ខណៈស្ថានការនៅតាមតំបន់ព្រំដែន បានវិលទៅរកភាពស្ងប់ស្ងាត់ បន្ទាប់ពីកម្ពុជានិងថៃបានអនុវត្តបទឈប់បាញ់ក្នុងរយៈពេល២ថ្ងៃកន្លងមកនេះ អ្នកឃ្លាំមើលនិងអ្នកនយោបាយក្រៅរដ្ឋាភិបាល ជំរុញឱ្យរដ្ឋាភិបាលកម្ពុជា ចាប់ផ្តើមគិតនិងរៀបចំផែនការក្នុងការធ្វើទំនើបកម្មវិស័យការពារជាតិ និងបង្កើនកម្រិតជីវភាពរបស់កងទ័ពនិងគ្រួសាររបស់ពួកគេ ខណៈបច្ចុប្បន្នកងទ័ពភាគច្រើនក្រតោកយ៉ាកណាស់។
លោកមាជ សុវណ្ណារ៉ា ប្រធានគណបក្សជំនាន់ថ្មី ដែលធ្លាប់ធ្វើជាទាហានប៉ារ៉ារបស់គណបក្សលោកតាស៊ឺន សាន បានថ្លែងពីតំបន់ព្រំដែននៅក្បែរប្រាសាទតាមាន់ធំ នៅថ្ងៃទី៣០ ខែកក្កដានេះថា តាមការមើលឃើញរបស់លោក ការប្រយុទ្ធរបស់កងទ័ពកម្ពុជាជាមួយទ័ពថៃ ក្នុងរយៈពេល៥ថ្ងៃកន្លងមកនេះ បានបង្ហាញថា កងទ័ពកម្ពុជាមានយុទ្ធសាស្ត្រច្បាំង គឺអស្ចារ្យណាស់ ពីព្រោះពួកគាត់អាចទប់ទល់បាននូវអាវុធទំនើបរបស់សៀម នៅត្រង់សមរភូមិដែលពួកគាត់ឈរជើង នៅតាមតំបន់ភ្នំដែលតំបន់ខ្លះគឺចោទខ្លាំង។
លោកលើកឡើងថា យោធាថៃ ក្រៅពីអាវុធទំនើប សូម្បីតែឯកសណ្ឋានអាវ ខោ ស្បែកជើង និងមួកក៏ទំនើបដែរ មានតាំងពីអាវក្រោះ។ ប៉ុន្តែកងទ័ពកម្ពុជាក៏មិនអត់ដែរ ទើបពួកគាត់អាចទប់ទល់កងទ័ពសៀមបាន៥ថ្ងៃ មិនឱ្យចូលមកទីតាំងដែលខ្លួនឈរជើងបានឡើយ ដែលនេះបានបង្ហាញពីវីរៈភាពដ៏ខ្លាំងក្លារបស់កងទ័ពខ្មែរ។
ក៏ប៉ុន្តែទោះយ៉ាងណា លោក មាជ សុវណ្ណារ៉ា លើកទឹកចិត្តឱ្យក្រសួងការពារជាតិ ធ្វើការសិក្សាជាមួយមេបញ្ជាការកងទ័ពជួរមុខ ធ្វើការពិនិត្យមើលថាតើឆ្លងកាត់បទពិសោធន៍សង្គ្រាមដ៏ក្តៅគគុក រយៈពេល៥ថ្ងៃដែលទ័ពសៀមបានប្រើអាវុធទំនើបរហូតដល់យន្តហោះ F-16 និងដ្រូនបាញ់ស្រោចសន្ធាប់មកលើទឹកដីកម្ពុជាទាំងយប់ទាំងថ្ងៃនោះ កងទ័ពកម្ពុជាមានចំណុចចន្លោះប្រហោងខ្វះខាតអ្វីខ្លះ គឺចាំបាច់ត្រូវតែបំពេញបន្ថែម ដើម្បីត្រៀមខ្លួនទប់ទល់នឹងសង្គ្រាមលើកក្រោយទៀត ប្រសិនបើវាកើតមានឡើង។
