ក្រសួងការពារជាតិកម្ពុជា អះអាងថា ស្ថានភាពនៅព្រំដែនមានភាពស្ងប់ស្ងាត់ ស្ថិតក្រោមការការពារឃ្លាំមើលយ៉ាងតឹងរឹង ពីសំណាក់កងទ័ពកម្ពុជា ខណៈសារព័ត៌មានក្នុងស្រុកមួយចំនួនរាយការណ៍ថា យោធាថៃបានរាយលួសបន្លាជាថ្មីទៀត នៅតំបន់អានសេះ ក្រោយកម្ពុជារុះរើយកចេញម្តងរួចហើយ។
ក្នុងសន្និសីទសារព័ត៌មាននៅថ្ងៃទី៦ ខែសីហានេះ អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ឱ្យដឹងថា ស្ថានភាពព្រំដែនកម្ពុជា-ថៃ មានសភាពស្ងប់ស្ងាត់ ដោយឡែកនៅតំបន់អានសេះវិញ ក្រោយពេលថៃដកបន្លាលួស ពេលនេះកំពុងស្ថិតនៅក្រោមការឃ្លាំមើលយ៉ាងយកចិត្តទុកដាក់របស់ភាគីកម្ពុជា។
យ៉ាងណា អ្នកស្រីមិនបានឆ្លើយតបចំពោះការចុះផ្សាយថា យោធាថៃបានរាយបន្លាលួសជាថ្មីម្តងទៀត នៅតំបន់អានសេះ នាព្រឹកថ្ងៃទី៦ ខែសីហានេះនោះទេ។
អ្នកស្រីថា៖ «ចំពោះស្ថានភាពនៅតំបន់អានសេះ កំពុងស្ថិតនៅក្រោមការឃ្លាំមើល ដោយប្រុងប្រយ័ត្នខ្ពស់បំផុតដោយកងកម្លាំងកម្ពុជា ដើម្បីពង្រឹងការអនុវត្តតាមស្មារតីបទឈប់បាញ់ ដែលកម្ពុជាគោរពយ៉ាងម៉ឺងម៉ាត់បំផុត ក្នុងការអនុវត្តបទឈប់បាញ់ ដែលបានឯកភាពគ្នានៅទីក្រុងពុត្រាចាយ៉ា នៅប្រទេសម៉ាឡេស៊ី កាលពីថ្ងៃទី២៨ ខែសីហា ឆ្នាំ២០២៥»។
សារព័ត៌មានក្នុងស្រុកមួយចំនួនសិ្នទ្ធិនឹងរដ្ឋាភិបាល រួមមាន ទូរទស្សន៍ CNC និងសារព័ត៌មានដើមអម្ពិល បានរាយការណ៍ថា យោធាថៃ បានរាយបន្លាលួស នៅតំបន់អានសេះ ជាថ្មីម្តងទៀត នាព្រឹកថ្ងៃទី៦ ខែសីហានេះ។
កាលពីថ្ងៃទី៤ ខែសីហា យោធាថៃបានរាយលួសបន្លានៅតំបន់អានសេះ តែត្រូវក្រសួងការពារជាតិ បញ្ជាក់ថា បានរុះរើវិញនៅរសៀលថ្ងៃទី៥ ខែសីហា ឆ្នាំ២០២៥ ក្រោយពីយោធាកម្ពុជា និងភាគីថៃប្រចាំការនៅតំបន់អានសេះ បានជួបពិភាក្សា និងចរចាគ្នារួចមក។
យ៉ាងណា ជម្លោះព្រំដែនកម្ពុជាថៃនេះ ក្រសួងការពារជាតិកម្ពុជា បញ្ជាក់ថា ចំនួនជនភៀសសឹក គិតត្រឹមថ្ងៃទី៤ ខែសីហា ឆ្នាំ២០២៥ មានសរុបចំនួនជាង១២ម៉ឺននាក់ ដែលមកពីខេត្តឧត្តរមានជ័យ ខេត្តព្រះវិហារ ខេត្តបន្ទាយមានជ័យ ខេត្តពោធិ៍សាត់ និងខេត្តសៀមរាប។
ក្នុងនោះខេត្តព្រះវិហារនាំមុខគេ មានជនភៀសសឹកចំនួនជាង ៤ម៉ឺន២ពាន់នាក់ (៤២ ០១៦ នាក់) តាមពីក្រោយដោយខេត្តសៀមរាប មានជាង៣ម៉ឺន៩ពាន់នាក់(៣៩ ៤៨៦ នាក់) រីឯខេត្តឧត្តរមានជ័យមានជាង ៣ម៉ឺន៤ពាន់នាក់(៣៤ ០២៧នាក់)៕
