នៅពេលដែលស្ថាប័នអន្តរជាតិល្បីៗ បានបង្ហាញពីការរកឃើញជាបន្តបន្ទាប់ថា កម្ពុជាគឺជាទីតាំងស្នូលនៃអំពើឧក្រិដ្ឋកម្មឆបោកតាមប្រព័ន្ធអនឡាញ ដោយរកប្រាក់បានប្រមាណពី ១២,៥ពាន់លាន ទៅ១៩ពាន់លានដុល្លារក្នុងមួយឆ្នាំៗ និងបានបង្កការឈឺចាប់ដល់ជនរងគ្រោះរាប់សិបម៉ឺននាក់ មកពីបណ្តាប្រទេសជាច្រើននៅលើពិភពលោក មន្ត្រីជំនាញរបស់រដ្ឋាភិបាលកម្ពុជា តែងតែច្រានចោលរបាយការណ៍ទាំងនេះ ដោយថា កម្ពុជាក៏ជាជនរងគ្រោះពីអំពើឧក្រិដ្ឋកម្មអនឡាញនេះដែរ។
យ៉ាងណាក្តី ក្នុងរយៈពេល២០ថ្ងៃចុងក្រោយនេះ សមត្ថកិច្ចកម្ពុជា បានធ្វើការបង្ក្រាបទៅលើអាជីវកម្មទាំងនេះ ដោយឃាត់ខ្លួនជនសង្ស័យបានជាង ១៣០០នាក់ ក៏ប៉ុន្តែគេមិនឃើញមានបង្ហាញពីការឃាត់ខ្លួនមេខ្លោងគ្រាក់ៗជាមន្ត្រីរបស់គណបក្សប្រជាជនកម្ពុជា ដែលនៅពីក្រោយអំពើឧក្រិដ្ឋដែលធ្វើឱ្យកម្ពុជាខូចមុខមាត់នៅលើឆាកអន្តរជាតិនេះទេ។ សំណួរនៅត្រង់ថា តើនណាជាមេក្លោងនៃអំពើឧក្រិដ្ឋកម្មឆបោកតាមប្រព័ន្ធបច្ចេកវិទ្យានៅកម្ពុជានេះ ?
ផ្តើមចេញពីមូលដ្ឋានវិភាគ លេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យារបស់រដ្ឋាភិបាលកម្ពុជា បានប្រកាសនៅថ្ងៃទី១៧ ខែកក្កដា ឆ្នាំ២០២៥ថា ក្នុងរយៈពេល២០ថ្ងៃ គឺចាប់ពីថ្ងៃទី២៧ ខែមិថុនា មកដល់ថ្ងៃទី១៧ ខែកក្កដា សមត្ថកិច្ចបានចុះបង្ក្រាបសកម្មភាពឆបោកតាមប្រព័ន្ធបច្ចេកវិទ្យា (ONLINE SCAMS) ទូទាំងប្រទេសនៅ២០ទីតាំង ដោយឃាត់ខ្លួនជនសង្ស័យជាជនបរទេសសរុបបានចំនួន ១ ៣៦២នាក់។
ក៏ប៉ុន្តែគេមិនឃើញសមត្ថកិច្ចកម្ពុជា បង្ហាញពីមេខ្លោងណាម្នាក់នៅពីក្រោយអំពើឧក្រិដ្ឋកម្មនៅតាមទីតាំងដែលត្រូវបានបង្ក្រាបទាំងនោះទេ គឺឃាត់ខ្លួនបានតែអ្នកស៊ីឈ្នួលធ្វើការឱ្យគេតែប៉ុណ្ណោះ ខណៈដែលស្ថាប័នអន្តរជាតិ បានបង្ហាញថា មានមន្ត្រីជាន់ខ្ពស់កម្ពុជា និងឧកញ៉ាគ្រាក់ៗពីគណបក្សប្រជាជនកម្ពុជាចំនួន២៨នាក់ គឺជាអ្នកជួយសម្រួលបើកឱ្យមានអាជីវកម្មទាំងនេះ។
គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា បានឱ្យដឹងថា ក្នុងរយៈពេល២០ថ្ងៃកន្លងមកនេះ សមត្ថកិច្ចជំនាញបានចុះធ្វើរដ្ឋបាល និងប្រតិបត្តិការបង្ក្រាបសរុបបាន ២០ទីតាំង នៅ ៧រាជធានី-ខេត្ត ដោយបានឃាត់ខ្លួនជនសង្ស័យជាជនបរទេសសរុបចំនួន ១ ៣៦២ នាក់ (ស្រី ២២៤នាក់)។
លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១៥ ខែកក្កដា ឆ្នាំ២០២៥ បានដាក់បញ្ជាឱ្យគណៈអភិបាលរាជធានី-ខេត្ត ស្នងការរាជធានី-ខេត្ត រួមទាំងមេបញ្ជាការកងអាវុធហត្ថរាជធានី-ខេត្ត និងអាជ្ញាធរពាក់ព័ន្ធ រួមគ្នាបោសសម្អាតទីតាំងធ្វើសកម្មភាពឆបោកតាមប្រព័ន្ធបច្ចេកវិទ្យា(ONLINE SCAMS) ឱ្យអស់ពីក្នុងភូមិសាស្ត្រ និងដែនសមត្ថកិច្ចរបស់ខ្លួន ដើម្បីបង្ការទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ឱ្យមានប្រសិទ្ធភាពខ្ពស់ ដើម្បីថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
បន្ទាប់ពីលោកនាយករដ្ឋមន្ត្រី បានចេញបទបញ្ជាបន្ថែមទៀតនេះ សមត្ថកិច្ចពាក់ព័ន្ធបានចុះបង្ក្រាបព្រមៗគ្នានៅតាមទីតាំងជាង១០កន្លែង ដោយក្នុងរយៈពេល២ថ្ងៃ គឺនៅថ្ងៃទី១៥ និង១៦ ខែកក្កដា បានសមត្ថកិច្ចបានឃាត់ខ្លួនមនុស្សជាប់ពាក់ព័ន្ធនឹងបទល្មើសនេះ បានដល់ជិត ១០០០នាក់។
នៅក្នុងកិច្ចប្រជុំមួយកាលពីថ្ងៃទី១៧ ខែកក្កដា ឆ្នាំ២០២៥ នាយឧត្តមសេនីយ៍ ស ថេត អគ្គស្នងការនគរបាលជាតិ បានណែនាំដល់មន្ត្រីពាក់ព័ន្ធ ជាពិសេសនាយកដ្ឋាន-អង្គភាពជំនាញ ត្រូវបន្តចាត់វិធានការបច្ចេកទេស ដើម្បីបិទវេបសាយទាក់ទងទៅនឹងការផ្សព្វផ្សាយ ពីលេងល្បែងអនឡាញ និងត្រូវរួមសហការគ្នាបង្កើតក្រុមការងារកម្រិតស្ដង់ដារ ដើម្បីចុះប្រតិបត្តិការ ត្រួតពិនិត្យ ស្រាវជ្រាវ និងបង្រ្កាបក្រុមប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យាអនឡាញគ្រប់ប្រភេទ ឱ្យអស់នៅទូទាំងប្រទេស ស្របទៅតាមបទបញ្ជារបស់រាជរដ្ឋាភិបាល ស្ដីពី យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា។