លោកថា៖ «កងទ័ពយើងសុទ្ធតែមានបទពិសោធន៍ក្នុងការច្បាំង យើងគ្រាន់តែពង្រឹងនូវវិន័យសណ្តាប់ធ្នាប់បច្ចេកទេស និងកលយុទ្ធប្រយុទ្ធបែបណាៗ នៅក្នុងយុទ្ធសាស្ត្រវិធីសាស្ត្របែបណាៗ ឱ្យគាត់មានប្រសិទ្ធភាពទៅនឹងទំនើបកម្មយោធាទៀត ខ្ញុំថា វាជារឿងល្អហើយ ហើយយើងឃើញការច្បាំងនេះ ឃើញថា កងទ័ពសៀមមានការរបួស និងស្លាប់ច្រើន ហើយកងទ័ពខ្មែរយើង បើតាមឃើញការបញ្ជាក់ពីក្រសួងការពារជាតិ ក៏ដូចជាឃើញពិធីបុណ្យសពរបស់យុទ្ធជនពលីឃើញថា មិនដល់៣០នាក់ទេ របួសធ្ងន់ស្រាលអីមិនដល់៥០នាក់ទេ។ ចឹងនេះជាទិដ្ឋភាពមួយដែលចង់ឃើញរាជរដ្ឋាភិបាល ពង្រឹងទំនើបកម្មយោធាឱ្យមានប្រសិទ្ធភាព ហើយជាទាហានដែលពោរពេញទៅដោយវិជ្ជាជីវៈ ក្នុងកិច្ចការច្បាំងកិច្ចការការពារជាតិ»។
ជាមួយគ្នានេះ លោក សេង សារី ដែលធ្លាប់ធ្វើជាចារកម្មយកការណ៍ ពីគណបក្សប្រឆាំង ឱ្យលោក ហ៊ុន សែន ប្រធានព្រឹទ្ធសភា បាននិយាយលើបណ្តាញសង្គមរបស់លោក កាលពីថ្ងៃទី២៧ខែកក្កដាថា តាមរយៈការផ្ទុះអាវុធ ជាមួយថៃលើកនេះ វាដល់ពេលវេលាដែលរដ្ឋាភិបាលកម្ពុជា ត្រូវធ្វើទំនើបកម្មកងទ័ព និងទំនើបកម្មសព្វាវុធ ថាតើកម្ពុជានៅតែបន្តទិញសព្វាវុធតែពីចិនទៀត ឬក៏ទៅទិញសព្វាវុធពីអាមេរិកខ្លះ ដើម្បីអាចយកធ្វើជាអំណះអំណាងក្នុងការចរចាបញ្ចុះពន្ធបដិការ។
ប៉ុន្តែយ៉ាងណាក្តី ការធ្វើទំនើបកម្មវិស័យយោធា ត្រូវធ្វើសន្សឹមៗ ដោយត្រូវរក្សាតុល្យភាពជាមួយវិស័យអាទិភាពមួយចំនួន ដូចជា វិស័យសុខាភិបាល វិស័យអប់រំ និងវិស័យហេដ្ឋារចនាសម្ព័ន្ធជាដើម។
លោកថ្លែងថា ត្រូវតែមានការពង្រឹងសមត្ថភាពកងទ័ពជួរមុខ ខណៈកន្លងមកមានតែកងទ័ពលាបឡេនៅទីក្រុងប៉ុណ្ណោះ ដែលត្រូវបានបញ្ជូនឱ្យទៅរៀនជំនាញយោធានៅតាមបណ្តាប្រទេសមួយចំនួន។
លោកថា៖ «ដល់ពេលសង្គ្រាមពិតប្រាកដអត់ឃើញពួកគាត់ទេ អត់ឃើញកងទ័ពលាបឡេហ្នឹងទេ ឃើញតែកងទ័ពអ្នកពាក់ស្បែកជើងផ្ទាត់ អតីតខ្មែរក្រហម អតីតទាហានហ្វ៊ុនស៊ិនប៉ិច អតីតទាហានប៉ារ៉ាដែលនៅតាមព្រំដែនឯណោះទេ ពួកគាត់មិនដែលមានឱកាសបានចេញទៅបណ្តុះបណ្តាលនៅក្រៅប្រទេសទេ បើចេញទៅហ្នឹង ច្រើនតែពួកកងទ័ពដែលមានក្បាលពោះសៗ លាបឡេលាបក្រេមលាបម្ស៉ៅអីណោះទេ ចឹងហើយគួរធ្វើម៉េចគម្រោងទាំងឡាយ ដែលឈានទៅដល់ការពង្រឹងសមត្ថភាពយោធាសម្រាប់កងទ័ពកម្ពុជាគឺរុញការពង្រឹងសមត្ថភាពនោះទៅកងទ័ពជួរមុខ»។
