អភិបាលតំបន់ បាននិយាយកាលពីថ្ងៃអាទិត្យថា ការវាយប្រហារដោយមីស៊ីលរបស់រុស្សី ទៅលើទីក្រុងម៉ៃកូឡៃយីវ(Mykolaiv) នៃភាគខាងត្បូងប្រទេសអ៊ុយក្រែន បានបណ្តាលឱ្យមនុស្សយ៉ាងហោចណាស់ ៧ នាក់ បានរងរបួស និងបានបំផ្លាញផ្ទះរាប់សិបខ្នង ព្រមទាំងអគារហេដ្ឋារចនាសម្ព័ន្ធស៊ីវិល។
ទីភ្នាក់ងារសារព័ត៌មាន រ៉យទ័រ(Reuters) បានរាយការណ៍នៅថ្ងៃទី៣ ខែសីហា ឆ្នាំ២០២៥នេះថា អភិបាលក្រុងម៉ៃកូឡៃយីវ(Mykolaiv) បាននិយាយថា មនុស្សពីរនាក់រងរបួស បានបញ្ជូនទៅមន្ទីរពេទ្យជាលទ្ធផលនៃការវាយប្រហារកាលពីល្ងាចថ្ងៃសៅរ៍។
លោកអភិបាលក្រុងបានបង្ហោះរូបភាពដែលបង្ហាញអំពីអគារលំនៅដ្ឋាន ត្រូវបានបំផ្លាញ ដោយមានកំទេចអគារជុំវិញ។ លោកបានបន្ថែមថា ផ្ទះឯកជន២៣ខ្នង អាផាតមិន ១២ខ្នង និងការិយាល័យប្រៃសនីយ៍មួយបានរងការខូចខាត។
យ៉ាងណារ៉យទ័រ(Reuters)ថា មិនអាចធ្វើការផ្ទៀងផ្ទាត់របាយកាណ៍ដោយឯករាជ្យបានទេ ដោយហេតុថាមិនមានការឆ្លើយតបភ្លាមៗ ពីសំណាក់រុស្សីអំពីការវាយប្រហារនេះ។ ភាគីទាំងពីរ បានបដិសេធមិនកំណត់ទិសដៅលើជនស៊ីវិលក្នុងសង្រ្គាម ដែលទីក្រុងមូស្គូបានចាប់ផ្តើមវាយលុកលុយអ៊ុយក្រែនពេញលេញក្នុងខែកុម្ភៈឆ្នាំ២០២២។
កងទ័ពអាកាសរបស់អ៊ុយក្រែន បាននិយាយលើតេលេក្រាម(Telegram)ថា រុស្សីបានបាញ់បង្ហោះបើកការវាយប្រហារដោយដ្រូន(drones)ចំនួន ៧៦គ្រឿង និងមីស៊ីល ៧គ្រាប់ សំដៅលើអ៊ុយក្រែនពេញមួយយប់ ដោយវាយប្រហារចំនួន ៨ទីតាំង នៅទូទាំងប្រទេសអ៊ុយក្រែន។ អង្គភាពការពារដែនអាកាសរបស់អ៊ុយក្រែន បានផ្លាញដោយដ្រូនចំនួន ៦០ និងមីស៊ីលមួយគ្រាប់ផងដែរ។
អភិបាលតំបន់ បាននិយាយថា នៅក្នុងតំបន់ជួរមុខហ្សាប់ប៉ូរ៉ូស្យែ(Zaporizhzhia) និងឃែរសុន(Kherson) យ៉ាងហោចណាស់មានមនុស្ស ៣នាក់បានស្លាប់ និងជាង១២នាក់ បានរងរបួស ជាលទ្ធផលនៃការវាយប្រហាររបស់រុស្សីក្នុងរយៈពេល ២៤ម៉ោង គិតត្រឹមថ្ងៃអាទិត្យនេះ៕
