កម្ពុជាបានអះអាងថា មកទល់ពេលនេះ ភាគីថៃកំពុងធ្វើសកម្មភាពដ៏គឃ្លើន រំលោភលើបទឈប់បាញ់ និងរំលោភបំពានបូរណភាពទឹកដីកម្ពុជា ដោយមិនទាន់រុះរើលួសបន្លាចេញពីតំបន់អានសេះ ហើយថែមទាំងធ្វើលេណដ្ឋាននៅទីនោះទៀតផង បើទោះបីកម្ពុជាអំពាវនាវឱ្យរុះរើចេញ។
ក្រសួងការពារជាតិកម្ពុជា បាននិយាយលើហ្វេសប៊ុករបស់ខ្លួននៅប៉ុន្មានម៉ោងមុននេះថា បច្ចុប្បន្នភាពនៃស្ថានភាពនៅទិសអានសេះ កងទ័ពថៃបានរំលោភបំពានមកលើបូរណភាពទឹកដីកម្ពុជា។
ក្រសួងបញ្ជាក់ថា នៅវេលាម៉ោង ៩:០៩នាទី គ្រឿងចក្រថៃបានបន្ដកាយដី ហើយនៅម៉ោង ៩:៥០នាទី មានរថយន្ដថៃ ០១គ្រឿង ដឹកលេណដ្ឋានបេតុង ក្នុងនោះកង់ឡាននិងលូ (ធ្វើរួច) មកទម្លាក់នៅមុខប៉ុស្តិ៍របស់ខ្លួន ហើយនៅវេលាម៉ោង៩:៥៣នាទី កម្លាំងកងទ័ពថៃបានបន្ដជីកលេណដ្ឋាន។
បើតាមប្រភពដដែល នៅវេលាម៉ោង ១០:៥៥នាទី គ្រឿងចក្រថៃមួយគ្រឿងទៀត បានមកឈូសឆាយនៅខាងក្រោយប៉ុស្តិ៍ប៉ូលីសចម្ងាយពីទីតាំងកងទ័ពកម្ពុជាប្រហែល ១៥ម៉ែត្រ និងបន្ដដាក់លូ និងកង់ឡាន ចូលលេណដ្ឋាន។
កម្ពុជាសង្កត់ធ្ងន់ថា នេះជាសកម្មភាពដ៏គឃ្លើនរបស់ថៃ ដែលរំលោភលើបទឈប់បាញ់ និងរំលោភបំពានបូរណភាពទឹកដីកម្ពុជា។ ចាប់តាំងពីព្រឹកថ្ងៃទី៥ ខែសីហានេះ កងទ័ពកម្ពុជាបានធ្វើទំនាក់ទំនងជាមួយកងទ័ពថៃ ដើម្បីឱ្យកងទ័ពថៃរុះរើបន្លាលួស និងដកចេញនូវគ្រឿងចក្ររបស់ខ្លួនជាបន្ទាន់ ពីដែនអធិបតេយ្យរបស់កម្ពុជា ហើយរហូតមកដល់ពេលនេះ មិនទាន់មានការរុះរើនៅឡើយ ហើយភាគីទាំងពីរបាននិងកំពុងពិភាក្សាគ្នា។
កិច្ចព្រមព្រៀងបទឈប់បាញ់បានចូលជាធរមាន នៅម៉ោង១២យប់ថ្ងៃទី២៨ ខែកក្កដា ឆ្នាំ២០២៥ រវាងកម្ពុជានិងថៃ ដែលបានធ្វើឡើងនៅប្រទេសម៉ាឡេស៊ី ក្រោមការសម្របសម្រួលពីប្រធានអាស៊ានប្តូរវេននាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលផ្តួចផ្តើមគំនិតដោយប្រធានាធិបតេយ្យអាមេរិកលោក ដូណាល់ ត្រាំ។
កិច្ចព្រមព្រៀងឈប់បាញ់បន្ទាន់នេះ ភាគីទាំងពីរបានឯកភាពគ្នាលើ៣ចំនុច ក្រោមការចូលរួមអង្កេតតាមដានពីតំណាងមហាអំណាចចិន និងសហរដ្ឋអាមេរិក។
ទី១ភាគីទាំងពីរ បានឯកភាពគ្នាលើបទឈប់បាញ់បន្ទាន់ ដោយឥតលក្ខខណ្ឌ ចាប់ពីវេលាម៉ោង១២យប់ ថ្ងៃទី២៨ ខែកក្កដា ឆ្នាំ២០២៥តទៅ។
ទី២ រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ ខាងភាគីថៃ យោធភូមិភាគទី១ និងទី២ និងភាគីកម្ពុជា យោធភូមិភាគទី៤ និងទី៥។ នៅថ្ងៃទី២៩ ខែកក្កដា បន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បើមានការឯកភាពពីភាគីទាំងពីរ ។
ទី៣ រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ ប៉ុន្តែពេលនេះ កិច្ចប្រជុំ(GBC) ត្រូវលើកទៅធ្វើនៅប្រទេសម៉ាឡេស៊ីវិញ៕
