រដ្ឋាភិបាលកម្ពុជា បានអះអាងថា ខ្លួនកំពុងបន្តធ្វើការយ៉ាងសស្រាក់សស្រាំ ក្នុងការចរចា រួមទាំងយន្តការអាស៊ាន ដើម្បីជំរុញឱ្យភាគីថៃប្រគល់ទាហានកម្ពុជាចំនួន ១៨នាក់ មកកម្ពុជាវិញ ឱ្យបានឆាប់រហ័សបំផុត និងមានសុវត្ថិភាព ស្របតាមច្បាប់មនុស្សធម៌អន្តរជាតិ។
ក្រសួងការពារជាតិ បាននិយាយលើហ្វេសប៊ុករបស់ខ្លួន នៅថ្ងៃទី២ខែសីហានេះថាពាក់ព័ន្ធនឹងកងកម្លាំងកម្ពុជាចំនួន ១៨រូប ពេលនេះកំពុងស្ថិតនៅក្រោមការគ្រប់គ្រងរបស់ថៃ ហើយថា កម្ពុជា «កំពុងបន្តធ្វើការយ៉ាងសស្រាក់សស្រាំក្នុងការចរចា ដើម្បីជំរុញឱ្យភាគីថៃប្រគល់កងកម្លាំងរបស់យើងមកវិញ ឱ្យបានឆាប់រហ័សបំផុត និងមានសុវត្ថិភាព ស្របតាមច្បាប់មនុស្សធម៌អន្តរជាតិ»។
លើសពីនេះ កម្ពុជាក៏បានស្នើទៅកាន់ប្រទេសម៉ាឡេស៊ី ដែលជាប្រធានអាស៊ានប្តូរវេន ជួយអន្តរាគមន៍ដើម្បីជំរុញឱ្យភាគីថៃឆាប់ប្រគល់មកឱ្យកម្ពុជាវិញ នូវកងកម្លាំងរបស់កម្ពុជាទាំង ១៨នាក់។
ក្រសួងការពារជាតិបញ្ជាក់ថា ខ្លួននឹងមិនទុកសមាជិករបស់ខ្លួនណាម្នាក់ចោលនោះទេ ទោះក្នុងកាលៈទេសៈណាក៏ដោយ។
កាលពីថ្ងៃសុក្រ ទាហានខ្មែរពីររូបត្រូវបានថៃបញ្ជូនឱ្យកម្ពុជាវិញ តាមច្រកទ្វារព្រំដែនអូស្មាច់ ក្រោយពីថៃចាប់ធ្វើជាចំណាប់ខ្មាំងចំនួន ២០នាក់ កាលពីថ្ងៃទី២៩ ខែកក្កដា ឆ្នាំ២០២៥ រំលោភបទឈប់បាញ់ ដែលបានចូលជាធរមាននៅថ្ងៃទី២៨ខែកក្កដា ចាប់ពីម៉ោង១២យប់។
ក្រោយថៃប្រគល់ទាហានខ្មែរពីរនាក់នេះ អតីតនាយករដ្ឋមន្ត្រីកម្ពជា លោក ហ៊ុន សែន បានបង្ហោះសារលើហ្វេសប៊ុកលោក នៅថ្ងៃទី១ខែសីហាថា កងទ័ពកម្ពុជា២នាក់រងរបួស ត្រូវបានភាគីថៃ ចាប់នៅក្រោយបទឈប់បាញ់រយៈពេល៨ម៉ោង ត្រូវបានភាគីថៃបញ្ជូនមកកម្ពុជាវិញដោយសុវត្ថិភាព៕
