កម្ពុជានៅថ្ងៃចន្ទនេះ បានបន្តថ្កោលទោសការឈ្លានយ៉ាងកម្រោលរបស់ភាគីថៃ មកលើកដែនអធិបតេយ្យកម្ពុជា និងទាមទារឱ្យថៃ ទទួលខុសត្រូវពីអំពើឧក្រិដ្ឋលើពលរដ្ឋកម្ពុជា ដែលធ្វើការនៅប្រទេសថៃផងដែរ ដោយចាត់ទុកថា ទង្វើនេះ ជាការបំពានយ៉ាងធ្ងន់ធ្ងរ លើច្បាប់អន្តរជាតិ។
អ្នកនាំពាក្យក្រសួងការពារជាតិកម្ពុជា ឱ្យដឹងថា គិតមកដល់ម៉ោង១១ព្រឹកថ្ងៃទី២៨ ខែកក្កដានេះ ទាហានថៃ នៅតែបន្តបាញ់ប្រហារដោយការប្រើប្រាស់អាវុធធុនធ្ងន់គ្រប់ប្រភេទ យ៉ាងកម្រោល ឃោរឃៅ និងព្រៃផ្សៃបំផុត ចូលទឹកដីកម្ពុជា ដោយមិនញញើតនឹងច្បាប់អន្តរជាតិឡើយ។
ក្នុងសន្និសីទសារព័ត៌មានស្តីពី «បច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា» អ្នកស្រី ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានថ្លែងថា ទាហានថៃ បានបន្តវាយប្រហារដោយសព្វាវុធធុនធ្ងន់ និងទ័ពថ្មើរជើង មកលើទឹកដីកម្ពុជា នៅចំណុចតំបន់ប្រាសាទតាមាន់ធំ ប្រាសាទតាក្របី និងថ្មដូន។
អ្នកស្រីបន្តថា ក្នុងការវាយប្រហារមកលើអធិបតេយ្យភាពកម្ពុជានោះ កងទ័ពថៃ បានប្រើប្រាស់នូវកាំភ្លើងត្បាល់ កាំភ្លើងធំ និងយន្តហោះបាញ់គ្រាប់រ៉ុក្កែត F-16 ជាដើម ដែលបង្កផលប៉ះពាល់ និងការគំរាមកំហែងយ៉ាងខ្លាំងដល់កម្ពុជា។
អ្នកស្រីថា៖ «មកដល់ម៉ោងនេះ ដែលនាងខ្ញុំឈរថ្លែងនៅទីនេះ ភាគីថៃនៅបន្តវាយលុកយ៉ាងកម្រោង និងឆេះសន្ធោសន្ធៅនៅឡើយ ចំពោះកម្លាំងប្រដាប់អាវុធកម្ពុជា យើងនៅតែបន្តឈរយ៉ាងរឹងម៉ាំ តស៊ូយ៉ាងស្វិតស្វាញក្នុងការការពារដែនអធិតេយ្យ និងបូរណភាពទឹកដី របស់ខ្លួនដោយអង់អាចក្លាហានជាទីបំផុត»។
បើតាមអ្នកស្រី ម៉ាលី សុជាតា នៅវេលាម៉ោង ៩និង៤០នាទីព្រឹកនេះដែរ បើតាមព័ត៌មាននានា គឺខាងថៃ មានការផ្លាស់ប្តូរមេបញ្ជាការទ័ពមួយចំនួន ខណៈសភាពការណ៍នៅព្រំដែនសមុទ្រ នៅមានសភាពស្ងប់ស្ងាត់ធម្មតា។
អ្នកនាំពាក្យក្រសួងការពារជាតិកម្ពុជារូបនេះ ចាត់ទុកការបន្តឈ្លានពានរបស់កងទ័ពថៃ មកលើដែនអធិបតេយ្យភាពកម្ពុជា ថាជាអំពើព្រៃផ្សៃ ឃោរឃៅ អមនុស្សធម៌ និងជាការរំលោភបំពានទៅលើច្បាប់អន្តរជាតិ។
