ក្រុមទាហានរុស្ស៊ី បានរុញច្រានកាន់តែជ្រៅចូលទៅភាគខាងកើតនៃអ៊ុយក្រែន កាលពីថ្ងៃអង្គារ មុនកិច្ចប្រជុំរវាងប្រធានាធិបតី វ្លាឌីមៀ ពូទីន និងប្រធានាធិបតីសហរដ្ឋអាមេរិក លោក ដូណាល់ ត្រាំ ដែលមេដឹកនាំអឺរ៉ុបបារម្ភថា អាចនឹងបញ្ចប់សន្ធិសញ្ញាសន្តិភាព មានលក្ខខណ្ឌបង្ខំឱ្យអ៊ុយក្រែនជុំវិញឆន្ទៈការពារទឹកដី។
សារព័ត៌មាន រ៉យទ័រ(Reuters) បានរាយការណ៍នៅថ្ងៃទី១៣ ខែសីហា ឆ្នាំ២០២៥នេះថា នៅក្នុងការលុកលុយដ៏ទូលាយបំផុតមួយរហូតមកដល់ពេលនេះ ទាហានរុស្ស៊ីបានរុលទៅមុខជិតទីក្រុងជីករ៉ែធ្យូងថ្មដូប្រូភីលយ៉ា (Dobropillia) ជាផ្នែកនៃយុទ្ធនាការរបស់ លោក ពូទីន ដើម្បីគ្រប់គ្រងពេញលេញនៃតំបន់ដូនេតស្ក៍(Donetsk)របស់អ៊ុយក្រែន។ យោធាអ៊ុយក្រែន បានបញ្ជូនទាហានបម្រុងដោយនិយាយថា ពួកគេស្ថិតក្នុងការប្រយុទ្ធដ៏លំបាកមួយក្នុងការប្រឆាំងនឹងទាហានរុស្ស៊ី។
លោក ត្រាំ បាននិយាយអំពីកិច្ចព្រមព្រៀងសន្តិភាពមួយ ដែលពាក់ព័ន្ធទៅនឹងការផ្លាស់ប្តូរទឹកដីមួយចំនួនដើម្បីភាពប្រសើរឡើងនៃភាគីទាំងពីរ គឺរុស្សី និងអ៊ុយក្រែន ដែលពឹងផ្អែកលើសហរដ្ឋអាមេរិកជាផ្គត់ផ្គង់អាវុធដ៏សំខាន់។
បន្ថែមពីនេះ ព្រោះតែគ្រប់តំបន់ដែលកំពុងប្រជែងគ្នាស្ថិតក្នុងប្រទេសអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelenskiy) នឹងសម្ព័ន្ធមិត្តសហភាពអឺរ៉ុបបារម្ភថា លោក ហ្សេលេនស្គី(Zelenskiy) ប្រឈមនឹងសម្ពាធក្នុងការបោះបង់ច្រើនជាងរុស្ស៊ី។
លោក ហ្សេលេស្គី និងភាគីអឺរ៉ុបភាគច្រើន បាននិយាយថា សន្តិភាពយូរអង្វែងមិនអាចធានាបានដោយគ្មានអ៊ុយក្រែននៅលើតុចរចាបានទេ ហើយកិច្ចព្រមព្រៀងត្រូវតែគោរពតាមច្បាប់អន្តរជាតិ អធិបតេយ្យភាព និងបូរណភាពទឹកដីរបស់អ៊ុយក្រែន៕