សម្រាប់ លោក សម រង្ស៊ី ប្រធានក្រុមប្រឹក្សាជាតិតស៊ូ បានសរសេរនៅលើបណ្តាញសង្គមរបស់លោក នៅថ្ងៃទី១៨ ខែកក្កដានេះថា ប្រជាជនខ្មែរឆ្ងល់ពេញប្រទេស ហេតុអ្វីបានមិនចាប់ខ្លួនមេក្រុមឧក្រិដ្ឋជនឆបោកអនឡាញ ពួកត្រកូលហ៊ុន ពួកក្រុមឧកញ៉ា? លោកលើកឡើងថា «ឥឡូវនេះ ឃើញច្បាស់ហើយ ប្រតិបត្តិការតែពីរថ្ងៃ រកឃើញទីតាំងឆបោកអនឡាញ រាប់សិបកន្លែង ហើយចាប់បានមនុស្សពាន់នាក់ ដែលមុនៗពួកសេកត្រកូល ហ៊ុន ចេញមកបដិសេធថា «គ្មានទេៗ»។
ពីរថ្ងៃនេះរកឃើញតែទីតាំង និងមនុស្សធ្វើការតាមបញ្ជាគេ ប៉ុន្តែបាត់មេក្លោងធំៗស្ងាត់ឈឹង ដូចករណីគ្រឿងញៀនអ៊ីចឹង ចាប់បានតែអ្នកប្រើតូចតាច តែមិនដែលឃើញចាប់បានមេគ្រឿងញៀនទេ»។
វិលមកសំណួរថាតើនណាជាមេខ្លោងនៃអំពើឧក្រិដ្ឋកម្មឆបោកតាមប្រព័ន្ធបច្ចេកវិទ្យានៅកម្ពុជា ?
យ៉ាងណាក្តី លោក ប៉ែន បូណា បានបង្ហោះសេចក្តីសម្រេចរបស់ លោក កើត រិទ្ធ រដ្ឋមន្ត្រីក្រសួងយុត្តិធម៌ អំពីការផ្អាកមុខងារជាបណ្តោះអាសន្នរបស់ លោក គ្រី សីហា ព្រះរាជអាជ្ញារងនៃសាលាដំបូងខេត្តពោធិ៍សាត់ ដើម្បីបើកផ្លូវឱ្យក្រុមអធិការកិច្ច និងស្ថាប័នមានសមត្ថកិច្ច ធ្វើការស៊ើបអង្កេតស្រាវជ្រាវទាក់ទងនឹងការអនុវត្តច្បាប់ដោយរំលោភបំពាន ក្នុងការដោះលែងជនល្មើសដែលត្រូវបានចាប់ខ្លួន ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យានៅក្នុងខេត្តពោធិ៍សាត់។
បើទោះបីជាស្ថាប័នអនុវត្តច្បាប់កម្ពុជា មិនបានបង្ហាញឈ្មោះមេខ្លោងនៅក្នុងឧក្រិដ្ឋកម្មឆបោកតាមប្រព័ន្ធបច្ចេកវិទ្យានេះក្តី ក៏កាលពីថ្ងៃទី៨ ខែកក្កដា សមត្ថកិច្ចចម្រុះថៃ បានឆ្មក់ចូលទៅឆែកឆេរទីតាំងចំនួន១៩កន្លែង នៅក្នុងខេត្តសាមុតប្រាកាន ក្បែរក្រុងបាងកក ដើម្បីស្វែងរកចាប់ខ្លួនអ្នកឧកញ៉ា កុក អាន សមាជិកព្រឹទ្ធសភាកម្ពុជា និងជាមនុស្សជំនិតរបស់ លោក ហ៊ុន សែន ដែលត្រូវបានតុលាការព្រហ្មទណ្ឌថៃ ចេញដីកាតាមចាប់ខ្លួន ក្រោមការចោទប្រកាន់ពីបទបានប្រព្រឹត្តឧក្រិដ្ឋកម្មឆ្លងដែន និងលាងលុយកខ្វក់។
