អង្គការសិទ្ធិមនុស្សលីកាដូ ឱ្យដឹងថា សាលាឧទ្ធរណ៍ព្រះសីហនុ នៅថ្ងៃព្រហស្បតិ៍នេះ បានទម្លាក់បទចោទទៅលើសកម្មជនដីធ្លីចំនួន ១១នាក់ នៅខេត្តកោះកុង ដែលរងការចោទពាក់ព័ន្ធនឹងបទ ញុះញង់ ខណៈសាលាដំបូងរាជធានីភ្នំពេញ បានផ្តន្ទាទោសលើពលរដ្ឋដែលមានបញ្ហាដីធ្លីនៅបឹងតាមោក។
យោងតាមអត្ថបទខ្លីរបស់អង្គការការពារសិទ្ធិមនុស្សលីកាដូ ឱ្យដឹងថា នាព្រឹកថ្ងៃទី១៧ ខែកក្កដានេះ សកម្មជនដីធ្លីចំនួន ១១នាក់ ដែលមកពីសហគមន៍ចំនួន៣ ក្នុងខេត្តកោះកុង ត្រូវបានសាលាឧទ្ធរណ៍ព្រះសីហនុ សម្រេចឱ្យរួចផុតបទចោទប្រកាន់ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” ។
កាលពីខែមិថុនា ឆ្នាំ២០២៤ សាលាដំបូងខេត្តកោះកុង ចោទប្រកាន់ និងផ្តន្ទាទោសទៅលើសកម្មជនដីធ្លីទាំង ១១រូបនោះ ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា ៤៩៤-៤៩៥ នៃក្រមព្រហ្មទណ្ឌ ហើយទោសដែលបានដាក់នោះត្រូវបានព្យួររយៈពេល ៦ខែ ខណៈសហគមន៍នេះ មានជម្លោះដីធ្លីជាច្រើនទសវត្សរ៍មកហើយជាមួយនឹងឧកញ៉ា លី យ៉ុងផាត់ និងលោក ហេង ហ៊ុយ ។
សកម្មជនដីធ្លីទាំងនោះ មានដូចជា អ្នកស្រី ផាវ ញ៉ើង, អ្នកស្រី ដេត ហួ, លោក ហេង ជៃ, អ្នកស្រី សេង លីន និងអ្នកស្រី សួង ថេង ជាដើម។
អង្គការលីកាដូ បានឱ្យដឹងទៀតថា កាលពីថ្ងៃទី១៦ ខែកក្កដា ម្សិលមិញ សាលាដំបូងរាជធានីភ្នំពេញ ក៏បានផ្តន្ទាទោសលើពលរដ្ឋបឹងតាមោកចំនួន ៩នាក់ ដែលរងការបណ្តេញចេញដោយបង្ខំពីលំនៅឋានរបស់ពួកគេ ពីបទ “ហិង្សាដោយចេតនាមានស្ថានទម្ងន់ទោស” និងបទ “ស្ថានទម្ងន់ទោសនៃបទប្រឆាំងនឹងអ្នករាជការសាធារណៈ” យោងតាមមាត្រា២១៨ និង មាត្រា៥០៤ នៃក្រមព្រហ្មទណ្ឌ។
តុលាការបានផ្តន្ទាទោសពួកគេ ឱ្យជាប់ពន្ធនាគាររយៈពេល ១ខែ ប៉ុន្តែពួកគេនៅតែអាចមានសិទ្ធិប្តឹងឧទ្ធរណ៍បន្តទៀតបាន។ ការផ្តន្ទាទោសនេះ ធ្វើឡើងបន្ទាប់ពីមានការតវ៉ារបស់ពលរដ្ឋដែលជម្លោះដីធ្លីរ៉ាំរ៉ៃមួយជុំវិញតំបន់បឹងតាមោក ក្នុងរាជធានីភ្នំពេញ៕