លោកលើកឡើងថា កងទ័ពជួរមុខត្រូវបណ្តុះបណ្តាលឱ្យគាត់មានជំនាញ ក្នុងការប្រយុទ្ធមានជំនាញក្នុងការប្រើប្រាស់អាវុធទំនើប ពីព្រោះកងទ័ពដែលចេញប្រយុទ្ធពិតប្រាកដ មិនមែនកងទ័ពនៅក្នុងទីក្រុងភ្នំពេញនោះទេ ដូច្នេះក្រសួងការពារជាតិ និងរដ្ឋាភិបាល គួរតែពិចារណាក្នុងការធ្វើទំនើបកម្ម។
ជាមួយគ្នានេះ លោក សេង សារី ជំរុញឱ្យរដ្ឋាភិបាលត្រូវស្តារមុខមាត់កងទ័ពកម្ពុជាឡើងវិញ ខណៈកន្លងមកកងទ័ពកម្ពុជា ត្រូវបានគេមើលឃើញក្នុងន័យអវិជ្ជមានច្រើន ដូចជាមេទ័ពមួយចំនួនបានប្រើកងទ័ពកាងឈ្មួញរកស៊ីឈើ កងទ័ពក្លាយជាអង្គរក្សឈ្មួញជនជាតិចិនជាដើម។
ដូច្នេះហើយ លោក សេង សារី គិតថា កងទ័ពកម្ពុជាត្រូវធ្វើយ៉ាងណាឱ្យជាកងទ័ព ដែលមានកេរ្តិ៍ឈ្មោះល្អ ជាមនុស្សមួយក្រុមរបស់កម្ពុជា ដែលហ៊ានលះបង់ជីវិតដើម្បីការពារជាតិ និងបូរណភាពទឹកដី ជាមនុស្សដែលគួរឱ្យគោរពនៅក្នុងសង្គម។
លោក សេង សារី ថ្លែងទៀតថា ទន្ទឹមនឹងការកសាងកេរ្តិ៍ឈ្មោះកងទ័ព ជីវភាពនិងសុខុមាលភាពរបស់កងទ័ពក៏ជារឿងសំខាន់ផងដែរ ពីព្រោះបច្ចុប្បន្នឃើញបងប្អូនកងទ័ពមួយចំនួននៅមានជីវភាពក្រតោកយ៉ាកណាស់ ពេលមានសង្គ្រាមអ៊ីចឹងទៅបានឃើញមានការឧបត្ថម្ភ។
ប៉ុន្តែជាក់ស្តែងពួកគាត់រស់នៅដោយលំបាក ដូច្នេះរដ្ឋាភិបាលត្រូវតែទទួលខុសត្រូវទាំងស្រុងទៅលើគ្រួសាររបស់កងទ័ព ដែលពលីជីវិតក្នុងការការពារបូរណភាពទឹកដី ដោយផ្តល់នូវអាហារូបត្ថម្ភ និងអាហារូបករណ៍សម្រាប់ឱ្យកូនៗកងទ័ពដែលបានពលី បានរៀនសូត្ររហូតដល់ចប់សាកលវិទ្យាល័យជាដើម។
ត្រង់ចំណុចនេះ លោក មាជ សុវណ្ណារ៉ា ក៏បានលើកឡើងដែរថា ចំពោះគ្រួសារវីរៈកងទ័ពដែលបានពលីជីវិតដើម្បីការពារជាតិទឹកដី មិនថាបុរសឬស្ត្រី ក្រៅពីសងផ្តាច់បំណុលជូនគ្រួសារពួកគាត់ រដ្ឋាភិបាលគួរមានគោលនយោបាយច្បាស់លាស់អាចមានជាកញ្ចប់ថវិកា ឬក៏ប្រាក់បៀវត្សប្រចាំខែ ធ្វើយ៉ាងណាដើម្បីឱ្យគ្រួសារពួកគាត់ អាចរស់នៅក្នុងកម្រិតជីវភាពសមរម្យ អាចចិញ្ចឹមកូនឱ្យកូនបានរៀនសូត្ររហូតដល់ថ្នាក់ឧត្តមសិក្សា ដោយមិនបង់ប្រាក់ និងទៅព្យាបាលជំងឺដោយមិនបង់ប្រាក់ជាដើម។
