង ហួត សម្លាប់ខ្ញុំកាលពីថ្ងៃទី២២ ខែសីហា ឆ្នាំ២០២៤ហ្នឹង ឥឡូវនេះគឺខ្ញុំបានដាក់ពាក្យប្ដឹង បានរៀបចំពាក្យប្ដឹងទៅតុលាការព្រហ្មទណ្ឌថៃ គឺករណីដែល លោក ហ៊ុន សែន ដែលប៉ុនប៉ងធ្វើមនុស្សឃាត ដោយចេតនាទុកមុន ហើយរឿងហ្នឹងវាមិនមែនថាត្រឹមរឿងខ្ញុំទេ គឺខ្ញុំរកយុត្តិធម៌ដល់ជនរងគ្រោះផ្សេងៗ ដែលរងការគំរាមកំហែងពីរបបក្រុងភ្នំពេញ លក្ខណៈឆ្លងដែនផងដែរ អ៊ីចឹងហើយយើងអត់អាចទុកបណ្ដោយឲ្យ លោក ហ៊ុន សែន គាត់ធ្វើអ្វីតាមអំពើចិត្តគាត់ចង់គំរាមគំហែង តាមសម្លាប់មនុស្ស ទោះបីជានៅប្រទេសណា គាត់មានឥទ្ធិពលតាមសម្លាប់តាមចាប់តាមអីបានអ៊ីចឹងបានទេ អ៊ីចឹងហើយឥឡូវនេះគឺពេលវេលាដែលអំណោយផលឡើយ យើងត្រូវតែប្ដឹង ហ៊ុន សែន»។
សម្រាប់លោក ផន ផាន់ណា ចាត់ទុកករណី លោក ហ៊ុន សែន គំរាមសម្លាប់មនុស្សឆ្លងដែននេះ ជាទង្វើឃោឃៅ អមនុស្សធម៌ និងបំពានអធិបតេយ្យភាពរបស់ថៃ និងរំលោភច្បាប់សិទ្ធិមនុស្សអន្តរជាតិ។
ការណ៍នេះ លោកជំរុញឱ្យតុលាការព្រហ្មទណ្ឌថៃ ធ្វើការស៊ើបអង្កេតដោយម៉ត់ចត់និងតម្លាភាព ដើម្បីស្វែងរកយុត្តិធម៌ឱ្យរូបលោក និងជនរងគ្រោះខ្មែរដទៃទៀត គឺចាប់ខ្លួនលោក ហ៊ុន សែន មកផ្តន្ទាទោស។
លោកថា៖ ««ខ្ញុំសង្ឃឹមថា តុលាការថៃនឹងរកយុត្តិធម៌ជូនពួកខ្ញុំ ហើយរឿងនេះមែនតែរឿងខ្ញុំបុគ្គល ផន ផាន់ណា ទេគឺយើងធ្វើដើម្បីរកយុត្តិធម៌ដល់ជនរងគ្រោះផ្សេងៗ ដែលរងគ្រោះនៅប្រទេសថៃផងដែរ ជាពិសេសយើងដាក់នេះ គឺយើងដាក់ទៅដើម្បីការពារដល់ជនរងគ្រោះនយោបាយ ដែលភៀសខ្លួនប្រទេសថៃផ្សេងទៀត ដែលគាត់កំពុងភៀសខ្លួននៅប្រទេសថៃរាប់រយនាក់ ដើម្បីការពារសុវត្ថិភាពពួកយើងផងដែរ»។
លើសពីនេះ លោកក៏បានបង្ហោះសារលើហ្វេសប៊ុកនៅថ្ងៃទី១៧ ខែកក្កដានេះ និយាយថា ពាក្យបណ្តឹងរបស់លោកនេះ មិនមែនត្រឹមតែការពារខ្លួនខ្ញុំទេ ប៉ុន្តែដើម្បីទាមទារឱ្យមានការទទួលខុសត្រូវចំពោះជនជាតិខ្មែរដទៃទៀត ដែលត្រូវបានគេគំរាមកំហែង វាយប្រហារ ឬសម្លាប់នៅលើទឹកដីបរទេសជាដើម។
លោកបន្តថា ការប៉ុនប៉ងសម្លាប់ជីវិតលោក រួមនឹងការធ្វើឃាតលោក លិម គិមយ៉ា លើទឹកដីថៃដូចគ្នានេះ ហាក់បង្ហាញលំនាំដ៏រំខាននៃរំលោភច្បាប់អន្តរជាតិដោយ លោក ហ៊ុន សែន និងភ្នាក់ងារសកម្មរបស់គាត់។