ប៉ុន្តែនៅក្នុងថ្ងៃដដែលនោះ លោក ហ៊ុន សែន ប្រធានព្រឹទ្ធសភា បានសម្តែងការអបអរសាទរចំពោះអាជ្ញាធរនិងប៉ូលីសថៃ ដែលបានបើកប្រតិបត្តិកម្ទេចបទល្មើសអនឡាញ នៅលើទឹកដីរបស់ខ្លួនដោយលោកថា ជាការចូលរួមចំណែកដើម្បីកាត់បន្ថយបទល្មើសអនឡាញហូរចូលទឹកដីកម្ពុជា។
បើទោះបីជាសារព័ត៌មានថៃបានចុះផ្សាយព្រោងព្រាតថា លោក កុក អាន ដែលជាមនុស្សជំនិតរបស់លោកហ៊ុន សែន គឺជាម្ចាស់កាស៊ីណូ Crown Casino Resort (អគារ ២៥ ជាន់, អគារ១៨ ជាន់), អគារ២៥ជាន់ អគារ HISO និងកាស៊ីណូក្រោន នៅក្រុងប៉ោយប៉ែត និងមានកាស៊ីណូជាច្រើនទៀត នៅក្រុងបាវិតខេត្តស្វាយរៀង នៅច្រកព្រំដែនជ្រៃធំ ក្នុងខេត្តកណ្តាល និងនៅខេត្តព្រះសីហនុ ព្រមទាំងនៅតាមបណ្តាខេត្តមួយចំនួនទៀត កំពុងដំណើរការអាជីវកម្មអនឡាញក្តី ក៏លោក ហ៊ុន សែន មិនបានបង្ហាញពីចំណាត់ការផ្លូវច្បាប់ណាមួយ ចំពោះសមាជិកព្រឹទ្ធសភាដែលស្ថិតនៅក្រោមបង្គាប់របស់លោករូបនេះឡើយ។
សម្រាប់អតីតមេដឹកនាំគណបក្សសង្គ្រោះជាតិ លោក សម រង្ស៊ី បានថ្លែងជារឿយៗថា រដ្ឋាភិបាលលោក ហ៊ុន ម៉ាណែត បានប្រែក្លាយកម្ពុជាទៅជាមជ្ឈមណ្ឌលឧក្រិដ្ឋកម្មពិភពលោក។ ឧក្រិដ្ឋជនល្បីឈ្មោះនៅលើពិភពលោក ក្រុមម៉ាហ្វីយ៉ា អង្គការឧក្រិដ្ឋកម្មអ៊ីនធឺណិត ប្រមូលផ្តុំគ្នានៅក្នុងប្រទេសកម្ពុជា និងប្រព្រឹត្តឧក្រិដ្ឋកម្មដោយសេរី។ ពួកឧក្រិដ្ឋជនទាំងនេះ ផ្ទេរប្រាក់ (លាងលុយ) នៅកម្ពុជារ៉ាប់ពាន់លានដុល្លារជារៀងរាល់ខែ ដោយមានពួកត្រកូល ហ៊ុន នៅពីក្រោយ។
លោកអះអាងថា ថ្នាក់ដឹកនាំមួយចំនួនធំរបស់គណបក្សប្រជាជន គឺជាអ្នកកាងការពារបណ្តាញឧក្រិដ្ឋកម្មអន្តរជាតិ ដើម្បីប្រមូលប្រាក់យកទៅចិញ្ចឹមអំណាចគណបក្សប្រជាជនកម្ពុជា។
