ក្រសួងការពារជាតិកម្ពុជា បានបដិសេធដំណឹងដែលចុះផ្សាយថា នៅច្រកតាថាវ និងច្រកជាំតែ ជិតប្រាសាទព្រះវិហារ នៅថ្ងៃអង្គារនេះ យោធាថៃបានចាប់យោធាខ្មែរ ធ្វើជាចំណាប់ខ្មាំងប្រមាណ ១០នាក់ ដោយថា ជារឿងមិនពិត ហើយថា បានបញ្ជូលឈ្មោះអ្នករាយការណ៍នោះ ទៅក្រសួងព័ត៌មានពិនិត្យរួចរាល់ហើយ។
ការច្រានចោលនេះ ចំពេលថ្នាក់យុទ្ធភូមិភាគយោធាកម្ពុជា និងយោធាថៃ បានបន្តជួបសន្ទនាគ្នា ដើម្បីបើកផ្លូវឱ្យមានដំណោះស្រាយ និងភាពតានតឹងផ្នែកយោធាជុំវិញជម្លោះព្រំដែន ក្រោមបទឈប់បាញ់។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បានប្រាប់ វីអូឌី នៅថ្ងៃទី២៩ ខែកក្កដា ឆ្នាំ២០២៥នេះថា លោកស្រីមិនទទួលបានដំណឹងស្តីពីយោធាថៃចាប់យោធាកម្ពុជា ធ្វើជាចំណាប់ខ្មាំង ក្នុងគោលដៅដូចដែលសារព័ត៌មានអនឡាញផ្សព្វផ្សាយនោះទេ។
ម្យ៉ាងវិញទៀត ដើម្បីប្រាកដថារឿងនេះពិតកម្រិតណា លោកស្រីថា បានបញ្ជូនឈ្មោះអ្នករាយការណ៍នោះទៅក្រសួងសាមី ដែលអនុវត្តលើកិច្ចការព័ត៌មាននេះ ពិនិត្យក្នុងគោលបំណងស្វែងរកភាពជាក់ស្តែង។
អ្នកស្រីថា៖ «ខ្ញុំបានបញ្ជូនឈ្មោះអ្នកសារព័ត៌មាននេះ ឱ្យទៅក្រសួងព័ត៌មាន ឱ្យពិនិត្យហើយ មិនដឹងបានប្រភពមកពីណាទេ»។
អ្នកយកព័ត៌មានអនឡាញម្នាក់មកពីអង្គភាព CCN TV បានរាយការណ៍ថា នៅព្រឹកថ្ងៃទី២៩ ខែកក្កដា ឆ្នាំ២០២៥នេះ យោធាថៃបានចូលមកក្នុងទឹកដីកម្ពុជា ត្រង់ភូមិសាស្រ្តច្រកតាថាវ និងច្រកជាំតែ ក្បែរប្រាសាទព្រះវិហារ រួចហើយបានចាប់យោធាកម្ពុជាមួយចំនួន ធ្វើជាចំណាប់ខ្មាំង។ ប្រភពបន្តថា ក្នុងពេលកម្ពុជាអនុវត្តដោយហ្មត់ចត់ នូវវិធានដែលភាគីទាំងពីរបានព្រមព្រៀងគ្នារួចហើយ និងគ្មានអាវុធនៅក្នុងដៃស្រាប់ ត្រូវបានយោធាថៃធ្វើសកម្មភាពដោយបំពាន ប្រឆាំងគោលការណ៍នៃបទឈប់បាញ់នេះ។
លោកថា៖ «បងប្អូនប្រិយមិត្តខ្ញុំថាមែនៗ ដំណឹងបន្ទាន់បងប្អូន ឃើញថានៅច្រកតាថាវ និងច្រកជាំតែ កងកម្លាំងរបស់យើងបានទៅចាប់ដៃសួស្តីទាហានថៃ ប៉ុន្តែអ្វីដែលយើងនឹកស្មានមិនដល់ គឺយោធាថៃរៀបជាក្បួនយុទ្ធសាស្ត្រ ដើម្បីព័ទ្ធចាប់ទាហានយើងបាត់ទៅហើយ នៅពេលវេលានេះម៉ោងនេះតែម្តងបងប្អូន»។
ដូចគ្នានេះដែរ សំឡេងដាច់ឡែកមួយទៀត ដែលត្រូវបានគេចែកចាយនៅលើបណ្តាញសង្គមនៅថ្ងៃនេះ ដែលសំឡេងប្រជាធិបតេយ្យ វីអូឌី ទើបទទួលបាន ឱ្យដឹងថា យោធាកម្ពុជាប្រមាណ១០នាក់ ត្រូវយោធាថៃចូលមកចាប់ខ្លួន នៅក្នុងទឹកដីកម្ពុជា។ តាមរយៈសំឡេងដែលនិយាយ និងត្រូវបានចែកចាយ បញ្ជាក់ថា នៅពេលនេះ យោធាថៃបានគ្រប់គ្រងតំបន់មួយចំនួនរបស់អតីតមេទ័ពខ្មែរក្រហម។ ជាងនេះទៀត ភាគីថៃបានគំរាមកំទេចចំណាប់ខ្មាំង ប្រសិនបើភាគីកម្ពុជា មិនដកទ័ពចេញពីតំបន់មានជម្លោះទេ។