ចំណែក តំណាងរាស្រ្តបក្សសង្រ្គោះជាតិ លោក អ៊ុំ សំអាន និយាយថា តាំងពីលោក ហ៊ុន សែន រំលាយគណបក្សសង្គ្រោះជាតិមក អំពើនិទណ្ឌភាពនៅកម្ពុជា កើតឡើង មិនក្រោមពីជាង១០០ករណីនោះទេ។
លោកសង្កេតឃើញថា អំពើឃាតកម្ម វាយប្រហារសព្វគ្រប់បែបយ៉ាងលើសកម្មជនបក្សប្រឆាំង សកម្មជនសិទ្ធិមនុស្ស រួមទាំងអ្នកវិភាគនយោបាយ ភាគច្រើនកើតចេញពីរឿងនយោបាយបក្សកាន់អំណាច។
សម្រាប់ លោក អ៊ុំ សំអាន អះអាងថា អំពើឃាតកម្មសម្លាប់ពលរដ្ឋ ឬការវាយដំច្រំធាក់លើសកម្មជនបក្សប្រឆាំង និងសកម្មជនសិទ្ធិមនុស្ស គឺមានជាប់ពាក់ព័ន្ធនឹងមេដឹកនាំគ្រួសារហ៊ុននៅពីខាងក្រោយ។
លោកថា៖ ««ឃាតកម្មទៅលើលោក កែម ឡី ទៅលើលោក ឈុត វុទ្ធី លោក ជា វិជ្ជា ទៅលើអ្នកស្រី ពិសិដ្ឋពីលីកា ទៅលើព្រះអង្គ សំ ប៊ុនធឿន ជាដើមគឺសុទ្ធតែរៀបចំឡើងដោយអ្នកមានអំណាចនៅកម្ពុជាហើយអ៊ីចឹងហើយបានជារកឃាតករពិត មកផ្ដន្ទាទោសអត់បានទេ យើងមើលលោក ជា វិជ្ជា ឃាតករដែលសម្លាប់គាត់ហ្នឹងតាំងពីឆ្នាំ២០០៣ មករហូតដល់សព្វថ្ងៃនេះ ២០ឆ្នាំជាងហើយ អត់ទាន់រកឃើញឃាតករផងឃើញទេ ដូច្នេះរឿងហ្នឹងគឺអ្នកមានអំណាចត្រកូលហ៊ុនហ្នឹងតែម្ដងទៀត នៅពីក្រោយខ្នងនៃឃាតកម្មនេះ»។
អតីតមន្រ្តីជាន់ខ្ពស់គណបក្សភ្លើងទៀន លោក នល់ ពង្សធារិទ្ធ ហៅថា កំហែង ជ័យ បានបង្ហោះសារលើហ្វេសប៊ុករបស់លោក នៅថ្ងៃទី១៧ ខែកក្កដានេះ ដោយនិយាយថា «ថ្ងៃនេះជាខួប២ឆ្នាំ នៃការតាមវាយសម្លាប់ពីជនមិនស្គាល់មុខមកលើរូបលោក ដែលលោកជាសកម្មជន នៃគណបក្សភ្លើងទៀន ហើយថារូបលោក មិនទាន់ទទួលបានយុត្តិធម៌ផងដែរ»។
ជុំវិញការប្តឹង លោក ហ៊ុន សែន នេះ អ្នកនាំពាក្យប្រធានគណបក្សប្រជាជនកម្ពុជាដែលកំពុងកាន់អំណាច លោក ជា ធារិទ្ធ បានប្រាប់VOD ថាលោកហាក់មិនចាប់អារម្មណ៍ការដាក់ពាក្យបណ្តឹងនេះទេ ។
តែផ្ទុយទៅវិញ លោកថា ទង្វើនេះប្រៀបបាននឹងចូលដៃជាមួយសត្រូវ ដែលឈ្លានពានទឹកដីកម្ពុជា ដែលលោកថា មហាជនអាចដឹងបានថា វាជាទង្វើបំផ្លាញខ្មែរ។
