ប្រធានាធិបតីសហរដ្ឋអាមេរិក លោក ដូណាល់ ត្រាំ គំរាមមេដឹកនាំរុស្ស៊ី លោក ពូទីន ថានឹងជួប‘‘ផលលំបាកធ្ងន់ធ្ងរ’’ ប្រសិនបើរុស្សីមិនយល់ព្រមចំពោះសន្តិភាពក្នុងប្រទេសអ៊ុយក្រែន។
ប៉ុន្តែកាលពីថ្ងៃពុធ លោក ត្រាំ បាននិយាយថា កិច្ចប្រជុំរវាងពួកគេអាចត្រូវបានធ្វើយ៉ាងឆាប់រហ័ស ដែលនឹងរួមបញ្ចូលមេដឹកនាំអ៊ុយក្រែន។
រ៉យទ័រ(Reuters) បានរាយការណ៍នៅថ្ងៃទី១៤ ខែសីហា ឆ្នាំ២០២៥នេះថា លោក ត្រាំ មិនបានបញ្ជាក់ថាអ្វីអាចជាផលពិបាកនោះទេ ប៉ុន្តែលោកបានព្រមានអំពីការដាក់ទណ្ឌកម្មសេដ្ឋកិច្ច ប្រសិនបើជំនួបរបស់លោកជាមួយ លោក ពូទីន នៅអាឡាស្កា(Alaska) នៅថ្ងៃសុក្រនេះ បង្ហាញថា មិនទទួលបានផ្លែផ្កា។
ការអធិប្បាយ និងលទ្ធផលនៃសន្និសីទប្រជុំតាមអនឡាញរបស់ លោក ត្រាំ (Trump) ជាមួយបណ្តាអ្នកដឹកនាំអឺរ៉ុប និងប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី(Volodymyr Zelenskiy) ដែលបានធ្វើឡើងកាលពីថ្ងៃពុធ អាចជាការផ្តល់កម្លាំងចិត្តសម្រាប់ទីក្រុងគីវ(Kyiv) បន្ទាប់ពីមានការភ័យខ្លាចថាកិច្ចប្រជុំកំពូលនៅអាឡាស្កា បញ្ចប់ដោយការបែងចែកទឹកដីរបស់អ៊ុយក្រែន។
ទោះជាយ៉ាងណាក៏ដោយ រុស្ស៊ីទំនងជាទប់ទល់ទៅនឹងការទាមទាររបស់អ៊ុយក្រែន និងអឺរ៉ុប ហើយកាលពីមុនបាននិយាយថា ជំហររបស់ខ្លួនមិនផ្លាស់ប្តូរទេ ចាប់តាំងពីខ្លួនបានលម្អិតជាលើកដំបូងដោយ លោក ពូទីន ក្នុងខែមិថុនា ឆ្នាំ២០២៤។
បន្ថែមពីនេះ ការលើកឡើងនូវសំណួរទៅកាន់ លោក ត្រាំ ថា តើផលពិបាកដែលរុស្ស៊ីទទួលបាននោះ គឺជាការដាក់ទណ្ឌ ឬក៏ការដាក់ពន្ធពាណិជ្ជកម្ម? យ៉ាងណា លោក ត្រាំ បានប្រាប់ទៅកាន់អ្នកសារព័ត៌មានថា‘‘ខ្ញុំមិនចាំបាច់និយាយទេ ប៉ុន្តែនឹងមានផលពិបាកធ្ងន់ធ្ងរ’’៕