បន្ថែមពីនេះ បើតាមស្ថាប័នអន្តរជាតិល្បីៗ បានរកឃើញថា ក្មួយប្រុស លោក ហ៊ុន សែន គឺលោក ហ៊ុន តូ អ្នកឧកញ៉ា កុក អាន អ្នកឧកញ៉ា លី យ៉ុងផាត់ អ្នកឧកញ៉ា ទ្រី ភាព និងលោក ចេន ហ្ស៊ី ឧក្រិដ្ឋជនជនជាតិចិនដែលត្រូវបានលោក ហ៊ុន សែន តែងតាំងជាទីប្រឹក្សារបស់លោក ព្រមទាំងមន្ត្រីជាន់ខ្ពស់និងឧកញ៉ាគ្រាក់ៗនៃគណបក្សប្រជាជន ដែលស្និទ្ធនឹងគ្រួសារហ៊ុនជាច្រើនរូបទៀត គឺជាមេខ្លោងនៃឧក្រិដ្ឋកម្មអនឡាញនៅកម្ពុជា។ លើសពីនេះ លោក ហ៊ុន សែន ខ្លួនឯងក៏មានភាគហ៊ុននៅក្នុងក្រុមហ៊ុនល្បែងណាហ្គាវើលក្នុងរាជធានីភ្នំពេញ ដែលល្បីខាងរំលោភបំពានលើបុគ្គលិកផងដែរ។
អង្គការលើកលែងទោសអន្តរជាតិ (Amnesty International)កាលពីថ្ងៃទី២៦ ខែមិថុនា ឆ្នាំ២០២៥ បានចេញរបាយការណ៍ជាង២០០ទំព័រ ស្ដីពី ការរំលោភសិទ្ធិមនុស្សដោយសារការធ្វើទារុណកម្ម ការជួញដូរមនុស្ស និងអំពើទាសភាពក្នុងទីតាំងឆបោកតាមប្រព័ន្ធអនឡាញនៅកម្ពុជា បន្ទាប់ពីអង្គការនេះ បានបើកការស្រាវជ្រាវអស់រយៈពេល១៨ខែ រកឃើញទីតាំងឆបោកចំនួន ៥៣កន្លែង នៅក្នុងប្រទេសកម្ពុជា និងបានសម្ភាសន៍ជនរងគ្រោះ ៤២៣នាក់។
ជាមួយគ្នានេះ វិទ្យាស្ថាន Humanity Research Consultancy (HRC) របស់សហរដ្ឋអាមេរិក បានចេញផ្សាយរបាយការណ៍ស្រាវជ្រាវមួយ កាលពីថ្ងៃទី១៩ខែឧសភា ដោយរកឃើញថា ប្រទេសកម្ពុជាគឺជាចំណុចស្នូលនៃការប្រព្រឹត្តិឧក្រិដ្ឋកម្មឆ្លងដែន ពិសេសឧក្រិដ្ឋកម្មអនឡាញ ដោយមានអ្នកបម្រើការងារក្នុងឧក្រិដ្ឋកម្មអនឡាញជាង ១៥ម៉ឺននាក់ និងថា ក្រុមឧក្រិដ្ឋជនអាចរកចំណូលបានពីឧក្រិដ្ឋកម្មអនឡាញ ក្នុង១ឆ្នាំប្រមាណពី ១២,៥ ទៅ ១៩ពាន់លានដុល្លារដែលស្មើនឹង៦០ភាគរយនៃ GDP ឬផលិតផលដុលក្នុងស្រុករបស់កម្ពុជា។
របាយការណ៍នេះបានលាតត្រដាងថា បណ្តាញឧក្រិដ្ឋកម្មឆ្លងដែននៅកម្ពុជា កាន់តែរីកធំឡើងដោយសារអំពើពុករលួយស៊ីរូងក្នុងប្រព័ន្ធដឹកនាំរដ្ឋបែបឯកបក្ស និងគ្រួសារនិយមដែលបានបើកផ្លូវឲ្យក្រុមទុច្ចរិត ជាអ្នកមានអំណាចអាចដើររំលងច្បាប់។