អ្នកស្រី ម៉ាលី សុជាតា ថ្លែងថា៖ «ការប្រើប្រាស់សព្វាវុធធន់ធ្ងរគ្រប់ប្រភេទរបស់ថៃ និងការដាក់ពង្រាយទាហានដ៏ច្រើនលើសលុប ដើម្បីទន្ទ្រានយកទឹកដីកម្ពុជា គឺជាបំពានដោយមិនញញើតចំពោះធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងគោលការណ៍ជាមូលដ្ឋាននៃច្បាប់អន្តរជាតិ។ សកម្មភាពដែលគ្មានទំនួលខុសត្រូវ និងខុសច្បាប់បែបនេះ បង្កគ្រោះថ្នាក់យ៉ាងធ្ងន់ធ្ងរបំផុត មិនត្រឹមតែសម្រាប់សន្តិភាព និងស្ថិរភាពក្នុងតំបន់ប៉ុណ្ណោះទេ ប៉ុន្តែថែមទាំងជាមូលដ្ឋាននៃសណ្តាប់ធ្នាប់អន្តរជាតិផងដែរ»។
ក្រៅពីការឈ្លានពានលើដែនអធិបតេយ្យភាពកម្ពុជា ពីសំណាក់យោធាថៃ អ្នកនាំពាក្យក្រសួងការពារជាតិកម្ពុជា ក៏បានឱ្យដឹងដែរថា មានពលករខ្មែរមួយចំនួននៅប្រទេសថៃ បានរងនូវការធ្វើទុក្ខបុកម្នេញពីក្រុមជ្រុលនិយមថៃផងដែរ។ ការណ៍នេះ អ្នកស្រីបានអំពាវនាវឱ្យរដ្ឋាភិបាលថៃ ចាត់វិធានការជាបន្ទាន់ ដើម្បីការពារពលករខ្មែរនៅប្រទេសថៃ និងចាត់វិធានការទៅលើជនល្មើសដែលធ្វើបាបពលករខ្មែរផងដែរ។
អ្នកស្រី សុជាតា បានបញ្ជាក់ថា៖ «យើងទទួលបានរបាយការណ៍ជាច្រើន ពាក់ព័ន្ធនឹងការវាយដំ គំរាមកំហែងពីសំណាក់ក្រុមជ្រុលនិយមថៃ លើពលរដ្ឋខ្មែរនៅទីនោះ ដែលជាទង្វើអមនុស្សធម៌ ខុសច្បាប់ និងមិនអាចអត់ឱនឲ្យបាន។ កម្ពុជាសូមអំពាវនាវដល់អាជ្ញាធរថៃ ចាត់វិធានការជាបន្ទាន់ ដើម្បីការពារប្រជាពលរដ្ឋខ្មែរនៅទីនោះ ក៏ដូចជាជនល្មើសឲ្យទទួលខុសត្រូវចំពោះអំពើឧក្រិដ្ឋរបស់ខ្លួន ដោយផ្តល់យុត្តិធម៌ និងតម្លាភាពជូនពលរដ្ឋខ្មែរ»។
គួរបញ្ជាក់ថា ការផ្ទុះអាវុធរវាងកងទ័ពកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ និងបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់។
បើតាមអ្នកនាំពាក្យក្រសួងការពារជាតិកម្ពុជា គិតត្រឹមថ្ងៃទី២៧ ខែកក្កដា ឆ្នាំ២០២៥ មានជនភៀសសឹកសរុប ៣៩ ៨២៨គ្រួសារ ស្មើនឹង១៣ ៤៧០៧នាក់ ដែលត្រូវបានជម្លៀសទៅកាន់ទីកន្លែងសុវត្ថិភាព និងផ្ទះសាច់ញាតិរបស់ពួកគេ ក្នុងនោះមានទាំងស្ត្រី ស្ត្រីមានផ្ទៃពោះ កុមារ និងជនចាស់ជរាផងដែរ។
ប្រភពដដែលបន្តថា ការឈ្លានពានរបស់ថៃ ក៏បានធ្វើឱ្យសាលារៀនចំនួន ៦០០ ត្រូវបិទទ្វារនៅខេត្តចំនួន៥ ដែលប៉ះពាល់ដល់សិស្សសរុបប្រមាណ ១៥ម៉ឺននាក់ និងគ្រូបង្រៀនចំនួន ៦ពាន់នាក់។
ដោយឡែកសម្រាប់ស្ថានភាពពលករវិញ អ្នកស្រី សុជាតា ឱ្យដឹងថា ចាប់តាំងពីថ្ងៃទី២៤ ខែកក្កដា ដល់ថ្ងៃទី២៧ ខែកក្កដា មានពលករខ្មែរដែលធ្វើការនៅប្រទេសថៃ បានវិលត្រឡប់មកមាតុប្រទេសវិញចំនួន ៣៩ ៧២៨នាក់ ខណៈនៅថ្ងៃចន្ទនេះ តាមការព្យាករណ៍អាចមានពលករប្រមាណ ១៥ម៉ឺននាក់ទៀត នឹងត្រឡប់មកកម្ពុជាវិញ៕
