អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ឱ្យដឹងមុននេះបន្តិចថា នៅព្រឹកម៉ោង១១ថ្ងៃទី៤ខែសីហានេះ ថៃបានបញ្ជូនកងកម្លាំងបំពាក់ដោយអាវុធ រួមទាំងគ្រឿងចក្រចូលក្នុងដែនអធិបតេយ្យកម្ពុជា ក្នុងតំបន់អានសេះ និងតំបន់ផ្សេងទៀត ហើយបានរាយបន្លាលួសនៅទីនោះ ទោះមានការរារាំងយ៉ាងខ្លាំងពីភាគីកម្ពុជាយ៉ាងណាក៏ដោយ។
អ្នកស្រីថា ទង្វើនេះ ជាការរំលោភលើបទឈប់បាញ់យ៉ាងគឃ្លើន និងបានបង្កការគំរាមកំហែងយ៉ាងធ្ងន់ធ្ងរចំពោះសន្តិភាព និងសន្តិសុខនៅតាមបណ្តោយព្រំដែននៃប្រទេសទាំងពីរ ក៏ដូចជាតំបន់ទាំងមូល។
ទង្វើនេះ កម្ពុជាអំពាវនាវដល់សហគមន៍អន្តរជាតិ ពិសេសប្រទេសដៃគូដែលជួយឱ្យមានបទឈប់បាញ់ដ៏លំបាកមួយនេះ ដោយទាមទារឱ្យភាគីថៃបញ្ឈប់ទង្វើឈ្លានពាននេះជាបន្ទាន់ និងគោរពឱ្យបានម៉ឺងម៉ាត់ នូវច្បាប់អន្តរជាតិ ជាពិសេសអធិបតេយ្យនិងបូរណភាពទឹកដីម្ពុជា។
បទឈប់បាញ់នេះ កម្ពុជា-ថៃ បានព្រមព្រៀងគ្នាលើ៣ចំនុច ក្រោមការចូលរួមអង្កេតតាមដានពីតំណាងមហាអំណាចចិន និងសហរដ្ឋអាមេរិក ដែលទី១ភាគីទាំងពីរឯកភាពគ្នាបទឈប់បាញ់បន្ទាន់ ឥតលក្ខខណ្ឌ ចាប់ពីវេលាម៉ោង១២យប់ ថ្ងៃទី២៨ ខែកក្កដា ឆ្នាំ២០២៥ទៅ។
ចំនុចទី២ ភាគីទាំងពីរព្រមព្រៀង ឱ្យរៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ ខាងភាគីថៃ យោធភូមិភាគទី១ និងទី២ និងភាគីកម្ពុជា យោធភូមិភាគទី៤ និងទី៥។ នៅថ្ងៃទី២៩ ខែកក្កដា បន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បើមានការឯកភាពពីភាគីទាំងពីរ និងទី៣ រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ ប៉ុន្តែពេលនេះ កិច្ចប្រជុំ(GBC) ត្រូវលើកទៅធ្វើនៅប្រទេសម៉ាឡេស៊ីវិញ៕