ជាមួយគ្នានេះ លោកមុត ចន្ថា អតីតប្រធានខុទ្ទការល័យ លោក កឹម សុខា ប្រធានអតីតគណបក្សសង្គ្រោះជាតិ បានសរសេរនៅលើបណ្តាញសង្គមរបស់លោក នៅថ្ងៃទី២៩កក្កដាថា ពេលសុខសាន្តត្រាណកុំភ្លេចវីរៈភាព និងគុណបំណាច់របស់វីរៈកងទ័ពដែលបានពលីនៅសមរភូមិ ដោយរាជរដ្ឋាភិបាលគួរពិចារណាធ្វើកិច្ចការមួយចំនួនសម្រាប់នាយទាហាន និងយុទ្ធជនដែលបានពលីក្នុងសមរភូមិ ដើម្បីការពារទឹកដីពីការឈ្លានពានរបស់ប្រទេសថៃ។
លោកសរសេរថា រដ្ឋាភិបាលគួរសាងសង់វិមានអនុស្សារីយ៍ដោយចារឹកឈ្មោះវីរៈកងទ័ពដែលបានពលី បំពាក់មេដាយការពារជាតិដល់វីរៈកងទ័ពទាំងអស់ ផ្តល់ការយកចិត្តទុកដាក់ដល់គ្រួសារកងទ័ពពលី និងយុទ្ធជនរងរបួស ផ្តល់គោលនយោបាយសមស្របដល់ក្រុមគ្រួសារយុទ្ធជនពលី បំពាក់ឋានន្តរស័ក្តិតាមលំដាប់ ដល់កងទ័ពរងរបួស ជួយកូនយុទ្ធជនពលីឱ្យមានលទ្ធភាពបន្តការរៀនសូត្រ និងផ្តល់ជំនួយចាំបាច់សម្រាប់ផ្គត់ផ្គង់ជីវភាពរស់នៅប្រចាំថ្ងៃជាដើម។
លោកនាយករដ្ឋមន្ត្រីហ៊ុន ម៉ាណែត បានបង្ហោះនៅលើបណ្តាញសង្គមនៅថ្ងៃទី៣០ខែកក្កដាថា ការប្រយុទ្ធគ្នារវាងកងទ័ពកម្ពុជានិងកងទ័ពថៃ ក្នុងរយៈពេលប៉ុន្មានថ្ងៃនេះ បានបណ្តាលឱ្យយោធិនមួយចំនួន ត្រូវពលី របួស ពិការ ក៏ដូចជាប្រជាពលរដ្ឋរាប់ម៉ឺនគ្រួសារក្លាយជាជនភៀសសឹក មិនអាចប្រកបរបរចិញ្ចឹមជីវិតប្រចាំថ្ងៃបាន។
លោកបានឱ្យដឹងថា នៅពេលនេះ រាជរដ្ឋាភិបាលបានរៀបចំ និងកំពុងអនុវត្តនូវកញ្ចប់គោលនយោបាយសម្រាប់គ្រួសារយោធិនពលី យោធិនរងរបួស ពិការ ហើយលោកបានចេញបទបញ្ជាឲ្យក្រសួងការពារជាតិ និងក្រសួងស្ថាប័នពាក់ព័ន្ធ សិក្សារៀបចំនូវគោលនយោបាយលើកទឹកចិត្តពិសេស សម្រាប់កងកម្លាំងប្រដាប់អាវុធទាំងយោធា ទាំងនគរបាលជាតិ ដែលបានចូលរួមដោយផ្ទាល់នៅក្នុងសមរភូមិការពារបូរណភាពទឹកដីនៅពេលនេះ។
ចំពោះយោធិន និងកងនគរបាលជាតិដែលបានពលី ឬធ្លាក់ខ្លួនពិការមិនអាចបំពេញភារកិច្ចបន្តបាន លោក ហ៊ុន ម៉ាណែត បានថ្លែងថា រាជរដ្ឋាភិបាលនឹងផ្ដល់ក្របខណ្ឌឲ្យសាច់ញាតិបង្កើតរបស់គាត់មួយរូប បានចូលបម្រើប្រទេសជាតិ នៅអង្គភាពដែលគាត់បំពេញភារកិច្ចមុនពលីឬធ្លាក់ខ្លួនពិការ។
