ថៃប្រឈមមុខនឹងការខាតបង់ចំនួន ១.៨៥ពាន់លានដុល្លារ ក្នុងពាណិជ្ជកម្មជាមួយប្រទេសកម្ពុជា ក្នុងឆ្នាំនេះ លុះត្រាតែភាគីទាំងពីរឈានដល់ដំណោះស្រាយយូរអង្វែងចំពោះជម្លោះ បើតាមការប៉ាន់ស្មានរបស់រដ្ឋាភិបាលថៃ ខណៈភាគីទាំងពីររៀបចំជំនួយសម្រាប់អ្នកដែលរងផលប៉ះពាល់ដោយផ្ទាល់ពីការប្រយុទ្ធគ្នា។
បើតាមប្រភពនីគីអេស៊ា(Nikkie Asia)បានឱ្យដឹងនៅថ្ងៃទី០៦ ខែសីហា ឆ្នាំ២០២៥ថា គណៈរដ្ឋមន្ត្រីថៃកាលពីថ្ងៃអង្គារ បានអនុម័តគម្រោងផែនការផ្តល់សំណងចំនួន ១០លានបាត ដែលស្មើនឹង ៣០៩ ០០០ដុល្លារ ដល់គ្រួសារទាហាននីមួយៗ ដែលបានស្លាប់ក្នុងជម្លោះ ក៏ដូចជា ៨លានបាតដល់គ្រួសារជនស៊ីវិលដែលបានស្លាប់។
ប្រភពបន្តថា ភាគីកម្ពុជាក៏រងការខូចខាតធ្ងន់ធ្ងរផងដែរ លោកនាយករដ្ឋមន្ត្រី ហ៊ុន ម៉ាណែត បានអំពាវនាវដល់ស្ថាប័នហិរញ្ញវត្ថុថា ‘‘ជួយសម្រាលបន្ទុកហិរញ្ញវត្ថុកងប្រដាប់អាវុធរបស់យើងអ្នកដែលសកម្ម ក្នុងប្រតិបត្តិការការពារដែនបូរណភាពទឹកដីរបស់យើង ក៏ដូចគ្រួសារដែលអ្នកស្លាប់ រងរបួស និងជនស៊ីវិលដែលភៀសខ្លួនដោយសារជម្លោះ’’។
យោងតាមក្រសួងពាណិជ្ជកម្មថៃ ការនាំចេញរបស់ប្រទេសថៃទៅកម្ពុជា មានតម្លៃប្រហែលចំនួន ៩.២ ពាន់លានដុល្លារកាលពីឆ្នាំមុន ហើយបានកើនឡើងប្រហែល ១៣ដង ក្នុងរយៈពេល ២០ឆ្នាំ។ យោងតាមប្រភពរដ្ឋាភិបាលថៃ កំណើនសេដ្ឋកិច្ចរបស់ប្រទេសថៃ បានជំរុញឱ្យសេដ្ឋកិច្ចមានការកើនឡើង ប៉ុន្តែប្រជាជាតិនេះនឹងខាតបង់ចំនួន ១.៨៥ពាន់លានដុល្លារ ក្នុងការនាំចូលទៅប្រទេសកម្ពុជា ប្រសិនបើព្រំដែននៅតែបន្តបិទរហូតដល់ដំណាច់ឆ្នាំ។
បន្ថែមពីនេះ ការនាំចេញដែលមានហានិភ័យសំខាន់ៗ រួមមាន រថយន្ត គ្រឿងបន្លាស់រថយន្ត គ្រឿងម៉ាស៊ីន និងអាហារស្រស់ៗ ដូចជា ផ្លែឈើ និងទឹកដោះគោ។ ប្រទេសកម្ពុជា ក៏កំពុងរឹតបន្តឹងការនាំចូលប្រេងផលិតដោយថៃ និងប្រេងឥន្ធនៈផ្សេងទៀត ហើយថៃគឺជាដៃគូពាណិជ្ជកម្មធំទីបួនរបស់ប្រទេសកម្ពុជា។
លើសពីនេះ ក្រុមហ៊ុនអែនអេក្សខេស្រ្ពីង (NHK Spring) ដែលជាក្រុមហ៊ុនផ្គត់ផ្គង់គ្រឿងបន្លាស់រថយន្តជប៉ុនមានទីតាំងនៅក្នុងប៉ោយប៉ែត ប្រទេសកម្ពុជាជិតព្រំដែនថៃ។ ក្រុមហ៊ុននេះ នឹងពិចារណាប្តូរការដឹកជញ្ជូនតាមសមុទ្រសម្រាប់ការផ្គត់ផ្គង់របស់ខ្លួនទៅប្រទេសថៃ៕
