កម្ពុជា ច្រានចោលការចោទរបស់ថៃ ជុំវិញទាហានរបស់ខ្លួនជាន់មីនរងរបួសនៅតំបន់ប្រាសាទតាមាន់ធំ ដែលថាជាការចោទប្រកាន់មិនពិត និងទាមទារឱ្យភាគីថៃ អនុវត្តបទឈប់បាញ់ឱ្យបានពេញលេញ ដើម្បីបញ្ចៀសការយល់ច្រឡំ ឈានដល់ការប្រឈមមុខដាក់គ្នានាំឱ្យមានភាពតានតឹងកើតឡើងសារជាថ្មី។
នេះបើតាមសេចក្តីប្រកាសព័ត៌មានរបស់ក្រសួងការពារជាតិ នៅថ្ងៃទី១២ ខែសីហា ឆ្នាំ២០២៥នេះ។ កម្ពុជាបានគូសបញ្ជាក់ថា ការរងរបួសរបស់ទាហានថៃ ដោយសារការផ្ទុះគ្រាប់មីន នៅតំបន់ប្រាសាទតាមាន់ធំ ក្នុងស្រុកបន្ទាយអំពិល ខេត្តឧត្តរមានជ័យ នៅថ្ងៃទី១២ ខែសីហា ឆ្នាំ២០២៥ មិនមានការស៊ើបអង្កេតផ្លូវការ និងមានតម្លាភាព ដើម្បីបញ្ជាក់ការពិតនៅឡើយពាក់ព័ន្ធនឹងបញ្ហានេះ។
មួយវិញទៀត កម្ពុជាក៏តែងតែបានរំឭកភាគីថៃ ជាច្រើនលើកច្រើនសារថា តំបន់ទាំងនេះ នៅមានគ្រាប់មីនដែលជាសំណល់ពីសង្គ្រាមជាច្រើនគ្រាប់ ហេតុដូចនេះ គ្រប់ភាគីពាក់ព័ន្ធគួរចៀសវាងការធ្វើសេចក្តីសន្និដ្ឋានជាសាធារណៈណាមួយ មុនពេលរកឃើញការពិត និងផ្តល់យុត្តិធម៌សម្រាប់ទាំងអស់គ្នា ដើម្បីបញ្ចៀសការយល់ច្រឡំ ឈានដល់ការប្រឈមមុខដាក់គ្នានាំឱ្យមានភាពតានតឹងកើតឡើងសារជាថ្មី។
លើសពីនេះ កម្ពុជា អំពាវនាវដល់ភាគីថៃការអនុវត្តបទឈប់បាញ់ឱ្យបានពេញលេញ ដើម្បីដោះស្រាយរាល់វិវាទដោយសន្តិវិធី ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន៕
