រដ្ឋាភិបាលកម្ពុជា បានប្រកាសលុបចោលបំណុលរបស់គ្រួសារយុទ្ធជនដែលបានពលី នៅសមរភូមិជួរមុខ ក្រោយមានការអំពាវនាវពីបក្សប្រឆាំង ឱ្យតបស្នងគុណដល់យុទ្ធជនខ្មែរដែលប្រយុទ្ធការពារទឹកដីទប់ទល់ការឈ្លានពានពីប្រទេសថៃ។
បើតាមសេចក្តីណែនាំរបស់ធនាគារជាតិនៃកម្ពុជា នៅថ្ងៃទី៣០ ខែកក្កដានេះ បានឱ្យគ្រឹះស្ថានធនាគារ និងហិរញ្ញវត្ថុ លុបចោលឥណទានចំនួន ១០លានរៀល របស់អតិថិជនជាយោធិនពិការនៅសមរភូមិបច្ចុប្បន្ន និងលុបចោលឥណទានចំនួន៨០លានរៀលរបស់អតិថិជនឬអ្នករួមខ្ចីជាយោធិនពលី។
យ៉ាងណា នៅថ្ងៃដដែលនេះ ទាំងប្រធានព្រឹទ្ធសភា លោក ហ៊ុន សែន និងនាយករដ្ឋមន្រ្តីកម្ពុជា លោក ហ៊ុន ម៉ាណែត បានសរសេរលើបណ្តាញសង្គមជាហូហែរ ដោយអរគុណចំពោះធនាគារមួយចំនួនដែលប្រកាសថា ពួកគេបានសម្រាប់លុបចោលបំណុលទាំងស្រុងហើយដល់យោធិនពលីជីវិត និងអ្នករួមខ្ចី ដែលបានបំពេញប្រតិបត្តិការក្នុងសមរភូមិការពារទឹកដី។
កិច្ចអន្តរាគមន៍របស់រដ្ឋាភិបាលនេះ ក្រោយមានចរន្តជំរុញឱ្យរដ្ឋាភិបាលលុបចោលបំណុលទាំងអស់ដែលគ្រួសារយុទ្ធជននៅសមរភូមិជួរមុខជំពាក់ធនាគារ ដើម្បីសងគុណដល់ពួកគេ។
ក្រុមប្រឹក្សាជាតិតស៊ូដឹកនាំដោយ លោក សម រង្ស៊ី នៅថ្ងៃទី២៩ ខែកក្កដា បានចេញសេចក្តីថ្លែងការណ៍មួយថា ក្រោយមានការប្រឹងប្រែងរបស់អាមេរិក និងប្រទេសម៉ាឡេស៊ី ដោយមានការអង្កេតពីចិន សម្រេចបាននូវបទឈប់បាញ់ កម្ពុជា-ថៃ រដ្ឋាភិបាលកម្ពុជាគួរមានពេលគ្រប់គ្រាន់ ដើម្បីគិតគូរតបស្នងគុណបំណាច់របស់យុទ្ធជនខ្មែរ ដែលកាន់អាវុធក្រាញននៀលប្រយុទ្ធការពារទឹកដីកម្ពុជានៅសមរភូមិជួរមុខ។
ប្រភពនោះថា រដ្ឋាភិបាលកម្ពុជាត្រូវលុបចោលបំណុលទាំងអស់ ដែលគ្រួសារយុទ្ធជនសមរភូមិជួរមុខជំពាក់ធនាគារ ហើយរដ្ឋាភិបាលត្រូវបង់សងជំនួសវិញ។
លើសពីនេះ រដ្ឋាភិបាលត្រូវរៀបចំតម្លើងប្រាក់ខែ បុណ្យស័ក្តិ ក្នុងលក្ខខណ្ឌពិសេស និងសង់ផ្ទះជូនពួកគាត់ និងគ្រួសារឲ្យស័ក្តិសមពលិកម្មការពារទឹកដី។ ដោយឡែក យុទ្ធជនពលី រដ្ឋាភិបាលគួរប្រគល់ប្រាក់បំណាច់ដល់គ្រួសារពួកគាត់ យ៉ាងតិចមួយគ្រួសារ ១០ម៉ឺនដុល្លារអាមេរិក។
បន្ថែមលើនេះ ក្រុមប្រឹក្សាជាតិតស៊ូ ទទូចឲ្យរដ្ឋាភិបាលផ្តល់ឱកាសឲ្យកូនៗ នៃយុទ្ធជនសមរភូមិជួរមុខ បានរៀនសូត្រដោយឥតគិតថ្លៃ និងឧបត្ថម្ភជីវភាពសិក្សាគ្រប់គ្រាន់។