បន្ថែមពីនេះ លោកនាយករដ្ឋមន្ត្រី បានអំពាវនាវឲ្យសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ពិនិត្យលទ្ធភាពក្នុងការជួយសម្រាលបន្ទុកហិរញ្ញវត្ថុ សម្រាប់កងកម្លាំងប្រដាប់អាវុធ ដែលកំពុងធ្វើប្រតិបត្តិការយ៉ាងសកម្មនៅក្នុងបុព្វហេតុការពារបូរណភាពទឹកដី នៅក្នុងសមរភូមិប្រយុទ្ធ ក៏ដូចជាគ្រួសារយោធិនពលី យោធិនរងរបួស ពិការ និងប្រជាពលរដ្ឋជាជនភៀសសឹក ដោយសារការប្រយុទ្ធគ្នានៅពេលនេះផងដែរ។
ទាក់ទងនឹងបំណុលរបស់គ្រួសារកងទ័ពដែលបានពលី លោក ហ៊ុន សែន ប្រធានព្រឹទ្ធសភា បានបង្ហោះសារនៅលើបណ្តាញសង្គមរបស់លោកនៅថ្ងៃទី៣០ខែកក្កដាថា លោកសូមអរគុណធនាគារអេស៊ីលីដា ធនាគារវីង ធនាគារកាណាឌីយ៉ា និងធនាគារមួយចំនួនទៀត ដែលបានប្រកាសលុបបំណុលទាំងស្រុង ជូនដល់យោធិនពលីជីវិត និងអ្នករួមខ្ចី ព្រមទាំងកាត់បន្ថយបំណុលយោធិនរងរបួស ធ្លាក់ខ្លួនពិការ ដែលបានបំពេញប្រតិបត្តិការក្នុងសមរភូមិការពារបូរណភាពទឹកដីកម្ពុជា។
ទាក់ទងទៅនឹងលទ្ធភាពក្នុងការផ្គត់ផ្គង់កងទ័ព និងទំនាក់ទំនងរវាងកងទ័ពនិងប្រជាជន លោកហ៊ុន សែន ធ្លាប់បានថ្លែងក្នុងសមាជព្រឹទ្ធសភា-រដ្ឋសភា កាលពីថ្ងៃទី២ ខែមិថុនា ឆ្នាំ២០២៥ថា ទោះបីដំឡើងកងទ័ព១០ដង ឬ២០ដងទៀត ក៏រដ្ឋាភិបាលមិនខ្វះលុយចិញ្ចឹមកងទ័ពដែរ។
ប៉ុន្តែអ្វីដែលជាសេចក្តីត្រូវការរបស់យើងនៅពេលនេះ គឺខឿនការពារជាតិរបស់ប្រជាជន ការផ្សាភ្ជាប់រវាងប្រជាជន និងកងទ័ពគឺតែមួយ។
នៅក្នុងរយៈពេលជាច្រើនថ្ងៃកន្លងមកនេះ គេឃើញភរិយានិងគ្រួសារវីរៈកងទ័ព ដែលបានពលីនិងរងរបួសបានបង្ហោះសារនិងរូបភាព ដែលបានបង្ហាញពីទុក្ខលំបាកយ៉ាងខ្លាំងខាងជីវភាព។
ក្នុងនោះ អ្នកស្រី បាន ធាត់ អាយុ៣៧ឆ្នាំ ជាភរិយាលោកអនុសេនីយ៍ឯក អួន ឡាវហុង អាយុ៣២ឆ្នាំ ជាយោធានៅកងពលលេខ៨ ដែលបានពលីនៅតំបន់ភ្នំទ្រព្យ បច្ចុប្បន្នរស់នៅភូមិពាម ឃុំដូនកែវ ស្រុកពួក ខេត្តសៀមរាប ដែលមានកូនតូចៗ២នាក់ក្នុងបន្ទុកបាននិយាយប្រាប់ TBT តាព្រហ្មបាទី ខណៈកំពុងបីកូនតូចនៅនឹងដៃនៅក្នុងផ្ទះប្រក់ស្លឹកត្នោតបាំងបិទទៅដោយជញ្ជាំងស្លឹកត្នោតរយីករយាកថា បច្ចុប្បន្នអ្នកស្រីមានជីវភាពក្រីក្រលំបាកខ្លាំងណាស់ រកព្រឹកខ្វះល្ងាច ថែមទាំងជំពាក់បំណុលធនាគារទៀត សូមជួយគាត់ផង។
