ក្រសួងមហាផ្ទៃ ណែនាំពីការហាមឃាត់ការបង្ហោះយន្តហោះគ្មានមនុស្សបើក(ដូ្រន) ជាដាច់ខាត ក្នុងរយៈពេល ១៥ថ្ងៃ ដើម្បីរក្សាសន្តិសុខ សណ្តាប់ធ្នាប់ និងសុវត្ថិភាពសង្គម នៅតាមបណ្តាខេត្តជាប់ព្រំដែនជាមួយប្រទេសថៃ និងខេត្តពាក់ព័ន្ធចំនួន៩ ខណៈដែលកម្ពុជា ត្រូវបានប្រទេសថៃរំលោភបំពានលើអធិបតេយ្យ និងបូរណភាពទឹកដី។
លិខិតរបស់លោក ស សុខា រដ្ឋមន្ត្រីក្រសួងមហាផ្ទៃ ផ្ញើជូនអភិបាលខេត្តចំនួន៩ ស្តីពីការហាមឃាត់ការបង្ហោះដ្រូន ចុះថ្ងៃទី០៣ ខែសីហា ឆ្នាំ២០២៥ បានណែនាំដល់អភិបាលខេត្តទាំងនោះ ផ្សព្វផ្សាយដល់សាធារណជន ពីការហាមឃាត់មិនឱ្យមានការបង្ហោះដ្រូន ជាដាច់ខាតក្នុងរយៈពេល១៥ថ្ងៃ គិតចាប់ពីថ្ងៃដែលក្រសួងចេញគោលការណ៍ណែនាំនេះ។
លោក ស សុខា បញ្ជាក់ថា ការហាមប្រាមនេះ ក្នុងគោលបំណងលើកកម្ពស់ការគ្រប់គ្រង និងថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នៅតាមបណ្តាខេត្តជាប់ព្រំដែនជាមួយប្រទេសថៃ និងខេត្តពាក់ព័ន្ធ ក្នុងកាលៈទេសៈដែលប្រទេសជាតិ ត្រូវបានប្រទេសថៃ រំលោភបំពានមកលើអធិបតេយ្យ និងបូរណភាពទឹកដីកម្ពុជា។
ក្រសួងក៏បានព្រមានដែរថា៖ «ក្នុងករណីមានការបង្ហោះដ្រូន អ្នកប្រព្រឹត្តបទល្មើសនឹងត្រូវទទួលទោសទណ្ឌ និងវិធានការរដ្ឋបាលតាមច្បាប់កំណត់ជាធរមាន»។
ខេត្តទាំង៩ ដែលត្រូវហាមឃាត់ដោយក្រសួងនោះ រួមមាន ឧត្តរមានជ័យ ព្រះវិហារ បន្ទាយមានជ័យ បាត់ដំបង ប៉ៃលិន ពោធិ៍សាត់ កោះកុង សៀមរាប និងកំពង់ធំ។
ការណែនាំរបស់ក្រសួង បានធ្វើឡើងស្របពេលដែលភាពតានតឹងនៅព្រំដែនរវាងកម្ពុជា-ថៃ មានភាពតានតឹងជាថ្មី ក្រោយពីភាគីថៃបានណែនាំឱ្យប្រជាជនខ្លួនដែលនៅសេសសល់ នៅតំបន់ជាប់ព្រំដែនក្នុងខេត្តសុរិន្ទ ចាកចេញឱ្យអស់ត្រឹមយប់ថ្ងៃទី០៣ ខែសីហានេះ ដោយភាគីថៃគ្រោងនឹងបើកការវាយលុកតាមបន្ទាត់ព្រំដែន ចាប់តាំងពីតំបន់ប្រាសាទតាមាន់ ប្រាសាទតាក្របី ប្រាសាទព្រះវិហារ រហូតដល់តំបន់អានសេះ ក្នុងពេលឆាប់ៗ មុនកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ដែលគ្រោងនៅថ្ងៃទី០៧ ខែសីហា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី។ នេះបើតាមសេចក្តីជូនដំណឹងរបស់ក្រសួងការពារជាតិកម្ពុជា ចេញផ្សាយនៅកាលពីយប់ថ្ងៃអាទិត្យម្សិលមិញ។
តែយ៉ាងណា គិតមកដល់ព្រឹកថ្ងៃទី០៤ ខែសីហានេះ ក្រសួងការពារជាតិកម្ពុជា បញ្ជាក់ថា សភាពការណ៍នៅតំបន់ជួរមុខ នៅមានសភាពស្ងប់ស្ងាត់នៅឡើយ ប៉ុន្តែកងកម្លាំងកម្ពុជា ស្ថិតក្នុងការប្រុងប្រយ័ត្នខ្ពស់។ ក្រសួងបញ្ជាក់ដែរថា កម្ពុជាគោរពម៉ឺងម៉ាត់ទៅលើកិច្ចព្រមព្រៀងបទឈប់បាញ់ បានឯកភាពគ្នានៅទីក្រុងភូត្រាចាយ៉ា ប្រទេសម៉ាឡេស៊ី ថ្ងៃទី២៨ ខែកក្កដា ឆ្នាំ២០២៥៕
