ក្រសួងការងារ ណែនាំដល់សហគ្រាស ក្រុមហ៊ុន រោងចក្រ ផ្អាកយកអត្តសញ្ញាណបណ្ណខ្មែរ ពីពលករដែលត្រឡប់មកពីប្រទេសថៃ ជាបណ្តោះអាសន្នសិន ដោយអាចប្រើជំនួសនូវឯកសារផ្សេងសម្រាប់សម្គាល់អត្តសញ្ញាណ ក្នុងអំឡុងពេលពួកគាត់ដាក់ពាក្យចូលធ្វើការ។
ក្រោយជម្លៀសខ្លួនពីប្រទេសថៃ ទៅដល់ប្រទេសកម្ពុជាវិញដោយសុវត្ថិភាព ពលករខ្មែរនៅតាមបណ្ដាខេត្តមួយចំនួន កំពុងសម្រុកនាំគ្នារកការងារធ្វើ ដោយភាគច្រើនពួកគាត់សំដៅទៅរកការងារសំណង់ សិប្បកម្ម ជាពិសេសគឺវិស័យរោងចក្រ។
ប៉ុន្តែទន្ទឹមនឹងការប្រជ្រៀតគ្នារកការងារធ្វើ អតីតពលករមួយចំនួន ធ្លាប់បានប្រាប់ វីអូឌី កាលពីថ្ងៃទី០៦ ខែសីហាថា បញ្ហាដែលពួកគាត់ជួបប្រទះ នោះគឺគ្មានឯកសារគ្រប់គ្រាន់ដាក់ពាក្យចូលធ្វើការ ដោយសារតែអត្តសញ្ញាណបណ្ណសញ្ជាតិខ្មែររបស់ពួកគាត់អស់សុពលភាព ហើយត្រូវរងចាំជាង១ខែ ដើម្បីធ្វើអត្តសញ្ញាណបណ្ណថ្មី។
យ៉ាងណា សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១១ ខែសីហា ឆ្នាំ២០២៥ បានលើកឡើងថា ដើម្បីសម្រួលដល់ការទទួលបានការងារធ្វើរបស់ប្រជាពលករខ្មែរ ដែលត្រឡប់មកពីប្រទេសថៃ ក្រសួងមិនតម្រូវឱ្យភ្ជាប់អត្តសញ្ញាណបណ្ណសញ្ជាតិខ្មែរ សម្រាប់ការស្នើសុំសៀវភៅការងារកម្មករនិយោជិតខ្មែរ និងការចុះបញ្ជីក្នុងបេឡាជាតិសន្តិសុខសង្គម (បសស) ជាបណ្តោះអាសន្ន រហូតដល់មានការជូនដំណឹងសាជាថ្មី។
ក្រសួងបន្តថា ម្ចាស់ ឬនាយកសហគ្រាស ក្រុមហ៊ុន រោងចក្រ អាចជ្រើសរើសពលករខ្មែរដែលត្រឡប់មកពីថៃ ឱ្យចូលធ្វើការដោយប្រើប្រាស់ឯកសារណាមួយ ដូចជា សំបុត្របញ្ជាក់កំណើត សៀវភៅគ្រួសារ លិខិតឆ្លងដែន លិខិតធ្វើដំណើរពលករកម្ពុជាធ្វើការនៅបរទេស ឬលិខិតបញ្ជាក់អត្តសញ្ញាណដែលចេញដោយអាជ្ញាធរមានសមត្ថកិច្ជំនួសអត្តសញ្ញាណបណ្ណសញ្ជាតិខ្មែរ។
ចាប់តាំងពីប្រទេសកម្ពុជា និងប្រទេសថៃ មានវិវាទព្រំដែនជាមួយគ្នាជាង២ខែ រហូតវិវត្តទៅរកភាពតានតឹងបណ្ដាលឱ្យមានការផ្ទុះអាវុធ ពលរដ្ឋកម្ពុជាប្រមាណ ៨៧ម៉ឺននាក់ ដែលទៅធ្វើការនៅប្រទេសថៃ បាននាំគ្នាសម្រុកត្រឡប់ចូលប្រទេសកំណើតវិញ ដើម្បីសុវត្ថិភាព និងគេចផុតពីការតាមយាយីរាងកាយពីសំណាក់ពលរដ្ឋថៃជ្រុលនិយមមួយចំនួន។
ការត្រឡប់មកវិញយ៉ាងគំហុក បានធ្វើឱ្យគេពួកគេបាត់បង់ការងារ គ្មានប្រាក់ចំណូល ខណៈមួយចំនួនធំជាប់បំណុលធនាគារថែមទៀតផង ដែលតម្រូវឱ្យត្រូវស្វែងរកការងារធ្វើឱ្យបានឆាប់រហ័ស។ ប៉ុន្តែកង្វះឯកសារ ជាពិសេសអត្តសញ្ញាណបណ្ណ បានក្លាយជាបញ្ហាថ្មីមួយបន្ថែមទៀតសម្រាប់ពួកគេ។
ពលករមួយចំនួនលើបណ្ដាញសង្គម បានលើកឡើងព្រោងព្រាតពីសេវាធ្វើអត្តសញ្ញាណបណ្ណ ដែលលឿនរហ័សអាចទទួលបានក្នុងរយៈពេល៧ថ្ងៃ តែតម្រូវឱ្យបង់លុយចំនួន ៦០ម៉ឺនរៀល ឬស្មើនឹង១៥០ដុល្លារ។ ប៉ុន្តែ តាមរយៈការខលសាកសួរព័ត៌មានពីអគ្គនាយកដ្ឋានអត្តសញ្ញាណកម្ម ការធ្វើអត្តសញ្ញាណបណ្ណ គឺពុំតម្រូវឱ្យបង់ប្រាក់ឡើយ ដោយត្រូវរង់ចាំរយៈពេល ៥សប្ដាហ៍ ហើយក៏គ្មានសេវាពន្លឿនត្រឹមមួយសប្ដាហ៍នោះដែរ៕
