ក្រសួងការងារព្រមានចាត់វិធានការច្បាប់ទៅលើជនរូបណា ដែលទាមទារឱ្យពលរដ្ឋបង់ប្រាក់ ឬផ្តល់អត្ថប្រយោជន៍ជាវត្ថុ ជាថ្នូរនឹងការទទួលបានការងារធ្វើនៅកម្ពុជា ដែលការណ៍នេះ សង្គមស៊ីវិលទាមទារឱ្យរដ្ឋាភិបាល បង្កើតប្រព័ន្ធតាមដានលើបណ្តាញសង្គម ដើម្បីពង្រឹងប្រសិទ្ធភាព។
ការព្រមានរបស់ក្រសួង ធ្វើឡើងស្របពេលដែលមានពលករខ្មែរជាច្រើនម៉ឺននាក់ បាននាំគ្នាសម្រុកមកកាន់មាតុប្រទេសវិញ ដោយសារជម្លោះព្រំដែនកម្ពុជា-ថៃ។
សេចក្តីជូនដំណឹងរបស់ក្រសួងការងារ ចុះថ្ងៃទី០៧ ខែសីហា ឆ្នាំ២០២៥ បានលើកឡើងថា យោងតាមច្បាប់ការងារ និងក្រមព្រហ្មទណ្ឌ ការទាមទារឱ្យប្រជាពលរដ្ឋបង់ប្រាក់ ឬផ្តល់អត្ថប្រយោជន៍ជាវត្ថុដោយជនណាមួយ ជាថ្នូរនឹងការទទួលបានការងារធ្វើនៅកម្ពុជា គឺជាអំពើល្មើសច្បាប់ បើទោះបីជាការផ្តល់នោះធ្វើឡើងដោយការស្ម័គ្រចិត្តរបស់អ្នកស្នើរកការងារធ្វើក៏ដោយ។
ប្រភពដដែលបន្តថា សកម្មភាពទាំងនេះ ត្រូវបានចាត់ទុកជាអំពើឆបោក និងកេងប្រវ័ញ្ចកម្លាំងពលកម្ម ដែលត្រូវផ្តន្ទាទោសដាក់ពន្ធនាគារពី ៦ខែ ដល់ ៣ឆ្នាំ និងត្រូវទទួលការពិន័យជាប្រាក់តាមច្បាប់ការងារ ព្រមទាំងត្រូវទទួលទោសផ្សេងទៀតតាមច្បាប់ និងបទប្បញ្ញត្តិពាក់ព័ន្ធជាធរមាន។
ករណីនេះ ក្រសួងបានអំពាវនាវដល់កម្មករនិយោជិត និងសាធារណជន ដែលបានរងគ្រោះឬបានដឹងករណីទារប្រាក់ ឬផ្តល់អត្ថប្រយោជន៍ជាវត្ថុ ជាថ្នូរនឹងការទទួលបានការងារធ្វើ អាចប្តឹងទៅកាន់ក្រសួងតាមលេខ ១២៨៦ ឬប្រអប់បណ្តឹងអនាមិករបស់ក្រសួង ដើម្បីអធិការការងារ ចាត់វិធានការតាមច្បាប់ចំពោះជនល្មើស។
វីអូឌី មិនអាចសុំការបញ្ជាក់បន្ថែមលើបញ្ហានេះពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានទេ នៅថ្ងៃទី០៨ ខែសីហានេះ។
ការលើកឡើងពីបញ្ហាផ្លូវច្បាប់ និងការព្រមានចាត់វិធានការច្បាប់លើជនឆ្លៀតឱកាស ដែលទាមទារឱ្យប្រជាពលរដ្ឋបង់ប្រាក់ ឬផ្តល់អត្ថប្រយោជន៍ជាវត្ថុ ជាថ្នូរនឹងការទទួលបានការងារធ្វើនេះ គឺកើតឡើងស្របពេលដែលមានពលករខ្មែររាប់ម៉ឺននាក់ ដែលធ្វើការ និងស្នាក់នៅប្រទេសថៃ បាននាំគ្នាសម្រុកត្រឡប់មកប្រទេសកម្ពុជា ក្រោយមានការផ្ទុះអាវុធនៅតាមព្រំដែនរវាងប្រទេសទាំងពីរ កាលពីថ្ងៃទី២៤ ខែកក្កដា ដល់យប់ថ្ងៃទី២៨ ខែកក្កដា ឆ្នាំ២០២៥កន្លងទៅនេះ។
ករណីជម្លោះព្រំដែន និងការផ្ទុះអាវុធដែលបង្កឡើងដោយភាគីថៃបានបាញ់មុននេះ ព្រមទាំងមានការគំរាមកំហែងមួយចំនួនលើពលករខ្មែរនៅថៃនោះ បានឈានទៅដល់ការអំពាវនាវឱ្យប្រជាពលរដ្ឋខ្មែរនៅទីនោះ ឱ្យត្រឡប់មករស់នៅ និងធ្វើការនៅកម្ពុជាវិញ ពីសំណាក់រដ្ឋាភិបាលកម្ពុជា។
ជុំវិញការបង្ហោះសេចក្តីជូនដំណឹងនេះ នៅលើទំព័រហ្វេសប៊ុករបស់ក្រសួងការងារ ក៏មានពលរដ្ឋខ្មែរមួយចំនួន បានលើកឡើងពីបញ្ហាដែលពួកគាត់ជួបប្រទះផងដែរ។
គណនីហ្វេសប៊ុកឈ្មោះ Pözz Ñê បានលើកឡើងថា រូបគាត់ និងសាច់ញាតិ ៣នាក់ទៀត បានជួបផ្ទាល់ចំពោះករណីនៃការទារលុយជាថ្នូរនឹងបានការងារធ្វើនោះ ដោយក្នុងនោះអ្នកប្រព្រឹត្តបានទាមទារលុយពីគាត់ក្នុងម្នាក់ ៥ម៉ឺនរៀល។
