ក្រុមជនរងគ្រោះចាញ់បោកអតីតឧកញ៉ា ហ៊ី គឹមហុង បានប្រមូលផ្តុំគ្នាជាថ្មីទៀត នៅសាលាដំបូងរាជធានីភ្នំពេញដោយអ្នកខ្លះសម្រក់ទឹកភ្នែក ក្រោយយុត្តិធម៌ត្រូវជាប់គាំងជាង២ឆ្នាំ ធ្វើឱ្យពួកគេប្រឈមវិបត្តិបំណុលធ្ងន់ធ្ងរ និងដាច់បាយ ដែលការណ៍នេះពួកគេទាមទារឱ្យពន្លឿនកាត់ទោសលើមេឆបោកដើម្បីបានលុយដោះស្រាយវិបត្តិជីវភាព។
ជនរងគ្រោះម្នាក់ អ្នកស្រី ម៉ៅ រ៉ានី មកពីខេត្តស្វាយរៀង បានរៀបរាប់នៅមុខតុលាការ នាថ្ងៃទី២១ ខែកក្កដានេះ ទាំងអួលដើមកពីការប្រឈមបញ្ហាជីវភាពធ្ងន់ធ្ងរក្រោយចាញ់បោក លោក ហ៊ី គឹមហុង ជាង២ឆ្នាំទៅនេះ។
អ្នកស្រីថា៖ «ខ្ញុំចឹញ្ចឹមកូនពីរនាក់ ហើយនៅបង់ធនាគារទៀត សួរថាអម្រែកខ្ញុំធ្ងន់អត់ ខ្ញុំថាធ្ងន់។ ប៉ុន្តែធ្វើម៉េចគ្មាននរណាជួយរ៉ែកយើងទេ មានតែយើងប្រឹងរស់ដើម្បីជីវិតកូនដែលយើងបង្កើតមកហើយភ្នែកខ្មៅនេះ។ អាបងអាយុ១៥ឆ្នាំ អាប្អូនអាយុ១២ឆ្នាំ។ ទាំងពូជតែម្តងបានដាក់លុយចូលទៅក្រុមហ៊ុនហ្នឹង អីចឹងអត់នរណាជួយនរណាកើតទេ»។
អ្នកស្រីបានស្នើឱ្យពន្លឿនកាត់ទោសអតីតឧកញ៉ា ហ៊ី គឹមហុង ដើម្បីបានលុយដោះស្រាយវិបត្តិជីវភាព ហើយថាមិនមែនតែពលរដ្ឋសាមញ្ញទេ ដែលចាញ់បោកសូម្បីមន្រ្តីរាជការ ក៏ចាញ់បោកអតីតឧកញ៉ារូបនេះដែរ។
អ្នកស្រីថា៖ «ប្តីខ្ញុំគាត់ធ្វើការនៅសាលាស្រុក ហើយមន្ត្រីនៅសាលាស្រុកហ្នឹងច្រើននាក់ ដែលបានចូលរួមទិញដីក្រុមហ៊ុនហ្នឹង ពីមុនមក ហើយដឹកនាំប្តីខ្ញុំមក ហើយខ្ញុំនិងប្តីខ្ញុំក៏ជឿជាក់ដោយគាត់ធ្វើការជាមួយគ្នា អីចឹងខ្ញុំជឿជាក់ទៅលើអាជ្ញាធរដែរ»។
បន្ថែមលើនេះ តំណាងជនរងគ្រោះ លោក សេង ហាន់ រៀបរាប់ថា កាប្រមូលផ្តុំគ្នានៅពេលនេះចំពេលតុលាការបើកសវនាការរឿងក្តី ដែលមានបក្សពួកក្រុមហ៊ុនពិភពដីមាស២នាក់ គឺឈ្មោះ ហ៊ែល ស៊ីធីន និង រុន ចាន់ថន គំរាមជនរងគ្រោះមិនឱ្យប្តឹង លោក ហ៊ី គឹមហុង។
ប្រភពនោះថា ក្រៅពីគំរាមជនរងគ្រោះហើយ អតីតឧកញ៉ា ហ៊ី គឹមហុង ក៏បានប្រើល្បិចឱ្យលុយអ្នកចាញ់បោកម្នាក់ ១០ដុល្លារ បើពួកគេព្រមដកពាក្យបណ្តឹងវិញ។
លោកថា៖ «ទាក់ទងនឹងការផ្តល់លុយ១០ដុល្លារជាល្បិចក្រុមហ៊ុន ជាល្បិចបោកមួយទៀត ឱ្យបងប្អូនដកពាក្យបណ្តឹងទៅ ហើយទៅធ្វើកិច្ចសន្យា៣៦ខែហ្នឹង។ អីចឹងមានន័យថា ដកពាក្យបណ្តឹងឱ្យ១០ដុល្លារហើយ ទៅធ្វើកិច្ចសន្យារង់ចាំ៣៦ខែទៀត នេះជាល្បិចបោកថ្មីទៀត»។
បើតាមលោក សេង ហាន់ មានស្លាប់កើនឡើងដល់ជិត៣០នាក់ហើយ ក្រោយគ្មានលុយព្យាបាលជំងឺ និងខ្លះធ្វើអត្តឃាត ដោយសារការចាញ់បោកអតីតឧកញ៉ា ហ៊ី គឹមហុង។
