ស្ថានទូតជប៉ុនប្រចាំនៅកម្ពុជា ច្រានចោលព័ត៌មានឬពាក្យចចាមអារ៉ាមដែលថា រដ្ឋាភិបាលជប៉ុន បានផ្តល់ដ្រូនចម្បាំងដល់ប្រទេសថៃ ហើយក៏មិនដែលទទួលបានសំណើរបែបនេះពីប្រទេសថៃនោះដែរ ខណៈដែលជំនួយរបស់ប្រទេសនេះ ត្រូវបានកំណត់យ៉ាងតឹងរឹងចំពោះផ្នែកដែលមិនពាក់ព័ន្ធដោយផ្ទាល់ទៅនឹងជម្លោះអន្តរជាតិ។
យោងតាមសារនៅលើទំព័រហ្វេសប៊ុករបស់ស្ថានទូតជប៉ុនប្រចាំនៅកម្ពុជា (Embassy of Japan in Cambodia ស្ថានទូតជប៉ុននៅកម្ពុជា) នៅថ្ងៃទី០៦ ខែសីហានេះ បានលើកឡើងថា ថ្មីៗនេះ ស្ថានទូតជប៉ុន បានឃើញពាក្យចចាមអារ៉ាម ឬព័ត៌មានដែលថារដ្ឋាភិបាលជប៉ុននឹងផ្តល់ដ្រូនចម្បាំងដល់ប្រទេសថៃ ដែលព័ត៌មាននេះ គឺជាព័ត៌មានមិនពិតនោះទេ។
ប្រភពដដែលបន្តថា៖ «រដ្ឋាភិបាលជប៉ុន ពុំដែលមានគម្រោងផ្តល់គ្រឿងយន្តបែបនេះ ដល់ប្រទេសថៃ ហើយក៏មិនធ្លាប់បានទទួលសំណើរបែបនេះពីប្រទេសថៃដែរ។ ជំនួយរបស់ប្រទេសជប៉ុនត្រូវបានកំណត់យ៉ាងតឹងរ៉ឹង ចំពោះផ្នែកដែលមិនពាក់ព័ន្ធដោយផ្ទាល់ទៅនឹងជម្លោះអន្តរជាតិ»។
ស្ថានទូតនេះបន្តថា រដ្ឋាភិបាលជប៉ុន ចាត់ទុកការអនុវត្តកិច្ចព្រមព្រៀងបទឈប់បាញ់ រវាងប្រទេសកម្ពុជា និងថៃ និងការស្តារឡើងវិញនូវសន្តិភាពឱ្យបានឆាប់ ថាមានសារៈសំខាន់ខ្លាំងណាស់ ហើយសង្ឃឹមថា ប្រជាជនកម្ពុជានឹងអាចវិលទៅរកជីវភាពប្រចាំថ្ងៃដោយសុខសាន្តនាពេលឆាប់ៗនេះ។
កាលពីថ្ងៃទី១ ខែសីហា ឆ្នាំ២០២៥ ឯកអគ្គរាជទូតជប៉ុនប្រចាំនៅកម្ពុជា លោក អ៊ូអិណុ និងអង្គទូតផ្សេងទៀត ក៏បានទៅកាន់កន្លែងជម្រកសម្រាប់ពលរដ្ឋខេត្តឧត្តរមានជ័យ ដែលបានភៀសខ្លួនចេញពីតំបន់ជម្លោះព្រំដែនកម្ពុជា-ថៃផងដែរ។ នេះបើតាមហ្វេសប៊ុករបស់ស្ថានទូតជប៉ុននៅកម្ពុជា។
ប្រភពដដែលបានស្រង់សម្តី លោក អ៊ូអិណុ ថា លោកមានការក្តុកក្តួលក្នុងចិត្តជាខ្លាំង នៅពេលដែលបានឃើញស្ថានភាពលំបាក់របស់ពលរដ្ឋភៀសសឹក និងទំហំនៃការខូចខាតដោយសារការប៉ះទង្គិចរវាងយោធានៃប្រទេសទាំងពីរនេះ និងចូលរួមរំលែកទុក្ខចំពោះវិញ្ញាណក្ខន្ធអ្នកដែលបានពលីជីវិតក្នុងហេតុការណ៍នេះ។ លោកសង្ឃឹមថា សន្តិភាពពេញលេញនឹងត្រូវបានស្ដារឡើងវិញឱ្យបានលឿនបំផុត ហើយរដ្ឋាភិបាលជប៉ុន និងរូបលោកផ្ទាល់នឹងខិតខំអស់ពីសមត្ថភាព ដើម្បីសម្រេចបាននូវចំណុចនេះ៕
