ក្នុងរបាយការណ៍កម្រាស់២៣ទំព័រ ចេញផ្សាយនៅថ្ងៃទី១២ ខែសីហា ឆ្នាំ២០២៥ ក្រសួងការបរទេសអាមេរិក បានសង្កត់ធ្ងន់ថា នៅក្នុងឆ្នាំ២០២៤ ពោលគឺមួយឆ្នាំកន្លងមកនេះ បញ្ហាសិទ្ធិមនុស្សនៅកម្ពុជាគ្មានអ្វីប្រែប្រួលគួរឱ្យកត់សម្គាល់ឡើយ។
របាយការណ៍បានលើកឡើងពីបញ្ហាសិទ្ធិមនុស្សសំខាន់ៗ ដូចជា ការធ្វើទារុណកម្មឃោរឃៅ អមនុស្សធម៌ ការចាប់ខ្លួនឬការឃុំខ្លួនដោយបំពាន ការគាបសង្កត់ប្រឆាំងនឹងបុគ្គលនៅក្នុងប្រទេសមួយផ្សេងទៀត ក្នុងនោះក៏មានផងដែរ នូវការរំលោភសិទ្ធិមនុស្សធ្ងន់ធ្ងរ រួមមាន ការធ្វើទារុណកម្ម អំពើហិង្សា ការដាក់ទណ្ឌកម្មដោយរដ្ឋាភិបាល និងតុលាការមិនឯករាជ្យ ការដាក់ទោសលើអ្នកទោស អ្នកនយោបាយ និងសកម្មជនសង្គម។
របាយការណ៍ដដែល បានឱ្យដឹងថា រដ្ឋាភិបាលកម្ពុជាបានបង្កើនការគំរាមកំហែង ការយាយី និងតាមអំពើចិត្ត រួមទាំងការឃ្លាំមើលប្រឆាំងនឹងសកម្មជននយោបាយ និងអ្នកការពារសិទ្ធិមនុស្សនៅក្រៅប្រទេស។ ជាក់ស្ដែងករណីមន្ត្រីកម្ពុជាបានចុះទៅពិនិត្យជាប្រចាំនៅសហគមន៍ជនភៀសខ្លួនកម្ពុជានៅទីក្រុងបាងកក ដើម្បីតាមដាននិងឃ្លាំមើលផ្ទះរបស់សកម្មជននយោបាយ និងសិទ្ធិមនុស្ស ដែលគេចខ្លួននិងជ្រកកោននៅប្រទេសថៃ។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរ (KOD) លោក ស៊ឹង សែនករុណា យល់ឃើញថា របាយការណ៍របស់ក្រសួងការបរទេសអាមេរិក ធ្វើឡើងមានលក្ខណៈបច្ចេកទេស ដែលមានការឃ្លាំមើល និងតាមដានល្អិតល្អន់ ខណៈរដ្ឋាភិបាលចាប់ខ្លួន និងធ្វើទុក្ខបុកម្នេញលើសកម្មជនបក្សប្រឆាំង បរិស្ថាន ដោយបើកចំហ។
លោកបន្តថា ស្របពេលដែលកម្ពុជាកំពុងស្ថិតក្រោមក្រសែភ្នែកអន្តរជាតិ ករណីវិវាទព្រំដែនជាមួយថៃ រដ្ឋាភិបាលគួរយកឱកាសនេះស្ដារលទ្ធិប្រជាធិបតេយ្យ និងដោះលែងអ្នកទោសមនសិការឱ្យមានសេរីភាពវិញ។
លោក ស៊ឹង សែនករុណា ថ្លែងថា៖ «អ៊ីចឹងក្នុងឱកាសហ្នឹង ដើម្បីយកចិត្តទុកដាក់ជាមួយនឹងខាងប្រទេសលោកសេរី មានសហរដ្ឋអាមេរិក សហភាពអ៊ឺរ៉ុប និងបណ្ដាប្រទេសផ្សេងៗទៀត ដែលគេចង់ឃើញកម្ពុជាមានការគោរពសិទ្ធិមនុស្ស និងប្រជាធិបតេយ្យហ្នឹង ក្នុងឱកាសហ្នឹង យើងគួរតែចាប់យក ដោយចាប់ផ្ដើមពីការអនុវត្តការគោរពសិទ្ធិមនុស្ស និងស្ដារនូវប្រជាធិបតេយ្យហ្នឹងឯង»។
ក្រៅពីបញ្ហាខាងលើ របាយការណ៍បានរំលេចផងដែរ ពីការរឹតត្បិតយ៉ាងធ្ងន់ធ្ងរលើសេរីភាពនៃការបញ្ចេញមតិ និងសេរីភាពសារព័ត៌មាន រួមទាំងការគំរាមកំហែង ហិង្សា និងការចាប់ខ្លួនអ្នកសារព័ត៌មានដោយអយុត្តិធម៌លើអ្នកសារព័ត៌មាន ព្រមទាំងការលើកឡើងពីបញ្ហារស៊ើបផ្សេងទៀត នោះគឺការជួញដូរមនុស្ស ពលកម្មដោយបង្ខំ ពលកម្មកុមារ ការរឹតត្បិតគំរាមកំហែងសហជីពរបស់កម្មករ និងការកត់សម្គាល់ពីក្រុមឧក្រិដ្ឋជនឆបោកតាមប្រព័ន្ធអនឡាញ ដែលបានរំលោភបំពានផ្លូវកាយ និងផ្លូវភេទ កេងប្រវ័ញ្ច និងជំរិតទារប្រាក់ពីជនរងគ្រោះ ដើម្បីជាសំណូកទៅឲ្យប៉ូលិស និងមន្ត្រីរដ្ឋាភិបាល។
តាមរយៈរបាយការណ៍ ក្រសួងការបរទេសអាមេរិកបានសង្កត់ធ្ងន់ថា រដ្ឋាភិបាលកម្ពុជាមិនបានចាត់វិធានការ ឬមានចំណាត់ការកំណត់អត្តសញ្ញាណ និងដាក់ទោសមន្ត្រី ដែលប្រព្រឹត្តការរំលោភសិទ្ធិមនុស្សឡើយ៕
