តុលាការខេត្តកំពង់ស្ពឺ បានសម្រេចផ្តន្ទាទោស លោក សុខ ស៊ុនណារ៉េត ដែលជាឪពុករបស់ លោក ស៊ន តារា អ្នកអត្ថាធិប្បាយនយោបាយ ឱ្យជាប់ពន្ធនាគារ ៤ឆ្នាំ ពាក់ព័ន្ធនឹងសំណុំរឿង «រក្សាទុកដោយខុសច្បាប់នូវសារធាតុញៀន»។
លោក សុខ ស៊ុនណារ៉េត ត្រូវបានសមត្ថកិច្ចខេត្តកំពង់ស្ពឺ ចាប់ខ្លួន កាលពីថ្ងៃទី១៣ ខែវិច្ឆិកា ឆ្នាំ២០២៤ អំឡុងពេលមេបញ្ជាការភូមិភាគ៣ បានហៅលោកឱ្យទៅជួប ហើយលោកត្រូវបានតុលាការខេត្តកំពង់ស្ពឺ ចោទប្រកាន់ និងបញ្ជូនទៅឃុំខ្លួននៅពន្ធនាគារបណ្តោះអាសន្ន ពាក់ព័ន្ធការរក្សាទុកដោយខុសច្បាប់នូវសារធាតុញៀន។ នៅថ្ងៃទី០៩ ខែកក្កដា ឆ្នាំ២០២៥ តុលាការខេត្តកំពង់ស្ពឺ បានបើកសវនាការសួរដេញដោលលើសំណុំរឿងរបស់លោក ហើយនិងត្រូវប្រកាសសាលក្រមនៅថ្ងៃទី០៦ ខែសីហានេះ។
សេចក្តីប្រកាសព័ត៌មានរបស់សាលាដំបូងខេត្តកំពង់ស្ពឺ បានឱ្យដឹងថា នៅថ្ងៃទី០៦ ខែសីហានេះ ចៅក្រមជំនុំជម្រះបានប្រកាសសាលក្រមជាសាធារណៈលើសំណុំរឿងព្រហ្មទណ្ឌ ដែលមានជនជាប់ចោទឈ្មោះ សុខ ស៊ុនណារ៉េត អាយុ ៦៦ឆ្នាំ ដែលបានសម្រេចផ្តន្ទាទោសលើពិរុទ្ធជនរូបនេះ ដាក់ពន្ធនាគារកំណត់រយៈពេល ៤ឆ្នាំ ពីបទ រក្សាទុកដោយខុសច្បាប់នូវសារធាតុញៀន ប្រព្រឹត្តនៅភូមិដកពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ តាមមាត្រា៤០ និង៤៨នៃច្បាប់ស្តីពីការត្រួតពិនិត្យគ្រឿងញៀន។
លោក ស៊ន សារ៉ាត់ កូនប្រុសរបស់លោក សុខ ស៊ុនណារ៉េត បានចាត់ទុកការសម្រេចរបស់តុលាការនេះថាជារឿងអយុត្តិធម៌សម្រាប់ឪពុករបស់លោក ដែលជាមនុស្សស្លូតត្រង់ និងគ្មានកំហុស។ ករណីនេះ លោកបានស្នើយ៉ាងទទូចដល់តុលាការពិចារណាឡើងវិញ ក្នុងការទម្លាក់បទចោទ និងដោះលែងឪពុករបស់លោកឱ្យមានសេរីភាពវិញ។
លោកថា៖ «ខ្ញុំគិតថា នេះគឺជារឿងដ៏អយុត្តិធម៌ខ្លាំងបំផុតសម្រាប់គាត់ ដែលជាជនស្លូតត្រង់ និងមិនបានប្រព្រឹត្តកំហុសដូចការចោទប្រកាន់។ ទោះជាយ៉ាងណា យើងនៅតែទទូចស្នើឱ្យទម្លាក់បទចោទ ប្រឆាំងនឹងរូបគាត់ ហើយទទូចឱ្យមានការដោះលែង និងផ្តល់សេរីភាពដល់គាត់ឡើងវិញ»។
លោក ស៊ន តារា បានផុសនៅលើបណ្តាញសង្គមហ្វេសប៊ុករបស់លោកនៅថ្ងៃពុធនេះថា ឪពុករបស់លោក ជាជនស្លូតត្រង់ គ្មានកំហុស និងបម្រើជាតិ បែរជាត្រូវជាប់ពន្ធនាគារដល់ទៅ ៤ឆ្នាំ។ លោកបានប្រៀបធៀបករណីផ្តន្ទាទោសឪពុករបស់លោកដាក់ពន្ធនាគារ ទៅនឹងករណីទាហានថៃចាប់ទាហានខ្មែរ ១៨នាក់ ជាចំណាប់ខ្មាំង ដែលជាការបំបាក់ទឹកចិត្តកងទ័ព។