អ្នកស្រីថា៖ «ជីវភាពខ្វះខាតខ្លាំង ខ្ញុំជំពាក់ធនាគារផងអីផង រកព្រឹកដាច់ល្ងាច ខ្ញុំនិងប្តីខ្ញុំ ថ្ងៃខ្លះ ហូបបាយជាមួយទឹកស៊ីអ៊ីវ ថ្ងៃខ្លះបុកម្ជូរនាំប្តីប្រពន្ធអង្គុយហូបកម្សត់ពេកខ្ញុំ»។
សូមបញ្ជាក់ថា លោក អួន ឡាវហុង បានពលីនៅលើភ្នំទ្រព្យ កាលពីព្រឹកថ្ងៃទី២៤ខែកក្កដា ជាថ្ងៃទី១ ដែលកងទ័ពថៃ បានចាប់ផ្តើមធ្វើការវាយលុកមកលើកងទ័ពកម្ពុជា។
គិតមកត្រឹមថ្ងៃទី២៧ ខែកក្កដា ឆ្នាំ២០២៥ មានជនភៀសសឹកចំនួនជិត ៤ម៉ឺនគ្រួសារ ស្មើនឹងជាង ១៣ម៉ឺននាក់ ត្រូវបានជម្លៀសទៅកាន់តំបន់សុវត្ថិភាព និងផ្ទះសាច់ញាតិ សាលារៀន ៦០០ ត្រូវបានបិទទ្វារ និងសិស្សចំនួន ១៥ម៉ឺននាក់ បានរងផលប៉ះពាល់ដល់ការសិក្សា។ នេះបើតាមលោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ។
បើតាមមន្ត្រីយោធាកងទ័ពជើងគោក ដែលបដិសេធប្រាប់ឈ្មោះ បានអះអាងថា បច្ចុប្បន្នពលទាហានទទួលបានប្រាក់ខែតិចបំផុតចាប់ពី ១លាន៣សែនរៀលឡើង ខណៈប្រពន្ធទាហានទទួលបាន១ម៉ឺនរៀល និងកូនម្នាក់ទទួលបាន ១៥០០០រៀល។
ប៉ុន្តែប្រាក់ខែទាំងនេះ មិនមែនបើកបានទាំងអស់នោះទេ គឺនៅតាមអង្គភាពខ្លះត្រូវគេកាត់ចូលគណបក្សប្រជាជនក្នុង១ខែ ៥ម៉ឺនរៀល កាត់ជួយដល់គ្រួសារទាហានដែលទទួលមរណភាព និងក៏មានការកាត់ផ្សេងៗទៀតផងដែរ។
មន្ត្រីយោធារូបនេះ ក៏ឱ្យដឹងដែរថា នៅពេលមានភាពតានតឹងនៅតាមព្រំដែនថៃ កងទ័ពជើងគោកបានប្រមូលកម្លាំងនៅគ្រប់អង្គភាព ដើម្បីត្រៀមបញ្ជូនទៅសមរភូមិ ប៉ុន្តែបាត់ទាហានជាង៦០០នាក់ មិនឃើញមកបង្ហាញខ្លួនទេ មានតែឈ្មោះបើកប្រាក់ខែ។
ប្រភពដដែល បានឱ្យដឹងទៀតថា ចំពោះរបបអាហារសម្រាប់កងទ័ព កាលពីពេលកន្លងមក ក្នុង១ថ្ងៃកងទ័ព ម្នាក់ទទួលបានតែ៤ពាន់រៀលប៉ុណ្ណោះ ទើបតែថ្មីៗនេះ លោក ហ៊ុន ម៉ាណែត បានបន្ថែមឱ្យ៣ពាន់រៀលទៀត។
លោកបញ្ជាក់ថា កងទ័ពសុទ្ធតែយកអាយុជីវិតយកឈាមទៅការពារជាតិការពារទឹកដី ប៉ុន្តែរបបអាហារបានតែ៧ពាន់រៀលទេក្នុងមួយថ្ងៃ ខណៈប្រាក់ខែក៏តិចតួច ហេតុដូច្នេះហើយទើបគ្រួសារកងទ័ពភាគច្រើនលើសលប់សុទ្ធតែមានជីវភាពក្រីក្រ៕
