សហរដ្ឋអាមេរិក បានប្រកាសកាលពីថ្ងៃអង្គារថា នឹងដកខ្លួនពីទីភ្នាក់ងារអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ ព្រោះជឿថា ការចូលរួមនេះមិនស្ថិតក្នុងផលប្រយោជន៍របស់ប្រទេស និងថាទីភ្នាក់ងារនេះ និយាយប្រឆាំងអ៊ីស្រាអែល។ នេះបើតាមការផ្សាយរបស់នីគីអេស៊ា(NIKKIE ASIA)។
NIKKIE ASIA រាយការណ៍នៅថ្ងៃទី២២ ខែកក្កដា ឆ្នាំ២០២៥ថា ការសម្រេចចិត្តនេះ កើតឡើងត្រឹមរយៈពេល២ឆ្នាំ បន្ទាប់ពីសហរដ្ឋអាមេរិក ចូលជាសមាជិកអង្គការយូណេស្កូ(UNESCO)វិញ អំឡុងការចាកចេញនៅក្នុងឆ្នាំ២០១៨ ក្នុងរដ្ឋបាលដំបូងរបស់ប្រធានាធិបតីអាមេរិក លោក ដូណាល់ ត្រាំ។
អ្នកនាំពាក្យក្រសួងការបរទេស លោកស្រី ថាមី ប្រូស្ស (Tammy Bruce) បាននិយាយនៅក្នុងសេចក្តីថ្លែងការណ៍មួយថា ការសម្រេចរបស់អង្គការយូណេស្កូ(UNESCO) ដើម្បីទទួលស្គាល់ រដ្ឋប៉ាលេស្ទីនជាសមាជិក គឺមានបញ្ហាខ្ពស់ ដែលផ្ទុយទៅនឹងគោលនយោបាយរបស់សហរដ្ឋអាមេរិក និងបានចូលរួមចំណែកការរីករាលដាលក្នុងការប្រឆាំងអ៊ីស្រាអែលនៅក្នុងអង្គការ។
ការសម្រេចចិត្តដែលត្រូវបានរាយការណ៍ដំបូងដោយកាសែត ដឹញូយ៉កផុស(the New York Post) នឹងចូលរួមជាធរមាននៅចុងខែធ្នូ ឆ្នាំ២០២៦។ នេះជាលើកទី៣ ហើយដែលសហរដ្ឋអាមេរិកបានចាកចេញពីអង្គការយូណេស្កូ(UNESCO) ដែលមានទីតាំងក្នុងទីក្រុងប៉ារីស(Paris) និងលើកទីពីរក្នុងអំឡុងរដ្ឋបាលលោក ត្រាំ ។ សហរដ្ឋអាមេរិក បានចូលរួមជាមួយទីភ្នាក់ងារនេះម្តងទៀតក្នុងឆ្នាំ២០២៣ ក្រោមរដ្ឋបាលលោក បៃឌិន(Biden)។
អគ្គនាយកអង្គការយូនេស្កូ លោកស្រី អូឌ្រី អាហ្សូលេ(Audrey Azoulay) បាននិយាយថា លោកស្រីមានការសោកស្តាយយ៉ាងខ្លាំង ចំពោះការសម្រេចចិត្តរបស់សហរដ្ឋអាមេរិក ប៉ុន្តែលោកស្រីទទូចថា ទីភ្នាក់ងារបានរំពឹងទុកហើយ និងបានត្រៀមរួចរាល់សម្រាប់ការកើតឡើងនេះ។ លោកស្រីក៏បានបដិសេធចំពោះការចោទប្រកាន់ពីការលម្អៀងប្រឆាំងនឹងអ៊ីស្រាអែល។
យ៉ាងណា ការដកខ្លួនរបស់សហរដ្ឋអាមេរិក ទំនងប៉ះពាល់ដល់អង្គការយូណេស្កូ(UNESCO) ព្រោះថាសហរដ្ឋអាមេរិកផ្តល់ចំណែកគួរឱ្យកត់សម្គាល់នៃថវិការបស់ទីភ្នាក់ងារនេះ។ ប៉ុន្តែអង្គការនេះ គួរតែអាចទប់ទល់បាន។ អង្គការយូណេស្កូ បានធ្វើមូលនិធិច្រើនប្រភពផ្សេងគ្នានៅក្នុងឆ្នាំថ្មីៗនេះ ហើយការរួមចំណែករបស់សហរដ្ឋអាមេរិកបានថយចុះត្រឹមតែ ៨% នៃថវិកាសរុបរបស់ទីភ្នាក់ងារនេះ៕
