មន្ត្រីអ្នកនាំពាក្យរបស់រដ្ឋាភិបាលកម្ពុជា បានលើកឡើងអំពីការអំពាវនាវរបស់កម្ពុជា ទៅកាន់ប្រទេសថៃ ឱ្យគោរពបទឈប់បាញ់គ្នាជាបន្ទាន់ ទៅតាមការសន្យាជាមួយប្រធានាធិបតីសហរដ្ឋអាមេរិក និងការសម្របសម្រួលរបស់ប្រធានអាស៊ាន ក៏ដូចជាស្របទៅតាមការអំពាវនាវរបស់សហគមន៍អន្តរជាតិ។
ក្នុងសន្និសីទសារព័ត៌មាននៅព្រឹកថ្ងៃទី២៨ ខែកក្កដា ឆ្នាំ២០២៥នេះ លោក ប៉ែន ប៉ូណា ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានថ្លែងថា បើទោះបីមានការសម្របសម្រួលពីប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបានសន្ទនាតាមទូរស័ព្ទជាមួយនាយករដ្ឋមន្ត្រីកម្ពុជា និងថៃ កាលពីថ្ងៃម្សិលមិញ ព្រមទាំងការសម្របសម្រួលពីនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) កាលពីពេលថ្មីៗនេះ ដែលស្នើកងទ័ពកម្ពុជា និងថៃឱ្យមានបទឈប់បាញ់គ្នាជាបន្ទាន់ក៏ដោយ ប៉ុន្តែកងទ័ពថៃ នៅតែបន្តបាញ់ប្រហារមកលើកងទ័ពកម្ពុជាដដែល គិតមកដល់ព្រឹកព្រលឹមថ្ងៃចន្ទនេះ។
លោក ប៉ែន បូណា ថ្លែងថា៖ «អ្វីជាការកត់សម្គាល់ពីថ្ងៃម្សិលមិញ[ថ្ងៃទី២៧ ខែកក្កដា]នេះ កងទ័ពថៃនៅតែបន្តវាយប្រហារមកលើកងទ័ពកម្ពុជា ឥតឈប់ឈរទេ រហូតមកដល់ពេលនេះ[…] សំណើរបទឈប់គ្នាជាបន្ទាន់ គឺសមស្របណាស់ទៅនឹងអ្វីដែលកម្ពុជាចង់បាន ព្រោះយើងដឹងទាំងអស់គ្នាហើយថា កម្ពុជាឈរនៅខាងសន្តិភាព កម្ពុជាគោរពច្បាប់អន្តរជាតិ នេះជាជំហរឥតមានការប្រែប្រួលរបស់កម្ពុជា»។
នៅថ្ងៃទី២៦ ខែកក្កដា ម៉ោងនៅសហរដ្ឋអាមេរិក និងត្រូវនឹងថ្ងៃទី២៧ ខែកក្កដា ម៉ោងនៅកម្ពុជា លោកប្រធានាធិបតីសហរដ្ឋអាមេរិក ដូណាល់ ត្រាំ បានសរសេរលើបណ្ដាញសង្គម អ៊ិច (X social media) ថា លោកបានទូរសព្ទទៅនាយករដ្ឋមន្ត្រីកម្ពុជា និងនាយករដ្ឋមន្ត្រីស្តីទីថៃ ដើម្បីសម្របសម្រួលឱ្យភាគីទាំងពីរ អនុវត្តបទឈប់បាញ់ និងបញ្ចប់សង្គ្រាម ដែលកំពុងឆាបឆេះ ដោយសំអាងថា ការប្រយុទ្ធគ្នានេះ បានធ្វើឱ្យមនុស្សជាច្រើនបានបាត់បង់ជីវិត។
លើសពីនេះ លោក ដូណាល់ ត្រាំ បានរំលេចពីរបាំងពន្ធគយរបស់ខ្លួនលើកម្ពុជា និងថៃ ដែលអាមេរិកគ្រោងចាប់ផ្តើមអនុវត្ត ចាប់ពីថ្ងៃទី១ខែសីហា ឆ្នាំ២០២៥នេះទៅ។