លោកថា៖ ««បើពួកគេចង់ប្តឹងពឹងពាក់ថៃឲ្យជួយពួកគេអ៊ីហ្នឹង សូមអញ្ជើញទៅ ពីព្រោះចរិតរបស់ពួកគេគឺបែបហ្នឹងហើយ វាក៏បង្ហាញច្បាស់ទៅកាន់ពលរដ្ឋខ្មែរឲ្យបានឃើញធាតុពិតរបស់ក្រុមរបស់បុគ្គល ជ្រុលនិយមដែលហែកទ្រូងឲ្យបរទេស ឲ្យសត្រូវទៅពឹងពាក់សត្រូវ វាមិនដែលមាននៅក្នុងពេលដែលប្រទេសខ្លួនកំពុងតែប្រឈមនឹងសត្រូវឈ្លានពាន ហើយខ្លួនឯងជាអ្នកមានឈាមជ័រជាខ្មែរ ទៅពឹងពាក់សត្រូវហែកទ្រូងឲ្យសត្រូវ»។
យ៉ាងណាក្តី កន្លងទៅ មានសារបែកធ្លាយរបស់ លោក ហ៊ុន សែន បញ្ជាឱ្យចាប់ខ្លួនសកម្មជនសង្គម លោក ផន ផាន់ណា ដែលសង្ងំលាក់ខ្លួននៅប្រទេសថៃ។
សារបែកធ្លាយនោះ លោក ហ៊ុន សែន ប្រើពាក្យថា អាហួត ត្រូវចាប់ ផន ផាន់ណា ឱ្យបានកុំឱ្យរត់រួច ទោះ ផន ផាន់ណា នេះក្លាយជាសាកសពក្តី ត្រូវបញ្ជូនទៅកម្ពុជា។
លោកថា៖ «(ឃ្លាំង) ហួត ត្រូវទទួលខុសត្រូវ ទៅលើការងារនេះឲ្យធ្វើការជាមួយនគរបាលថៃ ហើយក្រុមអាវក្រហមក៏ត្រូវតែចូលរួម ដែលយើងមានការសហការល្អជាមួយ យើងត្រូវធ្វើសកម្មភាពនេះផងដែរ។ ហើយដែលធ្វើសកម្មភាពដាច់ដោយឡែក ពីនគរបាលថៃ និងកម្លាំងយើងផ្ទាល់ ក៏ត្រូវតាមយកមួយនេះឲ្យបាន បើទោះបីដោយតម្លៃណាក៏ដោយ ក៏រស់ ឬស្លាប់យើងអត់ដឹង ចេះតែដឹងថាមួយហ្នឹង គឺមិនអាចទៅណាមិនឲ្យចេញទៅណាបាន ដូច្នេះត្រូវអនុវត្តវិធានការនេះ ជាបន្ទាន់ដាច់ខាត មិនឱ្យអា ផន បញ្ញា នេះរួចខ្លួនបានទេ»។
ដោយឡែក មេធាវី សុខ សំអឿន សុំមិនធ្វើការអត្ថាធិប្បាយច្រើនជុំវិញបញ្ហានេះទេ ដោយលោកគ្រាន់តែបញ្ជាក់ថា ការប្តឹងផ្តល់វាជាសិទ្ធិរបស់បុគ្គលគ្រប់រូប។
លោកថា៖ «រឿងហ្នឹងខ្ញុំអត់ដឹងថា សារហ្នឹងបែបម៉េចទេ ក៏ប៉ុន្តែគ្រាន់តែគេហៅថាសម្លាប់នោះ មិនមែនបើ ការប៉ុនប៉ងសម្លាប់ គេមិនចាំបាច់គាត់និយាយទៀត សំដៅទៅលើការនិយាយទេ គឺសំដៅទៅលើសកម្មភាពទៀត»។
យ៉ាងណា គេសង្កេតឃើញថា ក្រោមការដឹកនាំរបស់មេដឹកនាំបក្សកាន់អំណាចកម្ពុជាជាង៤ទសវត្សរ៍ទៅនេះ មនុស្សជាច្រើនត្រូវបានគេបាញ់សម្លាប់ ក្នុងនោះមានទាំងអ្នកសារព័ត៌មាន ព្រះតេជគុណធម្មវិបស្សនា សំ ប៊ុនធឿន មេដឹកនាំសហជីពសេរីកម្មករ លោក ជា វិជ្ជា សកម្មជនការពារព្រៃឈើលោក ឈុត វុទ្ធី និងការសម្លាប់លោកបណ្ឌិត កែម ឡី និងសកម្មជនគណបក្សប្រឆាំង រាប់សិបនាក់ទៀត ត្រូវបានគេលួចធ្វើឃាត ដោយវាយសំដៅក្បាល ដែលខ្លះស្លាប់ ខ្លះពិការមួយជីវិត តែជនដៃដល់ មិនត្រូវបានប្រព័ន្ធយុត្តិធម៌នាំខ្លួនមកផ្តន្ទាទោសទេ៕
