គណៈកម្មាធិការសិទ្ធិមនុស្សកម្ពុជារបស់រដ្ឋាភិបាល បន្តស្នើទៅកាន់ស្ថាប័ន និងអង្គការសិទ្ធិមនុស្សអន្តរជាតិមួយចំនួន ដើម្បីជំរុញឱ្យមានការធ្វើទស្សនកិច្ច និងអធិការកិច្ចជាបន្ទាន់ នៅកន្លែងឃុំឃាំងទាហានកម្ពុជាទាំង១៨នាក់ ដែលត្រូវបានទាហានថៃចាប់ខ្លួនទៅមួយសប្តាហ៍មកហើយ នៅមិនទាន់មានការដោះលែងនៅឡើយ។
នៅថ្ងៃទី០៤ ខែសីហា ឆ្នាំ២០២៥ គណៈកម្មាធិការសិទ្ធិមនុស្សកម្ពុជា បានសេចក្តីសេចក្តីប្រកាសព័ត៌មានមួយ ដោយលើកឡើងថា ក្រោយកិច្ចព្រមព្រៀងឈប់បាញ់ចូលជាធរមានរយៈពេល ៨ម៉ោង នៅថ្ងៃទី២៩ ខែកក្កដា ឆ្នាំ២០២៥ ថៃបានចល័តទ័ពចូលមកចាប់ទាហានកម្ពុជាចំនួន ២០នាក់ ក្នុងបន្ទាយកងទ័ពកម្ពុជា។ ក្រោយមកនៅថ្ងៃទី០១ ខែសីហា ទាហានកម្ពុជាចំនួន ២នាក់ ត្រូវបានទាហានថៃដោះលែងមកវិញ ជាមួយនឹងស្ថានភាពបញ្ហាសុខភាពធ្ងន់ធ្ងរ។
ករណីនេះ គណៈកម្មាធិការសិទ្ធិមនុស្សកម្ពុជា ស្នើដល់តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំតំបន់អាស៊ីអាគ្នេយ៍ ប្រធានស្ថាប័នសិទ្ធិមនុស្សជាតិឯករាជ្យរបស់ប្រទេសថៃ តំណាងប្រទេសថៃប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា) និងប្រធានស្ថាប័នសិទ្ធិមនុស្សជាតិឯករាជ្យរបស់ប្រទេសម៉ាឡេស៊ី ជួយអន្តរាគមន៍ធ្វើទស្សនកិច្ចបែបមនុស្សធម៌នៅកន្លែងឃុំខ្លួនទាហានកម្ពុជាទាំង១៨នាក់ និងផ្ទៀងផ្ទាត់សុខុមាលភាពផ្លូវកាយ និងផ្លូវចិត្តរបស់ទាហាន ព្រមលក្ខខណ្ឌដែលពួកគេត្រូវបានឃុំខ្លួន។
ក្រៅពីនេះ គណៈកម្មាធិការនេះ ក៏បានស្នើឱ្យធានាឱ្យមានការដោះលែងជាបន្ទាន់ និងការព្យាបាលស្របតាមគោលការណ៍មនុស្សធម៌ បទដ្ឋានអន្តរជាតិ និងគោលការណ៍អាស៊ាន និងជួយសម្របសម្រួលឱ្យមានការទំនាក់ទំនងរវាងទាហានទាំង១៨នាក់ និងគ្រួសាររបស់ពួកនិងអ្នកពាក់ព័ន្ធផ្សេងទៀតផងដែរ។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានសរសេរនៅលើទំព័រហ្វេសប៊ុករបស់លោក នៅព្រឹកថ្ងៃទី០៥ ខែសីហានេះថា៖ «ខ្ញុំបានជួបស្ថាប័នអន្តរជាតិមួយដោយខ្ញុំសុំឲ្យក្រុមគាត់ជួយដល់យោធិនដែលថៃកំពុងឃុំ។ ខ្ញុំបានជម្រាបគាត់ថា បើចង់ជួយទាហានខែ្មរទាំង១៨រូប សុំចុះទៅជួយភ្លាមកុំបង្អង់ កុំស្តាប់ការបកស្រាយរបស់ថៃ ពីព្រោះពួកគេជំនាញខាងកុហក គឺកុហករាល់ថ្ងៃ កុហក ១០០០ដងក្នុង១ថ្ងៃ»។
គួររំឭកថា ចាប់តាំងពីទាហានថៃបានបើកការបាញ់ប្រហារមកលើទាហានកម្ពុជា កាលពីថ្ងៃទី២៤ខែកក្កដាមក ប្រជាពលរដ្ឋខ្មែរនៅគ្រប់ទិសទី គ្រប់និន្នាការនយោបាយទាំងនៅកម្ពុជា និងនៅតាមបណ្តាប្រទេសមួយចំនួន ដូចជា សហរដ្ឋអាមេរិក កាណាដា បារាំង អាល្លឺម៉ង់ ហូឡង់ អូស្ត្រាលី និងកូរ៉េខាងត្បូងជាដើម បានប្រមូលផ្តុំគ្នាដង្ហែក្បួន និងធ្វើបាតុកម្មទាមទារឱ្យថៃ បញ្ឈប់ការរំលោភឈ្លានពានមកលើបូរណៈភាពទឹកដីកម្ពុជា និងទាមទារឱ្យទាហានថៃ ដោះលែងទាហានកម្ពុជាដែលនៅសល់១៨នាក់វិញ។ ការតវ៉ារបស់ប្រជាជាតិខ្មែរនេះ ធ្វើឡើងស្របពេលដែលរាជរដ្ឋាភិបាលកម្ពុជា ក៏កំពុងខិតខំប្រឹងប្រែងធ្វើការចរចាឱ្យបញ្ឈប់បទឈប់បាញ់ជាស្ថាពរ តាមរយៈយន្តការការទូត និងច្បាប់អន្តរជាតិ៕