ដោយឡែក តំណាងរាស្រ្តគណបក្សសង្រ្គោះជាតិ លោក ម៉ែន សុថាវវិន្រ្ទ យល់ថា យុទ្ធជនការពារព្រំដែននៅមានជីវភាពក្រលំបាកនៅឡើយ ដែលទាមទារឱ្យរដ្ឋយកចិត្តទុកដាក់បន្ថែមទៀត ឱ្យសមតាមវីរៈភាពដ៏អង់អាចក្លាហានរបស់យុទ្ធជនខ្មែរ ដែលហ៊ានបូជាជីវិតដើម្បីជាតិមាតុភូមិ។
លោកថា៖ «យើងមើលទៅគាត់គិតគូរតែរឿងតារាឱ្យបុណ្យសក្កិ។ យុទ្ធជនដែលការពារព្រំដែនទាំងអស់ហ្នឹង គឺអត់ទេ! អត់មានជួយយុទ្ធជនទេ អត់មានដោះស្រាយ។ ឃើញខ្មែរយើងទាំងអស់ជួយទូទាំងពិភពលោក គេរៃអង្គាសដើម្បីយកទៅជួយយុទ្ធជនជួរមុខ ជាពិសេសពួក ភៀសសឹក។ សូមឱ្យគិតគូរហើយ ឱ្យប្រាក់ខែ ហើយឡើងឋានរន្តស័ក្តិ»។
យ៉ងណា នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ជំរុញឱ្យធនាគារជាតិ តាមដានគ្រឹះស្ថានធនាគារ និងហិរញ្ញវត្ថុ ដើម្បីឱ្យប្រាកដថាមិនបានបំពានលើការណែនាំក្នុងការជួយសម្រួលបន្ទុកគ្រួសារកងកម្លាំង ដែលឈរជើងនៅសមរភូមិជួរមុខនៅពេលនេះ។
បន្ថែមលើនេះ លោកចង់ឃើញរដ្ឋជួយបន្ថែមទៀតលើជីវភាពគ្រួសាររបស់យុទ្ធជន នៅសមរភូមិជួរមុខផងដែរ ដែលពួកគេកំពុងលះបង់ដើម្បីជាតិខ្មែរ។
លោកថា៖ «រាជរដ្ឋាភិបាលលោកគួរតែពិនិត្យទៅលើលទ្ធភាពជួយបន្ថែម សម្រាប់កងយោធពលខេមរភូមិន្ទ ក៏ដូចជាកងនគរបាលដែលគាត់ទៅនៅជួរមុខ ទាក់ទងនឹងបញ្ហាជីវភាពគ្រួសាររបស់ពួកគាត់។ ជាការលើកទឹកចិត្តដល់វីរភាពដ៏អង់អាច ដែលគាត់ប្រឈម ឬក៏លះបង់»។
សម្រាប់ អតីតនាយខុទ្ទការល័យលោក កឹម សុខា គឺលោក មុត ចន្ថា នៅថ្ងៃទី២៩ ខែកក្កដា បានសរសេរសារភ្ជាប់រូបភាពយុទ្ធជនដែលពលី ក្នុងសមរភូមិប្រយុទ្ធទប់ទល់ការឈ្លានពានពីប្រទេសថៃ ថាពេលសុខសាន្តត្រាណកុំភ្លេចវីរៈភាព និងគុណបំណាច់។
បើតាម លោក មុត ចន្ថា រាជរដ្ឋាភិបាលគួរពិចារណាធ្វើកិច្ចការមួយចំនួន សម្រាប់នាយទាហាន និងយុទ្ធជនដែលបានពលីក្នុងសមរភូមិ ដើម្បីការពារទឹកដីពីការឈ្លានពានរបស់ប្រទេសថៃ។
កិច្ចការនោះ រួមមាន សង់វិមានអនុស្សារីយ៍ដោយចារឹកឈ្មោះ បំពាក់មេដាយការពារជាតិដល់យុទ្ធជនពលី និងយុទ្ធជនទាំងអស់ ផ្តល់គោលនយោបាយសមស្របដល់ក្រុមគ្រួសារយុទ្ធជនពលី បំពាក់ឋានន្តរស័ក្តិតាមលំដាប់ប្រសិនជាអាច ផ្តល់សេវាពិគ្រោះយោបល់ផ្នែកចិត្តសាស្រ្តដល់គ្រួសារយុទ្ធជនពលី ជួយទំនុកបម្រុងដល់កូនៗយុទ្ធជនពលី ឱ្យរៀនសូត្រយ៉ាងហោចបញ្ចប់កម្រិតឧត្តមសិក្សា៕
