យ៉ាងហោចណាស់ មានជនជាតិថៃចំនួន ១២នាក់ ដែលភាគច្រើនជាជនស៊ីវិលបានស្លាប់ ក្នុងការបាញ់ប្រហារ ខណៈទាហានថៃនិងកម្ពុជាប៉ះទង្គិចគ្នា នៅតំបន់ព្រំដែនដែលមានជម្លោះ។ នេះបើតាមការចុះផ្សាយរបស់សារព័ត៌មានប៊ីប៊ីស៊ី(BBC)។
BBC បានរាយការណ៍នៅថ្ងៃទី ២៤ ខែកក្កដា ឆ្នាំ២០២៥នេះថា កម្ពុជារងការចោទប្រកាន់ពីបទបាញ់គ្រាប់រុក្កែតចូលទៅក្នុងភូមិថៃ និងវាយប្រហារមន្ទីរពេទ្យ ខណៈថៃបានធ្វើការវាយប្រហារផ្លូវអាកាសលើគោលដៅយោធាកម្ពុជា។
ថៃបានបិទព្រំដែនទាំងស្រុងជាមួយប្រទេសកម្ពុជា បន្ទាប់ពីបានប្រាប់ទៅជនជាតិថៃរបស់ខ្លួនឱ្យចាកចេញពីទីនោះ ខណៈដែលកម្ពុជាបានបន្ទាបទំនាក់ទំនងរបស់ខ្លួនជាមួយទីក្រុងបាងកក ដែលពួកគេបានចោទប្រកាន់ថាបានប្រើប្រាស់កម្លាំងហួសហេតុ។ ការប្រយុទ្ធគ្នានៅថ្ងៃព្រហស្បតិ៍នេះ ជាការកើនឡើងនៃជម្លោះដ៏រ៉ាំរ៉ៃរវាងប្រទេសជិតខាងអាស៊ីអាគ្នេយ៍ទាំងពីរ។
គួររំឭកថា ក្រោយផ្ទុះអាវុធ កម្ពុជាបានអំពាវនាវឱ្យសហគមន៍អន្តរជាតិថ្កោលទោសទាហានថៃ ដែលថា បានបើកការឈ្លានពានកម្ពុជា ដោយចាត់ទុកថាថៃជាអ្នកឈ្លានពានកម្ពុជា រំលោភធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិ។
សម្រាប់កម្ពុជា កម្លាំងប្រដាប់អាវុធថៃ បានបើកការវាយប្រហារ គ្មានមូលហេតុ គិតទុកជាមុន និងដោយចេតនា មកលើទីតាំងឈរជើងរបស់កម្ពុជា នៅតាមតំបន់ព្រំដែន រួមទាំង ប្រាសាទតាមាន់ធំ ប្រាសាទតាក្របី និងមុំបី ក្នុងខេត្តព្រះវិហារ និងខេត្តឧត្តរមានជ័យ។
ទង្វើឈ្លានពាននេះ គឺជាការរំលោភបំពានយ៉ាងគឃ្លីន និងធ្ងន់ធ្ងរលើច្បាប់អន្តរជាតិ រួមទាំងគោលការណ៍ជាមូលដ្ឋានដែលមានចែងក្នុងធម្មនុញ្ញអង្គការសហប្រជាជាតិ និងធម្មនុញ្ញអាស៊ាន ដែលហាមឃាត់ការគំរាមកំហែង ឬការប្រើប្រាស់កម្លាំងប្រឆាំងនឹងបូរណភាពទឹកដី និងឯករាជ្យភាពនយោបាយរបស់រដ្ឋណាមួយ៕
