ក្រុមអង្កេតការអនុព័ន្ធយោធា នឹងបង្កើតឡើង ដើម្បីចុះពិនិត្យផ្ទៀងផ្ទាត់ការអនុវត្តបទឈប់បាញ់ ជុំវិញជម្លោះព្រំដែនកម្ពុជា-ថៃ ក្រោយបទឈប់បាញ់បានចូលជាធរមានកាលពីថ្ងៃទី២៨ ខែកក្កដា តាមយន្តការអាស៊ាន ដែលផ្តួចផ្តើមគំនិត ដោយប្រធានាធិបតីសហរដ្ឋអាមេរិក លោក ដូណាល់ ត្រាំ។
បើតាមអ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ថ្លែងក្នុងសន្និសីទសារព័ត៌មាន នៅក្នុងរាជធានីភ្នំពេញ នាថ្ងៃទី៣០ខែកក្កដានេះ លទ្ធផលជាវិជ្ជមានដែលទទួលបាន ក្រោយបទឈប់បាញ់ចូលជាធរមាន រយៈពេល១ថ្ងៃទៅនេះ គឺការអនុវត្តនូវកិច្ចព្រមព្រៀងបទឈប់បាញ់ ទទួលបានជោគជ័យជាជំហានៗ ភាគីទាំងពីរ បានប្រជុំថ្នាក់ភូមិភាគបានជោគជ័យ។
លើសពីនេះ ប្រទេសម៉ាឡេស៊ី ក្នុងនាមជាប្រធានអាស៊ានបច្ចុប្បន្ន បានបញ្ជូលគណៈប្រតិភូដឹកនាំដោយអគ្គមេបញ្ជាការប្រទេសម៉ាឡេស៊ីមកដល់កម្ពុជា។
នៅថ្ងៃពុធនេះដែរ ក្រសួងការពារជាតិកម្ពុជា បានដឹកនាំបណ្តាអង្គទូតអនុព័ន្ធយោធាបរទេសប្រចាំប្រទេសកម្ពុជា និងអ្នកពាក់ព័ន្ធ នឹងទៅមើលទាំងទីតាំង ទាំងសភាពការណ៍ជាក់ស្តែង នៅព្រំដែនកម្ពុជា-ថៃ រួមទាំងបានកំណត់យកថ្ងៃទី៤ ខែសីហា ឆ្នាំ២០២៥ ដើម្បីប្រជុំគណៈកម្មាធិការព្រំដែនទូទៅ ដែលកម្ពុជានឹងធ្វើជាម្ចាស់ផ្ទៈ។
អ្នកស្រីគូសបញ្ជាក់ថា ជំហានបន្ទាប់ ដើម្បីធានាដល់ការអនុវត្តពេញលេញ និងម៉ឺងម៉ាត់ លើបទឈប់បាញ់ក្រុមអង្កេតការណ៍មួយនឹងត្រូវបង្កើតឡើង ដើម្បីផ្ទៀងផ្ទាត់និងធានាការអនុវត្តបទឈប់បាញ់។
បន្ថែមពីនេះ អគ្គមេបញ្ជាការប្រធានអាស៊ានប្តូរវេនម៉ាឡេស៊ី ដែលកំពុងមានវត្តមាននៅកម្ពុជា នឹងបង្កើតក្រុមអ្នកអង្កេតការណ៍ ដែលមានអនុព័ន្ធយោធាម៉ាឡេស៊ីជាប្រធាន ដើម្បីចេញអង្កេតការណ៍នៅថ្ងៃពុធនេះ នៅទីតាំងមានជម្លោះ ដើម្បីជំរុញការអនុវត្តកិច្ចព្រមព្រៀងបទឈប់បាញ់នេះ ឱ្យទទួលបានលទ្ធផលល្អ។
អ្នកស្រីថា៖ «ឯកឧត្តមអគ្គមេបញ្ជាការកងទ័ពម៉ាឡេស៊ី បានបញ្ជាក់ថា នឹងបង្កើតក្រុមអង្កេតថាចំនួនពីរ ដែលមួយក្រុមជាអនុព័ន្ធយោធាម៉ាឡេស៊ីប្រចាំកម្ពុជាជាប្រធាន ហើយមួយក្រុមទៀតជាអនុព័ន្ធយោធាប្រចាំប្រទេសថៃជាប្រធាន ដើម្បីចេញអង្កេតការណ៍នៅថ្ងៃនេះផងដែរ»។
