អ្នកនាំពាក្យអង្គការសហប្រជាជាតិ បាននិយាយនៅថ្ងៃព្រហស្បតិ៍ថា អគ្គលេខាធិការអង្គការសហប្រជាជាតិ លោក អង់តូនីញូ ហ្គុយតេរេស(Antonio Guterres) បានជំរុញឱ្យភាគីកម្ពុជា និងថៃ អនុវត្តន៍ការអត់ធ្មត់ជាអតិបរិមា។ នេះបើយោងតាមប្រភពសារព័ត៌មាន គ្លូបល ថាមស៍ (Global Times)។
យោងតាមគ្លូបល ថាមស៍ (Global Times) បានរាយការណ៍នៅថ្ងៃទី២៥ ខែកក្កដា ឆ្នាំ២០២៥នេះថា លោក ហ្វាហាន់ ហាក់(Farhan Haq) អ្នកនាំពាក្យរបស់ប្រមុខអង្គការសហប្រជាជាតិហៅកាត់ថា យូអ៊ិន(UN) បាននិយាយនៅក្នុងសន្និសីទប្រចាំថ្ងៃមួយថា អគ្គលេខាធិការកំពុងតាមដានអំពីរបាយការណ៍ដោយក្តីបារម្ភនៃការប៉ះទង្គិចគ្នាដោយកងកម្លាំងប្រដាប់អាវុធនៅព្រំដែនរវាងកម្ពុជានិងថៃ។
អគ្គលេខាធិការអង្គការសហប្រជាជាតិ ជំរុញឱ្យភាគីទាំងពីរគឺ កម្ពុជា និងថៃ អត់ធ្មត់ជាអតិបរិមា និងដោះស្រាយបញ្ហាតាមរយៈការសន្ទនាក្នុងស្មារតីអ្នកជិតខាងល្អ ដើម្បីស្វែងរកដំណោះស្រាយយូរអង្វែងចំពោះជម្លោះនេះ។
គួររំឮកថា ស្ថានការណ៍នៅព្រំដែនរវាងកម្ពុជា-ថៃ បានកើនឡើងបន្ទាប់ពីការប៉ះទង្គិចគ្នា នៅថ្ងៃព្រហស្បតិ៍ ភាគីទាំងពីរបានដោះដូរការចោទប្រកាន់គ្នា បន្ទាប់ពីស្ថានការណ៍កាន់តែតានតឹង ហើយនាយករដ្ឋមន្ត្រីប្រទេសកម្ពុជា លោក ហ៊ុន ម៉ាណែត បានស្នើឱ្យក្រុមប្រឹក្សាសន្តិសុខអង្គការសហប្រជាជាតិ កោះប្រជុំបន្ទាន់មួយដើម្បីពិភាក្សាពីបញ្ហានេះ។
ជាមួយគ្នានេះដែរ ប្រភព ដឹ ហ្គាឌៀន(the Guardian) បានរាយការណ៍នៅថ្ងៃទី២៥ ខែកក្កដា ឆ្នាំ២០២៥នេះថា ប្រភពការទូតបានប្រាប់ទៅកាន់ អាអេ្វប៉េ(AFP)ថា ក្រុមប្រឹក្សាសន្តិសុខអង្គការសហប្រជាជាតិ នឹងបើកកិច្ចប្រជុំបន្ទាន់មួយ នៅថ្ងៃសុក្រនេះ ជុំវិញករណីការប៉ះទង្គិចគ្នាតាមព្រំដែនរវាងកម្ពុជា-ថៃ៕
