មេដឹកនាំកម្ពុជាបានប្រកាសច្រានចោលភ្លាមៗ ទៅនឹងការចុះផ្សាយដែលថាលោកបានចាកចេញទៅប្រទេសចិន ខណៈកងទ័ពកម្ពុជាកំពុងវាយបកទប់ទល់នឹងការឈ្លានពានរបស់ថៃនោះ។ នេះបើតាមសារដែលលោកបង្ហោះលើហ្វេសប៊ុករបស់លោកនៅថ្ងៃទី២៤ ខែកក្កដានេះ។
បើតាមលោក ហ៊ុន សែន នៅមុននេះបន្តិច កាសែតថៃ បានចេញផ្សាយថា លោកបានចាកចេញពីកម្ពុជាទៅកាន់ប្រទេសចិន ខណៈលោកកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀត ជាមួយនាយករដ្ឋមន្ត្រី រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់ ដើម្បីវាយចោរថៃឈ្លានពាន។
លោកគូសបញ្ជាក់ថា លោកមិនរត់ទៅណាទេ កុំឱ្យពលរដ្ឋខ្មែរមានការព្រួយបារម្ភ។ តែផ្ទុយទៅវិញ លោកថា ពេលនេះ លោកនៅបន្តអង្គុយចាប់តាំងពីពេលដែលមេបញ្ជាការភូមិភាគទី២របស់ថៃ ថានឹងបិទច្រកចូលប្រាសាទតាមាន់ធំ។
បន្ថែមពីនេះ លោកថា មេបញ្ជាការយោធភូមិភាគ២របស់ថៃនេះហើយ ជាអ្នកបង្កសង្រ្គាមនេះឡើង តាមរយៈការបញ្ជាឲ្យបិទប្រាសាទតាមាន់ធំ កាលពីម្សិលមិញ និងបើកការបាញ់ប្រហារមកលើកងទ័ពកម្ពុជា នាព្រឹកមិញនេះ។ លោកថា មេបញ្ជាការយោធភូមិភាគ២រូបនេះហើយ ដែលធ្លាប់បានព្រមានថា នឹងវាយកម្ពុជាដោយប្រើពេលត្រឹម៣ថ្ងៃ។
មេដឹកនាំកម្ពុជា បញ្ជាក់ក្នុងសម្តីដើមថា៖ «ខ្ញុំក៏ចង់ស្គាល់យុទ្ធសាស្ត្រត្រឹម៣ថ្ងៃរបស់គាត់ដែរ។ ការចុះផ្សាយដែលចរិតកុហកនៃអ្នកនយោបាយថៃ និងសារព័ត៌មានថៃ វាបានក្លាយទៅជាវប្បធម៌ធម្មតារបស់ពួកគេទៅហើយ សូមបន្តបោកប្រាស់តទៅទៀតចុះ»។
ជុំវិញបញ្ហានេះ អ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា បានបញ្ជាក់ថា ពេលនេះ កម្ពុជា កាន់កាប់ប្រាសាទតាក្របី ១០០ភាគរយ កាន់កាប់តំបន់មុំបី ដោយជោគជ័យ និងរក្សាកាន់កាប់នៅតំបន់ប្រាសាទតាមាន់ធំ ដោយមិនមានការដកថយសូម្បីមួយជំហាន៕