បន្ថែមពីនេះទៀត ក្រោយជួបជាមួយអគ្គមេបញ្ជាការកងយោធពលខេមរភូមិន្ទកម្ពុជា នៅថ្ងៃនេះ អគ្គមេបញ្ជាការម៉ាឡេស៊ី នឹងចុះទៅតាមបន្ទាត់ព្រំដែនកម្ពុជា-ថៃ ដើម្បីធ្វើការជាមួយអគ្គមេបញ្ជាការកងទ័ពភូមិន្ទថៃ និងកម្ពុជា ដែលឈរជើងនៅតាមព្រំដែនផងដែរ ក្នុងបំណងធ្វើយ៉ាងណាឱ្យភាគីទាំងពីរទទួលបានសន្តិភាពពិត និងយូរអង្វែង ប្រកបដោយការជឿទុកចិត្តគ្នាទៅវិញទៅមក។
អ្នកស្រីសង្កត់ធ្ងន់ថា កម្ពុជាប្រកាន់ភ្ជាប់នូវគោលការណ៍ច្បាប់អន្តរជាតិ ការរួមរស់នៅជាមួយគ្នាដោយសន្តិភាព និងកិច្ចសហប្រតិបត្តិការពហុភាគី ក្នុងការដោះស្រាយបញ្ហាព្រំដែនដោយយុត្តិធម៌ និងយូរអង្វែងចំពោះស្ថានការណ៍នេះ។
អ្នកស្រីថា៖ «ដើម្បីបង្ហាញពីភាពម៉ឺងម៉ាត់របស់កម្ពុជាថៃនេះ ថ្នាក់ដឹកនាំក្រសួងការពារជាតិកម្ពុជាបានដឹកនាំបណ្តាអង្គទូតអនុព័ន្ធយោធាបរទេសប្រចាំព្រះរាជាណាចក្រកម្ពុជា និងអ្នកពាក់ព័ន្ធ ដើម្បីទៅឃ្លាំមើលទាំងទីតាំង ទាំងសភាពការណ៍ជាក់ស្តែងនៅលើបញ្ហាព្រំដែនកម្ពុជា-ថៃ ក្នុងនោះក៏មានការបង្ហាញនូវចំណាប់អារម្មណ៍ជាខ្លាំង គាំទ្រនូវសុឆន្ទៈកម្ពុជា ពីសំណាក់អនុព័ន្ធយោធាពីបណ្តាប្រទេសសមាជិកអាស៊ាន និងពីបណ្តាប្រទេសមហាអំណាចមួយចំនួន ចំនួន១៣ប្រទេស»។
ជាងនេះទៅទៀត អ្នកស្រីថា កម្ពុជា ចង់បានព្រំដែនមួយ ជាមួយប្រទេសជិតខាងទាំងអស់ ជាព្រំដែនសន្តិភាព កិច្ចសហប្រតិបត្តិការ និងការអភិវឌ្ឍ។
កិច្ចព្រមព្រៀងបទឈប់បាញ់ កម្ពុជា ថៃ ត្រូវបានធ្វើឡើងនៅប្រទេសម៉ាឡេស៊ី កាលពីថ្ងៃទី២៨ ខែកក្កដាឆ្នាំ២០២៥ ក្រោមការសម្រួបសម្រួលពីប្រធានអាស៊ានប្តូរវេន នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហីម ផ្តួតផ្តើមគំនិត ដោយប្រធានាធិបតីសហរដ្ឋអាមេរិក លោក ដូណាល់ ត្រាំ។
បទឈប់បាញ់ក្រោមយន្តការអាស៊ាននេះ បានធ្វើឡើងក្រោយពីកងទ័ពកម្ពុជាបានប៉ះទង្គិចគ្នាដោយអាវុធ អស់រយៈពេល៥ថ្ងៃ។
កម្ពុជាចោទថា មូលហេតុនៃផ្ទុះអាវុធ ដោយសាតែភាគីថៃបានរំលោភដែនអធិបតេយ្យកម្ពុជា ទំាងកម្រោល រំលោភធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិមួយចំនួនទៀត។
យ៉ាងណា មេដឹកនាំកម្ពុជា បានសម្តែងការអគុណដល់មេដឹកនាំមួយចំនួន រួមទាំងប្រធានាធិបតីអាមេរិក លោក ដូណាល់ ត្រាំ ដែលបានផ្តួចផ្តើមគំនិតឱ្យមានបទឈប់បាញ់ រវាងកម្ពុជានិងថៃ ដោយចាត់ទុកថា សមិទ្ធិផលនៃគំនិតផ្តួចផ្តើមនេះ បានសង្រ្គោះជីវិតមនុស្សរាប់ពាន់ម៉ឺននាក់ពីសង្រ្គាមកម្ពុជា និងថៃ៕
