កម្ពុជាជំរុញឱ្យថៃត្រូវរុះរើលួសបន្លា និងដកគ្រឿងចក្រចេញពីដែនដីកម្ពុជាជាបន្ទាន់ ដើម្បីបញ្ជាក់ថាប្រទេសជិតខាងមួយនេះ គោរពកិច្ចព្រមព្រៀងបទឈប់បាញ់ មិនរំលោភបំពានដែនអធិបតេយ្យកម្ពុជា ទាំងគឃ្លើន។
ការទាមទាររបស់កម្ពុជា ដោយសំអាងថា កាលពីថ្ងៃទី៤ខែសីហា យោធាថៃប្រដាប់ដោយអាវុធបានបន្តចល័តទ័ព អមដោយគ្រឿងចក្រធំៗ រំលោភចូលដែនដីកម្ពុជានៅតំបន់អានសេះ និងទីតាំងមួយចំនួនទៀត ហើយបានរាយលួសបន្លា បំពានលើបទឈប់បាញ់។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ក្នុងសន្និសីទសារព័ត៌មាន នៅថ្ងៃទី៥ខែសីហានេះ បានជំរុញឱ្យភាគីថៃ រុះរើលួសបន្លា និងដកគ្រឿងចក្រចេញពីដែនអធិបតេយ្យកម្ពុជាជាបន្ទាន់ ដើម្បីបញ្ជាក់ថា ថៃគោរពបទបាញ់។
អ្នកស្រីថាទង្វើគ្រប់យ៉ាងរបស់យោធាថៃ ជាការរំលោភបំពានយ៉ាងគឃ្លើនលើកិច្ចព្រមព្រៀងឈប់បាញ់និងបានគំរាមកំហែងយ៉ាងធ្ងន់ធ្ងរបំផុតចំពោះសន្តិភាព និងសន្តិសុខ តាមបន្ទាត់ព្រំដែននៃប្រទេសទាំងពីរ រួមទាំងតំបន់ទាំងមូល។
អ្នកស្រីថា៖ «ក្រសួងការពារជាតិសូមជំរុញយ៉ាងម៉ឺងម៉ាត់ ឱ្យព្រះរាជាណាចក្រថៃគោរពកិច្ចព្រមព្រៀងបទឈប់បាញ់ ដោយមិនគ្រាន់តែត្រឹមពាក្យសម្តីប៉ុណ្ណោះទេ ប៉ុន្តែតាមរយៈសកម្មភាពជាក់ស្តែងផងដែរ ដោយបញ្ឈប់រាល់ទង្វើអរិភាពទាំងឡាយ ដោយរុះរើលួសបន្លានិងដកចេញគ្រឿងចក្ររបស់ខ្លួនជាបន្ទាន់ ពីដែនអធិបតេយ្យភាពរបស់កម្ពុជា ដែលភាគីថៃមិនអាចយកលេសណាមួយ មកបំភ្លៃការពិតមួយនេះបានឡើយ»។
បន្ថែមពីនេះ ក្រសួងការពារជាតិថា កងទ័ពកម្ពុជាបានធ្វើទំនាក់ទំនងជាមួយកងទ័ពថៃ ដើម្បីឱ្យកងទ័ពថៃរុះរើបន្លាលួស និងដកចេញនូវគ្រឿងចក្ររបស់ខ្លួនជាបន្ទាន់ ពីដែនអធិបតេយ្យរបស់កម្ពុជា រហូតមកដល់ ថ្ងៃទី០៥ ខែសីហានេះ មិនទាន់មានការរុះរើនៅឡើយ ហើយភាគីទាំងពីរបាននិងកំពុងពិភាក្សាគ្នា។
លើសពីនេះ អ្នកស្រីអំពាវនាវដល់សហគមន៍អន្តរជាតិ ជាពិសេសប្រទេសដៃគូដែលខិតខំប្រឹងប្រែងជួយ ឱ្យសម្រេចបាននូវបទឈប់បាញ់ដ៏លំបាកមួយនេះ ហើយសុទ្ធតែមានបំណងចង់ឃើញបទឈប់បាញ់នេះ ត្រូវបានអនុវត្តដោយពេញលេញ និងប្រកបដោយប្រសិទ្ធភាព។
បទឈប់បាញ់នេះ កម្ពុជា-ថៃ បានព្រមព្រៀងគ្នាលើ៣ចំនុច ក្រោមការចូលរួមអង្កេតតាមដានពីតំណាងមហាអំណាចចិន និងសហរដ្ឋអាមេរិក ដែលទី១ភាគីទាំងពីរឯកភាពគ្នាបទឈប់បាញ់បន្ទាន់ ឥតលក្ខខណ្ឌ ចាប់ពីវេលាម៉ោង១២យប់ ថ្ងៃទី២៨ ខែកក្កដា ឆ្នាំ២០២៥ទៅ។
ចំនុចទី២ ភាគីទាំងពីរព្រមព្រៀង ឱ្យរៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ ខាងភាគីថៃ យោធភូមិភាគទី១ និងទី២ និងភាគីកម្ពុជា យោធភូមិភាគទី៤ និងទី៥។ នៅថ្ងៃទី២៩ ខែកក្កដា បន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បើមានការឯកភាពពីភាគីទាំងពីរ និងទី៣ រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ ប៉ុន្តែពេលនេះ កិច្ចប្រជុំ(GBC) ត្រូវលើកទៅធ្វើនៅប្រទេសម៉ាឡេស៊ីវិញ៕