ជាការឆ្លើយតប នាយករដ្ឋមន្ត្រីកម្ពុជា លោក ហ៊ុន ម៉ាណែត បានគូសបញ្ជាក់ទៅប្រធានាធិបតីសហរដ្ឋអាមេរិកវិញថា កម្ពុជាឯកភាពជាមួយសំណើរឱ្យមានការឈប់បាញ់ភ្លាម និងដោយឥតលក្ខខណ្ឌរវាងកងទ័ពទាំងពីរ ខណៈជំហរដូចគ្នានេះ លោកក៏ធ្លាប់បានបញ្ជាក់ជាមួយលោក Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន កាលពីថ្ងៃទី២៤ ខែកក្កដាផងដែរ។ នេះបើតាមការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ក្នុងបណ្តាញសង្គមហ្វេសប៊ុករបស់លោក។
លោកនាយករដ្ឋមន្ត្រី ហ៊ុន ម៉ាណែត បានបន្តលើកឡើងក្នុងហ្វេសប៊ុកទៀតថា នៅថ្ងៃទី២៨ ខែកក្កដា លោកនឹងដឹកនាំគណៈប្រតិភូកម្ពុជា ទៅចូលរួមកិច្ចប្រជុំពិសេសមួយ នៅទីក្រុងកូឡាឡាំពួរ ប្រទេសម៉ាឡេស៊ី ដែលមានម៉ាឡេស៊ីធ្វើជាម្ចាស់ផ្ទះ សហរដ្ឋអាមេរិកជាសហអ្នករៀបចំ និងមានការចូលរួមពីតំណាងចិនផងដែរ។
លោកថា៖ «គោលបំណងនៃកិច្ចប្រជុំនេះ គឺដើម្បីសម្រេចឲ្យមានបទឈប់បាញ់គ្នាបន្ទាន់ ដែលនាយករដ្ឋមន្ត្រីនៃប្រទេសទាំងពីរកម្ពុជានិងថៃ បានឯកភាពគ្នាតាមគំនិតផ្ដួចផ្ដើមរបស់ឯកឧត្តមប្រធានាធិបតីសហរដ្ឋអាមេរិក Donald Trump»។
កាលពីថ្ងៃទី២៤ ខែកក្កដា ឆ្នាំ២០២៥ ការប៉ះទង្គិចគ្នាដោយអាវុធ រវាងកងទ័ពជួរមុខថៃ និងកងទ័ពជួរមុខកម្ពុជា បានកើតឡើងនៅតាមខ្សែបន្ទាត់ព្រំដែន។ នៅថ្ងៃដដែលនោះ កងទ័ពកម្ពុជា ដណ្តើមបានអធិបតេយ្យភាពកម្ពុជាមកវិញ ដោយបានចូលទៅគ្រប់គ្រង ទាំងស្រុង ប្រាសាទតាមាន់ធំ ប្រាសាទតាក្របី និងតំបន់មុំ៣ ស្ថិតក្នុងខេត្តព្រះវិហារ។
ចាប់ពីពេលនោះមក ភាគីថៃ បានបង្កើនការពង្រាយកងទ័ពតាមបន្ទាត់ព្រំដែន ដែលកម្ពុជាចាត់ទុកថា ជាការពង្រីកការឈ្លានពានលើដែលអធិបតេយ្យកម្ពុជា។
គួររំឭកដែរថា នៅថ្ងៃទី២៤ ខែកក្កដា ដែលជាថ្ងៃផ្ទុះអាវុធដំបូង រវាងយោធាថៃ និងកម្ពុជា នាយករដ្ឋមន្ត្រីកម្ពុជា លោក ហ៊ុន ម៉ាណែត ក៏បានផ្ញើលិខិតមួយច្បាប់ទៅក្រុមប្រឹក្សាសន្តិសុខអង្គការសហប្រជាជាតិដើម្បីសុំអន្តរាគមន៍បញ្ចប់ការឈ្លានពានរបស់ថៃ។
ក្រោយមកនៅថ្ងៃទី២៥ ខែកក្កដា កិច្ចប្រជុំបន្ទាន់មួយត្រូវបានធ្វើឡើងនៅក្រុមប្រឹក្សាសន្តិសុខអង្គការសហប្រជាជាតិ ដោយស្ថាប័នអង្គការសហប្រជាជាតិនេះ ស្នើឱ្យភាគីទំាងពីរអត់ធ្មត់ក្នុងកម្រិតខ្ពស់៕
