សេតវិមាន បាននិយាយថា ប្រធានាធិបតីសហរដ្ឋអាមេរិក លោក ដូណាល់ ត្រាំ(Donald Trump) បានចុះហត្ថលេខាលើបទបញ្ជាប្រតិបត្តិមួយ ដើម្បីបន្តការផ្អាករបាំងពន្ធគយរវាងសហរដ្ឋអាមេរិក និងចិនសម្រាប់រយៈពេល៩០ថ្ងៃកាលពីថ្ងៃចន្ទ។
យោងតាមសារព័ត៌មាន នីគីអេស៊ា(Nikkei Asia) បានរាយការណ៍នៅថ្ងៃទី១២ ខែសីហា ឆ្នាំ២០២៥នេះថា ការផ្អាកសង្រ្គាមពាណិជ្ជកម្មត្រូវបានកំណត់ថា នឹងផុតកំណត់នៅថ្ងៃទី១២ ខែសីហានេះ ដោយឡែក ថ្ងៃផុតកំណត់ថ្មី នៅថ្ងៃទី១០ ខែវិច្ឆិកា ឆ្នាំ២០២៥។
នេះបើយោងតាមបញ្ជារបស់ លោក ត្រាំ ដែលរំឭកឡើងវិញចំពោះការព្រួយបារម្ភអំពី‘‘កង្វះខាតនៃពាណិជ្ជកម្មទៅវិញទៅមក’’ និងសន្តិសុខសេដ្ឋកិច្ច។
ក្រសួងពាណិជ្ជកម្មរបស់ចិន បាននិយាយថា ខ្លួននឹងដកក្រុមហ៊ុនអាមេរិកចំនួន១២ ចេញពីបញ្ជីត្រួតពិនិត្យការនាំចេញរបស់ខ្លួន និងផ្អាកការដាក់បញ្ចូលក្រុមហ៊ុនចំនួន១៦ ផ្សេងទៀត សម្រាប់រយៈពេល ៩០ ថ្ងៃ។
អ្នកនាំពាក្យស្ថានទូតចិន លោក លីវ ភឹងអ៊ី (Liu Pengyu) បានប្រាប់ Nikkei Asia ថា‘‘យើងសង្ឃឹមថាសហរដ្ឋអាមេរិកនឹងបន្តធ្វើការជាមួយប្រទេសចិន ដើម្បីអនុវត្តការឯកភាពដែលឈានដល់ក្នុងអំឡុងពេលការហៅទូរស័ព្ទរបស់ប្រមុខរដ្ឋទាំងពីរ’’ សំដៅលើការសន្ទនារវាងលោក ត្រាំ និងលោក ស៊ី កាលពីខែមិថុនា។ លោកបន្តថា ការពិគ្រោះយោបល់ពាណិជ្ជកម្មគួរតែផ្អែកលើ‘‘ភាពស្មើគ្នា ការគោរពគ្នាទៅវិញទៅមក’’ដើម្បី‘‘បង្កើនការយល់ដឹង កាត់បន្ថយការយល់ច្រឡំ និងពង្រឹងកិច្ចសហប្រតិបត្តិការតាមរយៈការសន្ទនា’’។
លោក អាលីវីនី (Ali Wyne) ទីប្រឹក្សាស្រាវជ្រាវ និងតស៊ូមតិជាន់ខ្ពស់ ស្តីពីទំនាក់ទំនងអាមេរិក-ចិន នៅ International Crisis Group បាននិយាយថា ការចរចារវាងសហរដ្ឋអាមេរិក និងចិន ក្នុងរយៈពេលប៉ុន្មានខែថ្មីៗនេះ បានបញ្ជាក់អំពីភាពមិនស៊ីសង្វាក់នៃការពឹងផ្អែកគ្នារវាងប្រទេសទាំងពីរ៕
