ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទ បានគំរាមដាក់ទណ្ឌកម្មជាថ្មីទៀត ទៅលើមហាអំណាច រុស្ស៊ី ដោយទុកពេលយ៉ាងយូរ១២ថ្ងៃទៀត ក្រោមហេតុផលខកចិត្តទៅនឹងលោក វ្លាឌីមៀពូទីន ដែលមិនព្រមចរចា រកការឈប់បាញ់ជាមួយអ៊ុយក្រែន ដែលការណ៍នេះ ធ្វើឱ្យសង្គ្រាមឈ្លានរបស់រុស្ស៊ី ទៅលើប្រទេសអ៊ុយក្រែន បានអូសបបន្លាយអស់រយៈពេល ៣ឆ្នាំកន្លះ។
នីគីអេស៊ា(NIKKIE ASIA) បានរាយការណ៏នៅថ្ងៃទី២៨ ខែកក្កដា ឆ្នាំ២០២៥ថា លោក ត្រាំ បានគំរាមកំហែងទាំងការដាក់ទណ្ឌកម្មលើរុស្សី និងអ្នកទិញការនាំចេញរបស់រុស្សី បើមិនបញ្ចប់សង្រ្គាមនេះ។ ការកំណត់កាលបរិច្ឆេទថ្មីនេះ បង្ហាញថា ប្រធានាធិបតីសហរដ្ឋអាមេរិក បានត្រៀមខ្លួនដើម្បីឆ្ពោះទៅរកការគំរាមទាំងនោះ បន្ទាប់ពីការស្ទាក់ស្ទើរកាលពីមុន។
ប្រភពបន្តថា ការថ្លែងនៅស្កុតឡែន ជាកន្លែងដែលគាត់កំពុងជួបប្រជុំជាមួយមេដឹកនាំសហភាពអឺរ៉ុប និងលេងកីឡាកូនហ្គោល លោក ត្រាំ បាននិយាយថា លោកបានខកចិត្តជាមួយនឹង លោក ពូទីន ហើយបានកាត់បន្ថយរយៈពេល ៥០ថ្ងៃ ដែលលោកបានកំណត់លើបញ្ហាកាលពីដើមខែនេះ។
យ៉ាងណាក៏ដោយ អ៊ុយក្រែន បានស្នើជួបប្រជុំរវាង លោក ពូទីន (Putin) និងលោក ហ្សេលេស្គី(Zelenskyy) មុនដាច់ខែសីហា។ ប៉ុន្តែវិមានក្រឹមឡាំង បាននិយាយថា ពេលវេលាកំណត់ដូចមិនទំនង ហើយការជួបគ្នាអាចគ្រាន់តែជាជំហ៊ានចុងក្រោយ ដើម្បីសន្តិភាពប៉ុណ្ណោះ។
ជាមួយគ្នានេះដែរ ក្រសួងការបរទេសរុស្សី បាននិយាយកាលពីថ្ងៃសៅរ៍ថា ប្រសិនបើលោកខាងលិចចង់បានសន្តិភាពពិត លោកខាងលិចគួរតែបញ្ឈប់ការផ្គត់ផ្គង់អាវុធដល់ទីក្រុងគីវ(Kyiv)។
គួររំឭកថា លោក ត្រាំ សម្តែងការខឹងក្រេវក្រោធជាមួយ លោក ពូទីន ម្តងហើយម្តងទៀត ចំពោះការវាយប្រហារលើអ៊ុយក្រែន ទោះបីជាសហរដ្ឋអាមេរិកខំប្រឹងប្រែងដើម្បីបញ្ចប់សង្គ្រាមក៏ដោយ។ លោក ត្រាំ បានជោគជ័យលើផ្នែកផ្សេងនៃពិភពលោក ដែលលោក ត្រាំ បានជួយសម្របសម្រួលកិច្ចព្រមព្រៀងសន្តិភាព និងត្រូវបានមេដឹកនាំមួយចំនួន លើកឡើងថា លោក ត្រាំ សមនឹងទទួលបានពានរង្វាន់ណូប៊ែលសន្តិភាព(Nobel Peace Prize)៕