គាត់សរសេរក្នុងសំណេរដើមថា៖ «ខ្ញុំឃើញគេផុស[រើស]កម្មករ នៅម្ដុំថ្នល់ទទឹង ខ្ញុំក៏ទាក់ទងទៅ ពេលទៅហើយ គេឱ្យថតចម្លងឯកសារដល់ពេលធ្វើហើយទើបប្រាប់ថា ថ្លៃនាំចូលអស់ ៥ម៉ឺន ខ្ញុំអត់មានលុយឱ្យគេ ខ្ញុំទើបចុះមកពីថៃ លុយមិនបានផង មានលុយតិចតួចទុកគ្រាន់ថ្លៃបន្ទប់ជួលនិងថ្លៃហូបចុក»។
គណនីហ្វេសប៊ុកមួយទៀត ឈ្មោះ Vanda Him ក៏បានលើកឡើងដែរថា ថ្មីៗនេះ ក៏មានករណីទារលុយ ដើម្បីទទួលបានការងារធ្វើដែរ ដោយក្នុងម្នាក់ គេតម្រូវឱ្យបង់លុយចំនួន ១០ម៉ឺន ទៅ១២ម៉ឺនរៀល ទៅតាមមេការដែលគេនាំចូល។
លោកបន្តក្នុងសំណេរដើមថា៖ «ខ្ញុំពិតជាមិនសប្បាយចិត្តទេ ពេលដែលឃើញមេការមួយចំនួនទារលុយដល់កម្មករដែលមានបំណងចង់បម្រើការងារ នៅតាមក្រុមហ៊ុនឬរោងចក្រណាមួយនោះ ហើយត្រូវមេការទាំងនោះទារលុយមុនចំនួន ១០ម៉ឺនឬក៏១២ម៉ឺន ទៅតាមការងារ។ ខ្ញុំសូមបញ្ជាក់ថា នេះជារឿងពិតដែលកើតមានឡើងនៅពេលថ្មីៗនេះ»។
អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ យល់ថា ការព្រមានរបស់ក្រសួងការងារ នឹងអាចជួយទប់ស្កាត់បានខ្លះនូវការកើតមានការយកប្រាក់ជាយូរនឹងការទទួលបានការងារនេះដែរ ខណៈបញ្ហានេះធ្លាប់កើតមាននៅតាមបណ្តារោងចក្រសហគ្រាសមួយចំនួន ដែលមានទម្រង់ជាប្រព័ន្ធ។
តែយ៉ាងណា លោកជំរុញឱ្យក្រសួងបង្កើតគណៈកម្មការចំពោះកិច្ចមួយ ដើម្បីធ្វើការស្រាវជ្រាវ ស៊ើបអង្កេត និងដោះស្រាយបញ្ហាទាំងនេះឱ្យមានប្រសិទ្ធភាព ជាពិសេសអំឡុងពេលដែលពលករខ្មែររាប់ពាន់នាក់ដែលចំណាកស្រុកទៅធ្វើការនៅប្រទេសថៃ បានត្រឡប់មកមាតុប្រទេសវិញ ហើយពួកគេកំពុងព្យាយាមស្វះស្វែងរកការងារធ្វើ។
លោកថា៖ «ចឹងករណីនេះ វាអាចថាជាការឆ្លៀតឱកាសរបស់អ្នកដែលធ្លាប់ប្រើប្រាស់នូវទម្រង់នៃការផ្តល់ជាសេវា ពីសំណាក់កម្មករដែលគាត់ស្វែងរកការងារធ្វើ ព្រោះករណីនេះ វាធ្លាប់កើតមានឡើងនៅតាមបណ្តាក្រុមហ៊ុនសហគ្រាស រោងចក្រមួយចំនួនដែរកន្លងមក។ ព្រោះបច្ចុប្បន្ននេះ យើងឃើញមានការផ្សព្វផ្សាយនៅតាមបណ្តាញសង្គមនានាជាច្រើន ពាក់ព័ន្ធទៅនឹងការជ្រើសរើសពលករ ការសន្យាការផ្តល់អត្ថប្រយោជន៍អីជាច្រើន នៅតាមបណ្តាសហគ្រាស ក្រុមហ៊ុនអីជាដើម ចឹងដើម្បីធ្វើការឱ្យមានប្រសិទ្ធភាព វាលុះត្រាមានការតាមដាន ស៊ើបអង្កេតមួយ ឱ្យមាននូវគណៈកម្មការចំពោះកិច្ចមួយដែលអាចធានាដល់ដំណើរការនៃការតាមដាន ការស៊ើបអង្កេត ការត្រួតពិនិត្យ ជាពិសេសគឺនៅតាមរយៈបណ្តាញសង្គមមួយចំនួន ដែលមិនមែនជាផ្លូវការ ដែលមានការសន្យា ដែលមានការប្រកាសនូវការជ្រើសរើសអីជាដើម។ល។»។
យោងតាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជីវៈ ដែលត្រូវបានស្រង់មកផ្សាយលើគេហទំព័ររបស់ក្រសួងព័ត៌មាន ឱ្យដឹងថា គិតចាប់ពីថ្ងៃទី៨ ខែមិថុនា មកដល់ថ្ងៃទី៦ ខែសីហា ឆ្នាំ២០២៥នេះ ពលរដ្ឋខ្មែរដែលបានវិលត្រឡប់មកកាន់មាតុប្រទេសវិញ សរុបចំនួន ៨០៦ ៨១៦ នាក់ (ជាង៨៨ម៉ឺននាក់)៕