របាយការណ៍ដដែលបានចង្អុលចំៗថា គណបក្សប្រជាជនកម្ពុជា ជាអ្នកសម្របសម្រួលឲ្យអ្នកមានអំណាចចូលដៃគប់គិតជាមួយបណ្តាញឧក្រិដ្ឋកម្មបរទេស និងថា គណបក្សប្រជាជនកម្ពុជាទទួលបានផលលាភជាច្រើនពីការបើកផ្លូវឲ្យអ្នកមានអំណាចរបស់ខ្លួន ធ្វើការងារនេះ ដើម្បីយកប្រាក់ទៅបម្រើគណបក្ស។
លើសពីនេះ របាយការណ៍នៃការសិក្សាស្រាវជ្រាវដដែលនេះ បានកំណត់អត្តសញ្ញាណបុគ្គលដែលសង្ស័យជាប់ពាក់ព័ន្ធនៅក្នុងបណ្តាញឧក្រិដ្ឋកម្មឆ្លងដែននៅកម្ពុជាសរុបចំនួន ២៨នាក់ ដែលភាគច្រើនជាមន្ត្រីជាន់ខ្ពស់ក្នុងជួររដ្ឋាភិបាលនិងឧកញ៉ាគ្រាក់ៗ ក្នុងចំណោមនោះក៏មានអ្នកឧកញ៉ា ទ្រី ភាព និងអ្នកឧកញ៉ា លី យ៉ុងផាត់ ដែលរងទណ្ឌកម្មពីអាមេរិកផងដែរ។
ចំណែកក្រសួងសេដ្ឋកិច្ចអាមេរិក តាមរយៈបណ្តាញអនុវត្តឧក្រិដ្ឋកម្មហិរញ្ញវត្ថុនៃក្រសួងសេដ្ឋកិច្ចអាមេរិកដែលមានឈ្មោះថា (FinCEN) បានស្នើឲ្យមានការអនុវត្តច្បាប់រាំងខ្ទប់ប្រតិបត្តិការលើក្រុមហ៊ុន Huione របស់លោក ហ៊ុន តូ ដែលមានមូលដ្ឋាននៅក្នុងប្រទេសកម្ពុជា នៅក្នុងប្រព័ន្ធហិរញ្ញរបស់អាមេរិក ដោយសារក្រុមហ៊ុននេះ ត្រូវបានរកឃើញថា ជាប់ពាក់ព័ន្ធនឹងការលាងលុយកខ្វក់ឲ្យក្រុមចោរព័ត៌មានវិទ្យា ឬHacker របស់កូរ៉េខាងជើង និងឧក្រិដ្ឋកម្មអនឡាញខ្មៅងងឹត និងឆបោករូបិយបណ្ណគ្រីបតូ ក្នុងតម្លៃទឹកប្រាក់រហូតដល់ជាង ៤៩ពាន់លានដុល្លារអាមេរិក ចាប់តាំងពីឆ្នាំ២០២១មក។
សូមបញ្ជាក់ថា កាលពីចុងខែសីហា ឆ្នាំ២០២៣ អង្គការសហប្រជាជាតិទទួលបន្ទុកសិទ្ធិមនុស្ស(UNHCHR) បានបង្ហាញថា នៅក្នុងប្រទេសកម្ពុជាមានមនុស្សប្រមាណ ១០ម៉ឺននាក់ ដែលជាជនបរទេសត្រូវបានចាប់បង្ខំឱ្យធ្វើការងារឆបោកតាមប្រព័ន្ធអនឡាញ នៅក្នុងប្រទេសកម្ពុជា។
សរុបជារួមអំពើឧក្រិដ្ឋកម្មឆបោកតាមប្រព័ន្ធអនឡាញ និងអំពើលាងលុយកខ្វក់នៅក្នុងប្រទេសកម្ពុជាដែលកំពុងធ្វើឱ្យកម្ពុជាខូចមុខមាត់នៅលើពិភពលោកនេះ ទំនងជាមិនអាចបង្ក្រាបបាននោះទេ ពីព្រោះឧស្សាហកម្មនេះ វាជាប់ពាក់ព័ន្ធយ៉ាងជ្រៅទៅនឹងរដ្ឋាភិបាលគ្រួសារហ៊ុន នៃគណបក្សប្រជាជនកម្ពុជាដែលកំពុងកាន់អំណាច៕