លោកថា៖ «ថៃវាឈប់បាញ់ហើយ ប៉ុន្តែវាប្រើគ្នាវារាប់រយនាក់ចូលមកយកដីខ្មែរ យើងតែម្តងនៅច្រកបុសស្បូវ ជាំតែហ្នឹង គឺផ្ទះតាមុកផ្ទះអី គឺវាចូលគ្រប់គ្រងអស់ហើយបង ដោយសារតែយើងអត់បញ្ជាឱ្យបាញ់ទៀត ប៉ុន្តែយើងមានការអត់ធន់ច្រើន ប៉ុន្តែវាគឃ្លើនចូលមកគ្រប់គ្រង ហើយវាដើរមកដេញយើងទៀត វាថាបើសិនជាយើងមិនចេញ វានឹងកម្ទេចទៀត ពាក្យដែលវានិយាយនេះ ជាចាប់ចំណាប់ខ្មាំងយើងបាន ១០នាក់។ វាចាប់យោធាយើងបាន១០នាក់ហើយ វាគំរាមថាបើយើងថា បើយើងមិនដកថយពីផ្ទះតាមុក នេះទេ វានឹងកម្ទេចផ្ទះនេះចោល»។
ជុំវិញរឿងនេះ សំឡេងប្រជាធិបតេយ្យ វីអូឌី មិនអាចស្វែងរកប្រភពទាក់ទងពីមន្រ្តីយោធាកម្ពុជា ដែលឈរ នៅគោលដៅច្រកតាថាវ និងច្រកជាំតែ បាននៅឡើយទេ គិតត្រឹមថ្ងៃទី២៩ ខែកក្កដានេះ។
បើទោះជាបែបណា គោលការណ៍នៃបទឈប់បាញ់ ក្រោមការសម្របសម្រួលដោយប្រធានអាស៊ានប្តូរវេនរបស់ប្រទេសម៉ាឡេស៊ី និងសហរដ្ឋអាមេរិក គឺតម្រូវឱ្យភាគីជម្លោះ ត្រូវអនុវត្តឱ្យបាននូវបទឈប់បាញ់នេះ គិតត្រឹមយប់ម៉ោង១២ ថ្ងៃទី២៨ ខែកក្កដា។ ប៉ុន្តែមន្រ្តីយោធាដែលឈរជើង នៅគោលដៅភ្នំទ្រព្យ បានអះអាងនៅលើបណ្តាញសង្គមថា មុននឹងភាគីថៃបង្ខំចិត្តឈប់បាញ់ ពួកគេបានព្យាយាមបាញ់សម្រុកទាំងថ្មើរជើង កាំភ្លើងគាំទ្រ យន្តហោះ និងផ្សេងពុល ខ្លាំងក្លាបំផុត។
មិនតែប៉ុណ្ណោះ មកដល់ពេលនេះ សារព័ត៌មានក្នុងស្រុករបស់ថៃ រួមទាំងស្ថាប័នជួរមុខ ដូចជា កាសែត បាងកកប៉ុស្តិ៍ជាដើម នៅបន្តចុះផ្សាយបែបញុះញង់ឱ្យមានហិង្សាកើតឡើងជាថ្មីទៀត។ លើសពីនេះ ស្ថាប័នព័ត៌មានទាំងនោះ ថែមទាំងចោទប្រកាន់ភាគីកម្ពុជាទៀតថា មិនបានគោរពស្មារតីនៃបទឈប់បាញ់ ដូចដែលបានព្រមព្រៀងគ្នា កាលពីថ្ងៃទី២៨ ខែកក្កដា នៅឯប្រទេសម៉ាឡេស៊ី នោះថែមទៀតផង។
នៅចំពេលភាពតានតឹងនេះ ហាក់មិនទាន់ស្ងប់ស្ងាត់នៅឡើយ រដ្ឋមន្រ្តីក្រសួងការពារជាតិ បានប្តេជ្ញានឹងនាំអនុព័ន្ធយោធាអមស្ថានទូតប្រចាំកម្ពុជា នឹងពិនិត្យជាក់ស្តែងលើទីតាំងដែលមានជម្លោះ។ ដោយឡែក យោធភូមិភាគកម្ពុជា និងថៃ ក៏បានជួបគ្នានៅថ្ងៃនេះដែរ ហើយភាគីទាំងពីរសន្យារក្សាបទឈប់បាញ់ និងធ្វើឱ្យប្រសើរឡើងនៅតាមខ្សែបន្ទាត់ព្រំដែន ខណៈដែលគណៈកម្មការចម្រុះព្រំដែនទាំងពីរ កំពុងបើកកិច្ចពិគ្រោះយោបល់បន្ត ដើម្បីបើកផ្លូវឱ្យមានដំណោះស្រាយ ក្នុងជម្លោះដោយសព្វាវុធនេះ៕
