ពលករចំណាកស្រុកកម្ពុជារាប់សែននាក់ ដែលបានចាកចេញពីប្រទេសថៃ ត្រឡប់ទៅប្រទេសកម្ពុជាវិញ ដោយសារតែជម្លោះព្រំដែននោះ ប្រឈមនឹងអនាគតមិនច្បាស់លាស់ ជុំវិញការរកប្រាក់ចំណូល ដើម្បីដោះស្រាយជីវភាព និងផ្គត់ផ្គង់សមាជិកគ្រួសារ។
ទីភ្នាក់ងារសារព័ត៌មាន អេភី(AP) បានរាយការណ៍កាលពីថ្ងៃទី១២ ខែសីហា ឆ្នាំ២០២៥នេះថា ភាពតានតឹងរវាងប្រទេសទាំងពីរ បានកើនឡើងដោយសារជម្លោះវិវាទដីនៅតាមបណ្តោយព្រំដែនប្រវែង៨០០ គីឡូម៉ែត្ររបស់ពួកគេ។ ការប៉ះទង្គិចគ្នារយៈពេល៥ថ្ងៃនៅក្នុងខែកក្កដា យ៉ាងហោចណាស់មានមនុស្ស ៤៣ នាក់ បានស្លាប់ និងជាង ២៦០ ០០០នាក់ ត្រូវបានផ្លាស់ទីលំនៅនៅក្នុងប្រទេសអាស៊ីអាគ្នេយ៍ទាំងពីរ។
បទឈប់បាញ់ដ៏ផុយស្រួយដែលសម្របសម្រួលដោយប្រទេសម៉ាឡេស៊ី ដែលមានការគាំទ្រពីសហរដ្ឋអាមេរិក និងចិន ហាក់បីកំពុងមានសុពលភាព ខណៈក្រុមមន្ត្រីកំពុងព្យាយាមដោះស្រាយបញ្ហា ដែលជាមូលដ្ឋាននៃវិវាទនេះ។ ការផ្អាកឈប់បាញ់នេះ បានធ្វើឱ្យពលករត្រឡប់មកប្រទេសកម្ពុជាវិញ ដោយមានការបារម្ភថា តើពួកគេនឹងត្រូវរស់ដោយរបៀបណា បន្ទាប់ពីពួកគេបានចាកចេញពីការងារដែលធ្លាប់ផ្តល់ឱ្យពួកគេ ផ្ញើរលុយត្រឡប់មកក្រុមគ្រួសាររបស់គេវិញ។
បន្ថែមពីនេះ ប្រភពថា មូលហេតុដែលជំរុញឱ្យពលរដ្ឋខ្មែរភៀសខ្លួនទៅប្រទេសថៃ មានកត្តាច្រើនប្រភេទ។ ដោយឡែកសកម្មជនសិទ្ធិមនុស្ស បានរាយការណ៍ថា ពលករចំណាកស្រុកត្រូវក្មេងទំនើងជនជាតិថៃ វាយធ្វើបាប ឯអ្នកផ្សេងទៀតមានការព្រួយបារម្ភចំពោះពាក្យចចាមអារាមដែលមិនច្បាស់លាស់ថា រដ្ឋាភិបាលនឹងរឹបអូសយកដីធ្លី និងដកហូតសញ្ជាតិរបស់ពួកគេ ប្រសិនបើពួកគេមិនបានត្រឡប់មកស្រុកវិញ នៅពាក់កណ្តាលខែសីហានេះ។
លើសពីនេះ ក្រសួងការងារ និងបណ្ដុះបណ្ដាលវិជ្ជាជីវៈកម្ពុជា បានប៉ាន់ប្រមាណថា មានពលរដ្ឋខ្មែរចំនួន ១.២លាននាក់ កំពុងធ្វើការនៅប្រទេសថៃ នៅពេលដែលជម្លោះព្រំដែនបានចាប់ផ្តើមកើនកម្តៅនៅក្នុងខែមិថុនា។ ការប៉ាន់មានភាពខុសគ្នា ប៉ុន្តែអ្នកនាំពាក្យក្រសួងការងារ លោក ស៊ុន មេសា បាននិយាយថា យ៉ាងហោចណាស់ មានពលករ ៧៨ម៉ឺននាក់ ប្រហែល ៦៥% បានត្រឡប់មកកម្ពុជាវិញ៕
