មេដឹកនាំបក្សកាន់អំណាច លោក ហ៊ុន សែន បានប្រកាសបណ្តេញ អ្នកស្រី ធី សុវណ្ណថា ចេញពីក្របខ័ណ្ឌរដ្ឋ ដោយភ្ជាប់នឹងសារនៅលើហ្វេសប៊ុក ឈ្មោះ ធី សុវណ្ណថា ដែលបានបង្ហោះថា កងទ័ពជួរមុខភាគច្រើន មានជំងឺលើសឈាម ទឹកនោមផ្អែម ដោយសំអាងថា លោកគ្មានពេលអប់រំមន្ត្រីដែលគ្មានវិន័យនោះទេ។
លោក ហ៊ុន សែន បានលើកឡើងក្នុងសម្តីដើមលើហ្វេសប៊ុកលោកនៅថ្ងៃទី០៣ ខែសីហាថា៖ «យើងគ្មានពេលអប់រំមន្ត្រីដែលគ្មានវិន័យ ក្នុងពេលដែលកិច្ចការជាតិ កំពុងទាមទារយើងដោះស្រាយនោះឡើយ។ ម្តងហើយម្តងទៀត ធី សុវណ្ណថា បានបង្ហោះសារតាមFacebook ដែលមានចរិតមិនសមស្រប»។
លោកថា រឿងនេះ លោកបានហៅទូរស័ព្ទប្រាប់ ធី សុវណ្ណថា ឲ្យលុបចោលនៅអត្ថបទចំនួន២ កាលពីប៉ុន្មានថ្ងៃមុន។ តែថា ថ្ងៃនេះហ្វេសប៊ុកនោះ បានបង្ហោះសារប៉ះពាល់ដល់កងទ័ពក្នុងពេលកងទ័ពកំពុងការពារទឹកដី។
វិធាននេះ លោកបានប្រាប់ទៅ លោក គួច ចំរើន ប្រធានគណបក្សខេត្តកណ្តាល ឱ្យបណ្តេញចេញពីគណបក្សប្រជាជនកម្ពុជា ហើយថា បានប្រាប់ទៅ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃឱ្យបញ្ចប់មុខតំណែង អ្នកស្រី ធី សុវណ្ណថា ពីអភិបាលរងក្រុងអរិយក្សត្រ និងបណ្តេញចេញពីក្របខ័ណ្ឌរដ្ឋទាំងអស់។
លោក ហ៊ុន សែន សង្កត់ធ្ងន់ថា៖ « ក្នុងឋានៈជាប្រធានគណបក្សកាន់អំណាច ខ្ញុំមានសិទ្ធិនឹងធ្វើបែបនេះ ដើម្បីរក្សាវិន័យបក្សសម្រាប់មន្ត្រីដែលជាសមាជិកបក្សទាំងអស់»។
អ្នកស្រី ធី សុវណ្ណថា ត្រូវគេដឹងថា ជាអ្នកសកម្មគណសង្គ្រោះជាតិ ដ៏មានប្រជាប្រិយភាពខាងវោហាថ្វីមាត់ ចេញមុខឃោសនារកសំឡេងឆ្នោតចាប់ពីឆ្នាំ២០១៣ ដោយរិះគន់ខ្លាំងពីភាពអសកម្មរបស់មេដឹកនាំបក្សកាន់អំណាច។
ប៉ុន្តែក្រោយមកបានទៅចូលរួមជីវភាពនយោបាយជាគណបក្សប្រជាជនកម្ពុជាវិញ រហូតទទួលបានតំណែង ជាអភិបាលរងក្រុងអរិយក្សត្រ អំឡុងខែមេសាឆ្នាំ២០២៣៕