ជាមួយគ្នានេះជនរងគ្រោះម្នាក់ទៀតមកពីខេត្តកណ្តាល អ្នកស្រី វិត ចន្តា អះអាងថា ខ្លួនមិន ទទួលយកលុយ១០ដុល្លារហើយដកពាក្យបណ្តឹងទេ ហើយក៏មិនព្រមទុកពេល៣៦ខែទៀត ឱ្យក្រុមហ៊ុនសងលុយវិញដែរ។
ប្រភពនោះថា បច្ចុប្បន្នគាត់ត្រូវបង់ធនាគារជាង ៤០០ដុល្លារក្នុងមួយខែ ក្រោយខ្ចីលុយធនាគារចំនួន២ម៉ឺនដុល្លារ យកទៅដាក់វិនិយោគក្នុងក្រុមហ៊ុនឆបោកពិភពដីមាស។
អ្នកស្រីថា៖ «ក្រុមហ៊ុនថា ឱ្យ១០ដុល្លារខ្ញុំអត់បានយកទេ ដើម្បីរង់ចាំ៣៦ខែទេ ខ្ញុំអត់យល់ព្រមទេ ព្រោះខ្ញុំអត់មានលុយបង់ធនាគារ។ ធនាគារគិតតែពីមករឹបអូសយើង មកកៀបយើងរហូត ដល់ពេលយើងទទួលយកអា៣៦ខែ(៣ឆ្នាំ)ហ្នឹង ខ្ញុំអត់មានលទ្ធភាពបង់ធនាគារទេ»។
អំពើឆបោករបស់ក្រុមហ៊ុនពិភពដីមាសនេះ ក្រោមរូបភាពអ្នកវិនិយោគទទួលបានការប្រាក់ពី ៣ភាគរយ ទៅ ៤ភាគរយ នៃទំហំទឹកប្រាក់ដើមជារៀងរាល់ខែ រយៈពេល២ឆ្នាំ តែពួកគេបើកបានតែប៉ុន្មានខែដំបូង ក៏លែងបានបន្តទៀត។
ដោយឡែក ជនរងគ្រោះម្នាក់ទៀត លោក សិន សារឿន ប្រាប់ថា លោកចាញ់បោកក្រុមហ៊ុនពិភពដីមាសចំនួន ១៥ម៉ឺនដុល្លារ ដែលជាលុយខ្ចីពីធនាគារក្នុងឆ្នាំ២០២២ តែក្រោយអត់លុយបង់សងវិញត្រូវធនាគាររឹបអូសផ្ទះ ហើយបច្ចុប្បន្នលោកប្រឈមដាច់បាយ។
លោកថា៖ «ជីវភាពខ្សោយទៅៗសព្វថ្ងៃនេះ សូម្បីតែបាយក៏រកហូបមិនចង់បានផង វេទនាទៅៗ ដីធ្លីផ្ទះសម្បែងអីគេរឹបអូសយកអស់ហើយ គ្មានអីទៀតទេ គ្រួសារខ្ញុំនោះ រាល់ថ្ងៃខ្ញុំនៅជ្រកផ្ទះគេហ្នឹង។ កាលខ្ញុំយកហ្នឹងមេទីផ្សារហ្នឹងវាបូកប៉ាន់អីទៅវាថា យើងយក១ម៉ឺនដុល្លារ យើងបង់ធនាគារប៉ុណ្ណោះ យើងសល់ប៉ុណ្ណោះ បានខ្ញុំយកប្លង់ផ្ទះ ប្លង់ដីយកទៅដាក់ឱ្យនៅធនាគារ ឥឡូវធនាគារគេរឹបអូសយកអស់ហើយ»។
ជុំវិញរឿងនេះ VOD មិនអាចសុំការឆ្លើយតបពី លោក ប្លង់ សុផល អ្នកនាំពាក្យតំណាងអយ្យការអមសាលាដំបូងរាជធានីភ្នំពេញបានទេ ដោយគ្មានអ្នកទទួលទូរសព្ទ។
សម្រាប់ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ជំរុញឱ្យតុលាការពន្លឿនបើកការស៊ើបអង្កេត លើករណីបោកប្រាស់នេះឡើងវិញ ដើម្បីកាត់ទោសឧក្រិដ្ឋជន និងរឹបអូសទ្រព្យមកសងជនរងគ្រោះវិញផងដែរ។