លោកបានសរសេរបន្ថែមថា៖ «សូមជាតិនិងអន្តរជាតិ អន្តរាគមន៍ដើម្បីដោះលែងទាហានខ្មែរ១៨នាក់ដែលថៃចាប់ និងឪពុករបស់ខ្ញុំ»។
មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក យី សុខសាន្ត ដែលតាមសំណុំរឿងនេះ យល់ឃើញស្រដៀងគ្នានេះថា ការផ្តន្ទាទោសលោក សុខ ស៊ុនណារ៉េត ដាក់ពន្ធនាគារ ៤ឆ្នាំ និងដកហូតរថយន្តមួយគ្រឿង និងទូរស័ព្ទមួយគ្រឿង ពីសំណាក់តុលាការនេះ ជារឿងអយុត្តិធម៌សម្រាប់គាត់ ដែលតុលាការគួរពិចារណាឡើងវិញទៅលើសេចក្តីសម្រេចនេះ។
លោកថា៖ «ភស្តុតាងខ្លះ ដែលចោទប្រកាន់គាត់ ហេតុអីពីមុនមិនចាត់ការតាមផ្លូវច្បាប់មកលើគាត់ ហើយនៅពេលដែលចោទប្រកាន់គាត់ថាតើសាវតាឪពុកលោក ស៊ន តារា ហ្នឹងគាត់ជាអ្នកជួញដូរគ្រឿងញៀន ផលិតគ្រឿងញៀន ឬមួយក៏ជាអ្នកចែកចាយគ្រឿងញៀន ហើយអ្វីដែលជាភស្តុតាងដែលដាក់បន្ទុកគាត់នេះ បើតាម គាត់ទទួលស្គាល់ថានៅក្នុងឡានគាត់ ប៉ុន្តែគាត់ថាមិនមែនជារបស់គាត់ នេះគួរតែពិចារណាទៅលើការសម្រេចក្តី»។
លោក សុខ ស៊ុនណារ៉េត កន្លងមក ក៏ធ្លាប់បានប្រាប់តុលាការថា លោកជាមនុស្សស្អាតស្អំ ដោយមិនបានរក្សាទុកសារធាតុញៀននោះទេ ស្របពេលលោកជាអតីតយោធិន ចូលបម្រើការងារជូនជាតិដោយភក្ដីភាព ស្ទើរពេញមួយជីវិត ដោយបន្សល់ទុកនូវស្នាមរបួស និងជំងឺរ៉ាំរ៉ៃមកទល់សព្វថ្ងៃ។
ជុំវិញករណីនេះ អ្នកនយោបាយនៅក្រៅប្រទេស មានប្រតិកម្មជាហូរហែថា ការចាប់ខ្លួនលោក ណារ៉េត ជាយុទ្ធសាស្ត្រថ្មីរបស់ត្រកូលហ៊ុន ដែលចង់បំបិទមាត់សំឡេងរិះគន់ ស្របពេលដែលកូនរបស់លោក ណារ៉េត គឺលោក ស៊ន តារា ជាអ្នកអធិប្បាយនយោបាយដ៏លេចធ្លោមួយរូបនៅលើបណ្តាញសង្គម ដែលតែងរិះគន់មិនសំចៃពីសកម្មភាពរដ្ឋាភិបាលកម្ពុជា។
ក្រុមអ្នកនយោបាយប្រឆាំងរស់នៅក្រៅប្រទេស យល់ថា ការចាប់ខ្លួនលោក សុខ ស៊ុនណារ៉េត គឺជារឿងនយោបាយសុទ្ធសាទ។ ក៏ប៉ុន្តែបក្សកាន់អំណាច បានបញ្ជាក់ថា ការចាប់ខ្លួនធ្វើឡើងដោយផ្អែកលើបទល្មើសជាក់ស្តែង ដែលនៅក្នុងនោះ លោក សុខ ស៊ុនណារ៉េត ត្រូវបានរកឃើញថា មានរក្សាទុកដោយខុសច្បាប់នូវសារធាតុញៀន។
ចំណែក ក្រុមអ្នកតស៊ូមតិកម្ពុជា ហៅកាត់ថា CAT បានចេញសេចក្តីថ្លែងការណ៍មួយ កាលពីចុងខែវិច្ឆិកា ឆ្នាំ២០២៤ ដោយចាត់ទុកសកម្មភាពរបស់រដ្ឋាភិបាល និងប្រធានរដ្ឋសភា ទៅលើឪពុកលោក ស៊ន តារា ថាជាការបំបិតសំឡេងអ្នកដែលហ៊ានរិះគន់ចំពោះការ់ដឹកនាំរបស់ខ្លួន។ ករណីនេះ ក្រុមអ្នកតស៊ូមតិកម្ពុជា បានអំពាវនាវឱ្យមានការដោះលែងឪពុកលោក ស៊ន តារា ឱ្យមានសេរីភាពវិញ៕
