កម្ពុជាបានបញ្ចេញព័ត៌មានតិចតួច ពីលទ្ធផលនៃប្រជុំគណៈកម្មាធិការព្រំដែនទូទៅកម្ពុជា-ថៃ (GBC) នៅប្រទេសម៉ាឡេស៊ី ដោយគ្រាន់តែបញ្ជាក់ថា កិច្ចប្រជុំនាំមកនូវលទ្ធផលប្រកបដោយផ្លែផ្កា ដែលភាគីទាំងពីរបានឯកភាពលើបទឈប់បាញ់ និងការរៀបចំយន្តការសម្រាប់អនុវត្ត។
ក្រសួងការពារជាតិ បាននិយាយប៉ុន្មានម៉ោងមុននេះថា លទ្ធផលកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅប្រទេសម៉ាឡេស៊ី ដែលដឹកនាំដោយរដ្ឋមន្ត្រីក្រសួងការពារជាតិ លោក ទៀ សីហា និងរដ្ឋមន្រ្តីស្តីទីក្រសួងការពារជាតិថៃ លោក ណាត់ថាក់ផុន ណាកផានីត បានប្រព្រឹត្តទៅក្នុងបរិយាកាសស្ថាបនា និងវិជ្ជមាន។
ក្រសួងបញ្ជាក់ថា លទ្ធផលនេះ នាំមកនូវលទ្ធផលប្រកបដោយផ្លែផ្កា ភាគីទាំងពីរក៏បានឯកភាពលើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្ត។
ភាគីកម្ពុជា និងភាគីថៃ បានឯកភាពអនុម័តនូវកំណត់ហេតុនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) រវាងកម្ពុជា និងថៃ និងសេចក្តីថ្លែងការណ៍រួម។
កិច្ចព្រមព្រៀងបទឈប់បាញ់កម្ពុជា-ថៃ បានចូលជាធរមានចាប់ពីម៉ោង១២រំលងអាធ្រាតថ្ងៃទី២៨ ខែកក្កដា ក្រោមការសម្របសម្រួលដោយប្រធានអាស៊ានប្តូរវេន នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ឹម ក្រោមគំនិតផ្តួចផ្តើមរបស់ប្រធានាធិបតីអាមេរិក លោក ដូណាល់ ត្រាំ។
ប៉ុន្តែគិតត្រឹមថ្ងៃទី៧ខែសីហានេះ កម្ពុជានៅតែអះអាងថា ភាគីថៃមិនទាន់ប្រគល់ទាហានខ្មែរចំនួន១៨រូបមកឱ្យកម្ពុជាវិញនៅឡើយទេ បើទោះបីកម្ពុជាចោទថា យោធាថៃ បានរំលោភបទឈប់បាញ់៕