លោកថា៖ «ក្រៅតែអំពី រងគ្រោះក្រុមហ៊ុនពិភពដីមាសហ្នឹងហើយ គាត់មានការជំពាក់បំណុលច្រើនដែលធ្វើឱ្យបំណុលហ្នឹងក្លាយជាវ័ណ្ឌក ហើយប៉ះពាល់រហូតទៅដល់សេដ្ឋកិច្ចគាត់ទៅទៀត អ្នកខ្លះអាចនឹងបាត់បង់ដីធ្លី ផ្ទះសំបែង ឬក៏ទ្រព្យជាបន្តទៅទៀត ហើយអ្នកខ្លះក៏អាចសម្រេចចិត្តគិតខ្លី ផ្សេងៗ ដែលអាចប៉ះពាល់ទៅដល់ រាងកាយ ឬក៏អ្នកខ្លះ ធ្លាក់ខ្លួនមានជំងឺអីជាដើម ការប៉ះពាល់ ប៉ះទង្គិចផ្លូវចិត្តធ្ងន់ធ្ងរអីជាដើម។ អ៊ីចឹង វាដល់ពេលដែលតុលាការលោកត្រូវតែ អនុវត្តវិធានការផ្លូវច្បាប់ ដើម្បីរកយុត្តិធម៌ឱ្យជនរងគ្រោះ»។
យ៉ាងណា ចំពេលផ្ទុះអំពើឆបោកពីក្រុមឧកញ៉ាខិលខូច នាយករដ្ឋមន្រ្តីកម្ពុជា លោក ហ៊ុន ម៉ាណែត កាលពីឆ្នាំ២០២៤ អំឡុងមានរលកតវ៉ាខ្លាំងពីជនរងគ្រោះ លោកធ្លាប់ថ្លែងជាសាធារណៈថា ការមិនចាត់ការលើអ្នកជំនួញបោកពលរដ្ឋ ជាយុទ្ធសាស្រ្តរក្សាទុកមេមាន់ដើម្បីយកពងឱ្យពលរដ្ឋ។
លោកថា៖ «រដ្ឋាភិបាលពិតណាស់ មិនងាកចាប់ៗនោះទេ យើងមិនអាចយករូបមន្តសម្លាប់មេមាន់នោះទេ យើងត្រូវធ្វើម៉េចឲ្យមេមាន់នៅរស់ ដើម្បីយកពងទៅនាំឲ្យបងប្អូនប្រជាពលរដ្ឋនេះជាគោលដៅធំ»។
សារនយោបាយរបស់លោក ហ៊ុន ម៉ាណែត នេះ ត្រូវគេមើលឃើញថា កំពុងគំរាមសម្លាប់ជីវិតជនរងគ្រោះ ដូចករណីអ្នកចាញ់បោក លោក ហ៊ី គឹមហុង ជាដើម ដែលជនរងគ្រោះថា មានអ្នកសា្លប់កើនជិត៣០នាក់ហើយ និងអ្នកធ្លាក់ខ្លួនឈឺជាបន្តបន្ទាប់។
ខណៈប្រព័ន្ធតុលាការកប់ចោលយុត្តិធម៌ជនរងគ្រោះជាង២ឆ្នាំទៅនេះ អតីតឧកញ៉ា ហ៊ី គឹមហុង ក៏បានបង្ហោះរូបភាពស្និទ្ធស្នាលជាមួយ លោក ហ៊ុន ម៉ាណែត ក្នុងពិធីទិវាជាតិសហគ្រាសមីក្រូធុនតូច និងមធ្យម កាលពីខែមិថុនា ឆ្នាំ២០២៥ ផងដែរ។
បន្ថែមលើនេះ ថ្មីៗនេះឧក្រិដ្ឋជនរូបនេះ ក៏បានលេចមុខនាំយកស្បៀងអាហារ និងលុយទៅឱ្យកងទ័ពនៅក្នុងខេត្តព្រះវិហារ ដែលជនរងគ្រោះចោទថា មេឆបោករូបនេះបានយកបញ្ហាព្រំដែនកម្ពុជា-ថៃ ដើម្បីបិទបាំងបទឧក្រិដ្ឋឆបោករបស់ខ្លួន ខណៈលុយទាំងនោះពួកគេថាបានមកពីអំពើបោកប្រាស់ពលរដ្ឋរាប់ពាន់គ្រួសារ។
ជាងនេះទៀត ក្រុមជនរងគ្រោះក៏ធ្លាប់បានទម្លាយលិខិត២ច្បាប់ បង្ហាញថា គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជារាជធានីភ្នំពេញ ដែលមាន លោក ឃួង ស្រេង ជាប្រធានបានបង្កើតសាខាបក្សនៅក្រុមហ៊ុនពិភពដីមាស ក្នុងរាជធានីភ្នំពេញ នៅឆ្នាំ២០២៣ ជ្រើសតាំង លោក ហ៊ី គឺមហុង ជាមេដឹកនាំ។
តំណែងអតីតឧកញ៉ា ហ៊ី គឹមហុង ជាក្បាលម៉ាស៊ីនដឹកនាំដ៏សំខាន់របស់គណបក្សប្រជាជនកម្ពុជាប្រចាំនៅរាជធានីភ្នំពេញ រួមទាំងការបង្ហាញរូបភាពស្និទ្ធនឹងមេដឹកនាំកំពូលនេះហើយ ដែលជនរងគ្រោះចោទថា ធ្វើឱ្យពួកគេស្លាប់ជាបន្តបន្ទាប់ជិត៣០នាក់ ដោយសារប្រព័ន្ធច្បាប់មិនហ៊ានកាត់ទោសមេឆបោករូបនេះ៕
